സീതി ഹാജി മെമ്മോറിയല്‍ ഫുട്‌ബോള്‍ ടൂര്‍ണമെന്റ് നവംബര്‍ 9ന്
Wed, 05 Nov 2025
ജിസിസി രാജ്യങ്ങളിലെ വാര്‍ത്താ പ്രക്ഷേപണ മന്ത്രിമാരുടെ അടുത്ത സമ്മേളനം യുഎഇയില്‍
കുവൈത്ത് സിറ്റി: ഗള്‍ഫ് നാടുകളുടെ മൂല്യങ്ങള്‍ സംരക്ഷിക്കുന്നതിന് ജിസിസിയിലെ മാധ്യമങ്ങള്‍ മാനദണ്ഡങ്ങള്‍ പാലിക്കണമെന്ന് യുഎഇ ദേശീയ മാധ്യമ ഓഫീസ് ചെയര്‍മാനും മീഡിയ കൗണ്‍സില്‍ ചെയര്‍മാനുമായ അബ്ദുല്ല ബിന്‍ മുഹമ്മദ് ബിന്‍ ബുത്തി അല്‍ ഹമീദ് പറഞ്ഞു. കുവൈത്തില്‍ നടന്ന ഗള്‍ഫ് സഹകരണ കൗണ്‍സില്‍ (ജിസിസി) രാജ്യങ്ങളിലെ 28ാമത് വാര്‍ത്താ പ്രക്ഷേപണ മന്ത്രിമാരുടെ യോഗത്തില്‍ പങ്കെടുത്തു സംസാരിക്കുകയായിരുന്നു. ജിസിസി രാജ്യങ്ങള്‍ക്കിടയില്‍ മാധ്യമ സഹകരണം ശക്തിപ്പെടുത്തുന്നത് യുഎഇയുടെ മുന്‍ഗണനയാണെന്നും അദ്ദേഹം പറഞ്ഞു. ഓരോ രാജ്യങ്ങളും മാധ്യമ പ്രഫഷണലുകളെ നിയമിക്കുന്നത് അവരുടെ ഉത്തരവാദിത്തങ്ങളുടെയും ധാര്‍മിക മാനദണ്ഡങ്ങള്‍ പാലിക്കുന്നതിന്റെയും അടിസ്ഥാനത്തിലായിരിക്കണം. ഡിജിറ്റല്‍ പ്ലാറ്റ്‌ഫോമുകളുടെ ദുരുപയോഗത്തിനെതിരെയും അദ്ദേഹം മുന്നറിയിപ്പ് നല്‍കി. അധാര്‍മികമായ രീതികള്‍ മാധ്യമങ്ങളുടെ സമഗ്രതയെ ദുര്‍ബലപ്പെടുത്തുകയും പ്രേക്ഷകരെ തെറ്റിദ്ധരിപ്പിക്കുകയും ചെയ്യും. ഇത്തരം രീതികള്‍ ഉത്തരവാദിത്തമുള്ള മാധ്യമങ്ങളുടെ അടിസ്ഥാന മൂല്യങ്ങളെ ഇല്ലാതാക്കുകയും സാമൂഹിക പ്രശ്‌നങ്ങളെ പിന്തുണയ്ക്കുന്നതിലും സാംസ്‌കാരികവും ബൗദ്ധികവുമായ സുരക്ഷ പാലിക്കുന്നതിലും തടസപ്പെടുത്തുകയും ചെയ്യും. ഈ സാഹചര്യത്തില്‍ ജിസിസി രാജ്യങ്ങളിലുടനീളമുള്ള മാധ്യമ ഉള്ളടക്കത്തിന് ഏകീകൃത മാനദണ്ഡങ്ങള്‍ സ്ഥാപിക്കാന്‍ യുഎഇ നിര്‍ദേശിക്കുന്നുവെന്നും അദ്ദേഹം അഭിപ്രായപ്പെട്ടു. പ്രസിദ്ധീകരിക്കുന്നവയുടെ ഉള്ളടക്കങ്ങള്‍ ഗള്‍ഫ് മൂല്യങ്ങളുമായും അസ്തുത്വവുമായും യോജിക്കുന്നുണ്ടെന്ന് ഉറപ്പാക്കുന്നതിനും അവയ്ക്ക് വിരുദ്ധമായ ഉള്ളടക്കത്തിന്റെ വ്യാപനം തടയുന്നതിനും ആഗോള സോഷ്യല്‍ മീഡിയ പ്ലാറ്റ്‌ഫോമുകള്‍ക്ക് ഈ മാനദണ്ഡങ്ങള്‍ ബാധകമായിരിക്കണമെന്നും അദ്ദേഹം നിര്‍ദേശിച്ചു.
