ലുലു ഗ്രൂപ്പ് ലോജിസ്റ്റിക്സ് മാനേജര് ദുബൈയില് നിര്യാതനായി
Thu, 15 Jan 2026
എആർ റഹ്മാൻ സൈറ ബാനു വിവാഹമോചനം ഇന്ത്യയിലെ ഏറ്റവും ശ്രദ്ധേയമായ സെലിബ്രിറ്റി വിവാഹമോചനങ്ങളിൽ ഒന്നു കൂടിയാകുകയാണ്. എആർ റഹ്മാനും ഭാര്യയും 29 വർഷത്തെ ദാമ്പത്യജീവിതം അവസാനിപ്പിക്കുന്നതായുള്ള വിവരം സൈറാ ബാനുവിൻ്റെ അഭിഭാഷക വന്ദന ഷായാണ് കഴിഞ്ഞ ദിവസം വെളിപ്പെടുത്തിയത്. ഗുജറാത്തിലെ കച്ച് സ്വദേശിയായ സൈറ ബാനു 1993ലാണ് എആർ റഹ്മാൻ്റെ ജീവിതത്തിൻ്റെ ഭാഗമാകുന്നത്. എന്നാൽ അഭിഭാഷകയുടെ മറ്റൊരു പ്രസ്താവന കൂടി ശ്രദ്ധേയമാകുന്നുണ്ട്. വൈകാരികമായ കാരണങ്ങളാലാണ് ഇരുവരും വേർപിരിയുന്നതും സൈറബാനു ജീവനാംശം ഒന്നും ആവശ്യപ്പെട്ടിട്ടില്ലെന്നും അഭിഭാഷക സൂചന നൽകിയിരുന്നു.
സ്ഥിരീകരിക്കാത്ത പല റിപ്പോർട്ടുകളും നൽകുന്ന സൂചനയനുസരിച്ച് 1,728 കോടി രൂപയോളമാണ് എആർ റഹ്മാൻ്റെ ഏകദേശ ആസ്തി. ജീവനാംശം ആവശ്യപ്പെടാൻ ഭാര്യക്ക് അവകാശമുണ്ട്. എന്നാൽ സൈറബാനു ജീവനാംശം ആവശ്യപ്പെടുമോ എന്നതിൽ ഇപ്പോൾ വ്യക്തതയില്ല.
2023-ൽ ഫോബ്സിൻ്റെ സെലിബ്രിറ്റി സ്പെഷ്യൽ ഇഷ്യൂവിൽ ഉൾപ്പെടെ എആർ റഹ്മാൻ ഇടം നേടിയിരുന്നു. ലോസ് ഏഞ്ചൽസിലും ചെന്നൈയിലുമുൾപ്പെടെ 30 ലക്ഷം കോടി ഡോളറിൻ്റെ വീടുകൾ, ആഡംബര സ്റ്റുഡിയോകൾ എന്നിവയും നിരവധി ആഡംബര വാഹനങ്ങളും ഒക്കെ സ്വന്തമായുണ്ട്. ചെറിയോരു തുടക്കമായിരുന്നു എ.ആർ റഹ്മാൻ്റേത്. പിന്നീട് ലോകത്തിലെ തന്നെ ഏറ്റവും പ്രശസ്തനായ സംഗീതസംവിധായകരിൽ ഒരാളായി മാറി. മൂന്ന് പതിറ്റാണ്ടിലേറെ നീണ്ട കരിയറിൽ, ഓസ്കാർ ഉൾപ്പെടെയുള്ള അംഗീകാരങ്ങൾ. രാജ്യാന്തര മ്യൂസിക് ഇൻഡസ്ട്രിയുടെ ഭാഗമായതോടെ വലിയ ആസ്തി വർധനയും നേടി. ലോസ് ഏഞ്ചൽസിൽ എസ്റ്റേറ്റും നിക്ഷേപങ്ങളുമുണ്ട്.
ടൈംസ് ഓഫ് ഇന്ത്യ റിപ്പോർട്ട് പ്രകാരം ലോസ് ഏഞ്ചൽസിലെ അപ്പാർട്ട്മെൻ്റിൽ കോടികളാണ് റഹ്മാൻ നിക്ഷേപിച്ചത്. 2010-ൽ വാങ്ങിയ അപ്പാർട്ട്മൻ്റ് വീടായി മാത്രമല്ല മ്യൂസിക് സ്റ്റുഡിയോയായും
ഉപയോഗിക്കുന്നുണ്ട്. കോടമ്പാക്കത്തും സ്റ്റുഡിയോ ആയി ഉപയോഗിക്കുന്ന ഒരു ആഡംബര ബംഗ്ലാവും റഹ്മാനുണ്ട്.
ഇവ കൂടാതെ ഇന്ത്യയിലും വിദേശത്തും മറ്റ് സംഗീത സ്റ്റുഡിയോകളും റഹ്മാനുണ്ട്. ചെന്നൈയിലെ അദ്ദേഹത്തിൻ്റെ ആദ്യ സ്റ്റുഡിയോ, പഞ്ചതൻ റെക്കോർഡ് ഇൻ, രാജ്യത്തെ ഏറ്റവും പ്രശസ്തമായ സ്റ്റുഡിയോകളിലൊന്നാണ്. സമീപത്ത് തന്നെ മറ്റൊരു അത്യാധുനിക എഎം സ്റ്റുഡിയോയും റഹ്മാൻ സ്വന്തമാക്കി. ദുബായിലെ പ്രശസ്തമായ ഫിർദൗസ് സ്റ്റുഡിയോ, ലണ്ടനിലെ കെഎം മ്യൂസിക് സ്റ്റുഡിയോ എന്നിവയും ഒക്കെ പോർട്ട്ഫോളിയോയിലുണ്ട്.
ആഡംബര വാഹനങ്ങളോട് താൽപ്പര്യമുള്ള റഹ്മാൻ്റെ ഗാരേജിലെ വാഹനങ്ങളും പലപ്പോഴും വാർത്തയായിട്ടുണ്ട്. 2022 ൽ ഏകദേശം മൂന്ന് കോടി രൂപ വിലയുള്ള പോർഷെ ടെയ്കാൻ സ്വന്തമാക്കിയിരുന്നു. ഇവയിലൊന്നും അവകാശവാദം ഉന്നയിക്കാതെ ഭാര്യ സൈറ ബാനു വേർപിരിയാൻ തയ്യാറായാൽ ഇന്ത്യയിലെ മറ്റ് വിവാഹമോചനങ്ങളിൽ നിന്നൊക്കെ ഇത് വ്യത്യസ്തമാകും.
