പ്രതിരോധ മന്ത്രാലയ മേളയ്ക്ക് ദുബൈയില്‍ തുടക്കം
Tue, 13 May 2025
നാഷണല്‍ ആന്റ് റിസര്‍വ് സര്‍വീസ് കരിയര്‍ ഫെയര്‍ നാളെ സമാപിക്കും
ദുബൈ: ദേശീയ പ്രതിരോധ മന്ത്രാലയ മേളയ്ക്ക് ദുബൈയില്‍ പ്രൗഢ തുടക്കം. ദുബൈ എക്‌സ്‌പോ സിറ്റിയിലെ എക്‌സിബിഷന്‍ സെന്ററില്‍ നടക്കുന്ന എട്ടാമത് നാഷണല്‍ ആന്റ് റിസര്‍വ് സര്‍വീസ് കരിയര്‍ ഫെയര്‍ പ്രതിരോധ മന്ത്രാലയത്തിലെ ജോയിന്റ് ശേഷികള്‍ക്കായുള്ള അസിസ്റ്റന്റ് ചീഫ് ഓഫ് സ്റ്റാഫ് മേജര്‍ ജനറല്‍ സ്റ്റാഫ് പൈലറ്റ് ഇസ്ഹാഖ് സാലിഹ് മുഹമ്മദ് അല്‍ ബലൂഷി ഉദ്ഘാടനം ചെയ്തു. മേളയില്‍ ഒരുക്കിയ പ്രദര്‍ശനം പ്രതിരോധ മന്ത്രാലയത്തിലെ മുതിര്‍ന്ന ഉദ്യോഗസ്ഥര്‍,നാഷണല്‍ സര്‍വീസ് ആന്റ് റിസര്‍വ് അതോറിറ്റി പ്രതിനിധികള്‍ എന്നിവര്‍ക്കൊപ്പം മേജര്‍ ജനറല്‍ അല്‍ ബലൂഷി സന്ദര്‍ശിച്ചു. സേനയിലേക്ക് റിക്രൂട്ട് ചെയ്യപ്പെടുന്നവര്‍ക്കുള്ള വിപുലമായ തൊഴില്‍ അവസരങ്ങളെക്കുറിച്ചും പ്രതിരോധ മന്ത്രാലയത്തിന്റെ പിന്തുണയോടെ മേളയില്‍ വാഗ്ദാനം ചെയ്യുന്ന സംരംഭങ്ങളെക്കുറിച്ചും സേവനങ്ങളെക്കുറിച്ചും അദ്ദേഹത്തിന് മേളയിലെ ഉദ്യോഗസ്ഥര്‍ വിശദീകരിച്ചു കൊടുത്തു. രാജ്യത്തിന്റെ നവീകരണത്തിന്റെ നായകത്വം നല്‍കാനും ഭാവി സാമ്പത്തിക വികസനത്തില്‍ സജീവ പങ്കുവഹിക്കാനും കഴിവുള്ള ദേശീയ പ്രതിഭകളുടെ പുതുതലമുറയെ കെട്ടിപ്പടുക്കുന്നതിന് സംഭാവന നല്‍കാന്‍ സേവന ബിരുദധാരികളെ പ്രാപ്തരാക്കുകയാണ് മേളയുടെ ലക്ഷ്യമെന്ന് ഇസ്ഹാഖ് സാലിഹ് മുഹമ്മദ് അല്‍ ബലൂഷി പറഞ്ഞു,
‘ദേശീയ സേവന ബിരുദധാരികളെ ശാക്തീകരിക്കുന്നതിനും അവരെ തൊഴില്‍ വിപണിയിലേക്ക് സംയോജിപ്പിക്കുന്നതിനുമുള്ള രാജ്യത്തെ സ്ഥാപനങ്ങളുടെ പ്രതിബദ്ധതയെ പ്രതിഫലിപ്പിക്കുന്ന പ്രധാന ദേശീയ വേദിയായി നാഷണല്‍ ആന്റ്് റിസര്‍വ് സര്‍വീസ് കരിയര്‍ ഫെയര്‍ പ്രവര്‍ത്തിക്കുന്നു. ഇത് ദേശീയ പ്രതിഭകളുടെ കഴിവുകള്‍ വര്‍ധിപ്പിക്കുന്നതിനും മാനുഷിക മൂലധനം വികസിപ്പിക്കുന്നതിനും ഏറെ സംഭാവന നല്‍കുന്നു. തങ്ങളുടെ സേവനകാലത്ത് അച്ചടക്കവും കഴിവും പ്രകടിപ്പിച്ചവരും ഇപ്പോള്‍ രാജ്യത്തിന്റെ സുപ്രധാന മേഖലകളില്‍ സ്വാധീനം ചെലുത്താന്‍ പൂര്‍ണമായും തയാറായവരുമായ ഇമാറാത്തി യുവാക്കളുടെ വിശിഷ്ട സംഘത്തെ പ്രതിരോധ മന്ത്രാലയത്തില്‍ കാണുന്നതില്‍ തങ്ങള്‍ക്ക് അതിയായ അഭിമാനമുണ്ടെന്നും അല്‍ ബലൂഷി കൂട്ടിച്ചേര്‍ത്തു.
പൊതു,സ്വകാര്യ മേഖലകളില്‍ നിന്നുള്ള 80ലധികം സ്ഥാപനങ്ങള്‍ പ്രതിരോധ മേളയില്‍ പങ്കെടുക്കുന്നുണ്ട്. ഏകദേശം 30 വൈവിധ്യമാര്‍ന്ന മേഖലകളെ പ്രതിനിധീകരിക്കുന്നവയാണിവ. പ്രഫഷണല്‍ വിജയം നേടുന്നതിലും ദേശീയ വികസന പ്രക്രിയയില്‍ പങ്കാളികളാകുന്നതിലും 20,000ത്തിലധികം ഇമാറാത്തി പുരുഷ-സ്ത്രീ പ്രതിഭകളെ പിന്തുണയ്ക്കുകയും പ്രോത്സാഹിപ്പിക്കുകയും ചെയ്യുന്ന സ്ഥാപനങ്ങളാണ് മേളയില്‍ പങ്കെടുക്കുന്നത്.
