ഷാര്‍ജ വ്യവസായ മേഖലയില്‍ തീപിടിത്തം; വന്‍ നാശനഷ്ടം, ആളപായമില്ല
Tue, 26 Aug 2025
അബുദാബി : മനുഷ്യ ജീവിതങ്ങള്‍ ആവിഷ്‌കരിക്കുക എന്നത് എഴുത്തുകാരെ സംബന്ധിച്ചിടത്തോളം സമരമാര്‍ഗമായി മാറിയിരിക്കുന്നുവെന്ന് പുരോഗമന കലാ സാഹിത്യ സംഘം വൈസ് പ്രസിഡന്റ് അശോകന്‍ ചരുവില്‍ അഭിപ്രായപ്പെട്ടു. അബുദാബി കേരള സോഷ്യല്‍ സെന്ററും യുഎഇ എഴുത്തുകാരുടെ കൂട്ടായ്മയായ അക്ഷരക്കൂട്ടവും സംയുക്തമായി സംഘടിപ്പിച്ച ഏകദിന സാഹിത്യ ശില്‍പശാല ഉദ്ഘാടനം ചെയ്തു സംസാരിക്കുകയായിരുന്നു. മനുഷ്യ അനുഭവങ്ങള്‍ നിരാകരിക്കുക എന്ന തന്ത്രമാണ് ലോകത്തിലെ സാമ്പത്തിക മേധാവികള്‍ സാമാന്യ മനുഷ്യര്‍ക്ക് നേരെ പ്രയോഗിക്കുന്നത്. സ്വന്തം അനുഭവങ്ങളില്‍ നിന്നും അടര്‍ത്തിമാറ്റി ഏതോ ഒരു മിഥ്യാലോകത്തിലേക്ക് അവനെ കൊണ്ടുപോയി ഉപകരണമാക്കുകയാണവര്‍. ഇതിനെ പ്രതിരോധിക്കാന്‍ എഴുത്തുകള്‍ കൊണ്ടും സാംസ്‌കാരിക പ്രവര്‍ത്തനങ്ങള്‍ കൊണ്ടും മാത്രമേ സാധ്യമാകൂവെന്നും അദ്ദേഹം കൂട്ടിച്ചേര്‍ത്തു.
പ്രവാസ സാഹിത്യം എന്ന രീതിയില്‍ കാണേണ്ട ആവശ്യമില്ലാത്ത രീതിയില്‍ ഒരു ആഗോളസ്വഭാവം പ്രവാസ സാഹിത്യത്തിന് കൈവരിക്കാന്‍ പുതിയ കാലത്ത് കഴിഞ്ഞിട്ടുണ്ടെന്ന് പ്രമുഖ ചലച്ചിത്ര ഗാനരചയിതാവ് റഫീഖ് അഹമ്മദ് അഭിപ്രായപ്പെട്ടു. ലോകങ്ങള്‍ തമ്മിലുള്ള അകലം കുറഞ്ഞ സാഹചര്യത്തില്‍ ഇന്ന് പ്രവാസ സാഹിത്യം എന്നതിന്റെ രൂപഭാവങ്ങളില്‍ ആദ്യകാലത്തേതില്‍ നിന്നും വളരെയേറെ മാറ്റം സംഭവിച്ചിരിക്കുന്നു. നാട്ടില്‍ നടക്കുന്നതിനേക്കാള്‍ സജീവമായ സാഹിത്യ ചര്‍ച്ചയും സാംസ്‌കാരിക പ്രവര്‍ത്തനങ്ങളും സാമൂഹ്യമായ ഇടപെടലുകളും നടക്കുന്നത് പ്രവാസലോകത്താണ് എന്നത് ഏറെ ആഹ്ലാദം പകരുന്നതാണെന്നും അദ്ദേഹം കൂട്ടിച്ചേര്‍ത്തു. കേരള സോഷ്യല്‍ സെന്റര്‍ പ്രസിഡന്റ് എകെ ബീരാന്‍കുട്ടി അധ്യക്ഷനായി. ഉദ്ഘാടന സമ്മേളനത്തിന് ശേഷം നോവല്‍,കഥ,കവിത,റേഡിയൊ,മൈഗ്രേഷന്‍ ആന്റ് മോഡേനിറ്റി എന്നീ വിഷയങ്ങളെ അധികരിച്ചുള്ള ചര്‍ച്ചകള്‍ നടന്നു.
സ്മിത നെരവത്ത്,കെ.പികെ വെങ്ങര,സര്‍ജുചാത്തന്നൂര്‍,കുഴൂര്‍ വിത്സന്‍,കമറുദ്ദീന്‍ ആമയം,പി ശിവപ്രസാദ് എന്നിവരും ‘ഒരു നോവല്‍ എങ്ങിനെ തുടങ്ങുന്നു’,’മലയാളകവിതയുടെ ഭൂമിക’, ‘ചെറുകഥ പ്രമേയത്തിലേക്കുള്ള വേറിട്ട വഴികള്‍’,’ശബ്ദം സഞ്ചരിച്ച ദൂരങ്ങള്‍’ എന്നീ വിഷയങ്ങളെ അധികരിച്ചു സംസാരിച്ചു. നാലു വിഭാഗമായി നടന്ന ശില്‍പശാലയില്‍ ഇകെ ദിനേശന്‍,ഇന്ത്യാ സോഷ്യല്‍ സെന്റര്‍ സാഹിത്യ വിഭാഗം സെക്രട്ടറി നാസര്‍ വിളഭാഗം,വെള്ളിയോടന്‍,ഒമര്‍ ഷരീഫ് എന്നിവര്‍ മോഡറേറ്ററായി. പ്രിയ ശിവദാസ്,റഷീദ് പാലക്കല്‍, മൊഹമ്മദാലി,രമേശ് പെരിമ്പിലാവ്,അസി,ഹമീദ് ചങ്ങരംകുളം,അനന്ത ലക്ഷ്മി,എംസി നവാസ്,എന്നിവര്‍ വിവിധ എഴുത്തുകാരുടെ നോവലും,കഥയും,കവിതയും ഹ്രസ്വമായി അവതരിപ്പിച്ചു. ശില്‍പശാലയില്‍ കേരള സോഷ്യല്‍ സെന്റര്‍ സാഹിത്യ വിഭാഗം സെക്രട്ടറി ഷെരീഫ് മാന്നാര്‍ സ്വാഗതവും അസി.സെക്രട്ടറി ഹിശാം സെന്‍ നന്ദിയും പറഞ്ഞു.