ഗള്‍ഫ് സമൂഹങ്ങളുടെ പ്രത്യേകതയെ പ്രതിഫലിപ്പിക്കുന്നതും അവയുടെ ആധികാരികതയെ ആഘോഷിക്കുന്നതുമായ ഉള്ളടക്കം നിര്‍മിക്കേണ്ടതിന്റെ പ്രാധാന്യം അല്‍ ഹമീദ് വ്യക്തമാക്കി. ഭാവി തലമുറകളില്‍ അഭിമാനവും സ്വത്വബോധവും വളര്‍ത്തുന്നതിന് ഗള്‍ഫ് ചരിത്രവും വൈവിധ്യവും പ്രതിഫലിപ്പിക്കുന്ന മാധ്യമ വിവരണം വികസിപ്പിക്കണമെന്നും തെറ്റായ ചരിത്രങ്ങള്‍ പ്രചരിപ്പിക്കുന്നതിനെതിരെ സാമൂഹിക പ്രതിരോധത്തിന് ഇവ അത്യാവശ്യമാണെന്നും അദ്ദേഹം കൂട്ടിച്ചേര്‍ത്തു. ഡിജിറ്റല്‍ പ്ലാറ്റ്‌ഫോമുകള്‍ വര്‍ധിച്ചുവരുന്ന ഇക്കാലത്ത് ‘മീഡിയ പ്രഫഷണലിന്റെ’ യഥാര്‍ത്ഥ പങ്ക് നിര്‍വചിക്കേണ്ടതിന്റെ ആവശ്യകതയും അദ്ദേഹം പങ്കുവച്ചു. കൃത്രിമ ബുദ്ധി,ഡിജിറ്റല്‍ ഉള്ളടക്ക നവീകരണം,പ്രേക്ഷകരുടെ പെരുമാറ്റം മാറ്റല്‍ എന്നിവയിലെ സംഭവവികാസങ്ങളുമായി പൊരുത്തപ്പെടേണ്ടതിന്റെ പ്രാധാന്യം അദ്ദേഹം എടുത്തുപറഞ്ഞു. ആഗോളതലത്തില്‍ സ്വാധീനം ചെലുത്തുന്ന സ്മാര്‍ട്ട് മാധ്യമ വ്യവസായത്തിന് നേതൃത്വം നല്‍കാന്‍ ആവശ്യമായ വിഭവങ്ങളും വൈദഗ്ധ്യവും ഗള്‍ഫ് മേഖലയ്ക്കുണ്ടെന്നും അദ്ദേഹം കൂട്ടിച്ചേര്‍ത്തു. അടുത്ത വര്‍ഷം യുഎഇ ആതിഥേയത്വം വഹിക്കുന്ന ജിസിസി മന്ത്രിമാരുടെ 29ാമത് സമ്മേളനത്തിലേക്ക് പ്രതിനിധികളെ ക്ഷണിച്ചാണ് അല്‍ ഹമീദ് പ്രസംഗം അവസാനിപ്പിച്ചത്. കുവൈറ്റില്‍ കാണുന്ന ഐക്യവും സഹകരണവും യുഎഇയിലും തുടരുമെന്ന് അദ്ദേഹം ആത്മവിശ്വാസം പ്രകടിപ്പിച്ചു.
യുഎഇയെ പ്രതിനിധീകരിച്ച് മീഡിയ കൗണ്‍സില്‍ സെക്രട്ടറി ജനറല്‍ മുഹമ്മദ് സഈദ് അല്‍ ഷെഹി,നാഷണല്‍ മീഡിയ ഓഫീസിലെ മീഡിയ ഓപ്പറേഷന്‍സ് സെക്ടറിന്റെ എക്‌സിക്യൂട്ടീവ് ഡയരക്ടര്‍ മുഹമ്മദ് അല്‍ദുഹൂരി,യുഎഇ മീഡിയ കൗണ്‍സിലിലെ മീഡിയ സ്ട്രാറ്റജി ആന്റ് പോളിസീസ് സെക്ടറിന്റെ എക്‌സിക്യൂട്ടീവ് ഡയരക്ടര്‍ മൈത അല്‍ സുവൈദി എന്നിവരും യോഗത്തില്‍ പങ്കെടുത്തു.
