സഊദിയില്‍ വാഹനപകടത്തില്‍ മലയാളി ഉള്‍പ്പെടെ 4 പേര്‍ മരിച്ചു
Thu, 21 Aug 2025
സാങ്കേതിക രംഗത്ത് വിദ്യാര്‍ഥി മുന്നേറ്റം ലക്ഷ്യം
ദുബൈ: എഐ വിദ്യാഭ്യാസ രംഗത്തെ പ്രമുഖ ആഗോള സംരംഭകരായ സൈബര്‍ സ്‌ക്വയറിന്റെ നേതൃത്വത്തില്‍ ദുബൈ സര്‍വകലാശാലയുമായി സഹകരിച്ച് അഞ്ചാമത് പ്രീമിയര്‍ സ്റ്റുഡന്റ് ടെക് എക്‌സ്‌പോ സംഘടിപ്പിച്ചു. ദുബൈ സര്‍വകലാശാലാ കാമ്പസില്‍ നടന്ന ഫെസ്റ്റില്‍ യുഎഇ,സഊദി അറേബ്യ,ഇന്ത്യ എന്നീ രാജ്യങ്ങളില്‍ നിന്നുള്ള വിദ്യാര്‍ഥികള്‍,അധ്യാപകര്‍,സ്‌കൂള്‍ ലീഡര്‍മാര്‍,രക്ഷിതാക്കള്‍ എന്നിവരുള്‍പ്പെടെ 800ലധികം പേര്‍ പങ്കെടുത്തു. സൈബര്‍ സ്‌ക്വയറിന്റെ നേതൃത്വത്തില്‍ നടക്കുന്ന ഇന്റര്‍നാഷണല്‍ ഡിജിറ്റല്‍ ഫെസ്റ്റ് ഏറ്റവും വലിയ വിദ്യാര്‍ഥി സാങ്കേതിക എക്‌സ്‌പോ എന്ന അംഗീകാരം നേടിക്കഴിഞ്ഞിട്ടുണ്ട്. കെജി മുതല്‍ 12ാം ക്ലാസ് വരെയുള്ള 330ലധികം വിദ്യാര്‍ഥികള്‍ ആര്‍ട്ടിഫിഷ്യല്‍ ഇന്റലിജന്‍സ്,റോബോട്ടിക്‌സ്,ഇന്റര്‍നെറ്റ് ഓഫ് തിങ്‌സ്,വെബ് മൊബൈല്‍ ആപ്ലിക്കേഷന്‍ ഡെവലപ്‌മെന്റ്,ആനിമേഷന്‍ എന്നിവയുള്‍പ്പെടെയുള്ള സാങ്കേതിക വിദ്യയുടെ പ്രധാന മേഖലകളില്‍ ദിശാബോധം നല്‍കുന്ന പ്രൊജക്ടുകള്‍ അവതരിപ്പിച്ചു.
ആഗോള സമൂഹത്തിന് മുമ്പില്‍ തങ്ങളുടെ കാഴ്ചപ്പാടും സാങ്കേതിക വൈദഗ്ധ്യവും പ്രദര്‍ശിപ്പിക്കുന്നതിന് പുതുതലമുറയിലെ പ്രതിഭകള്‍ക്ക് ലോകോത്തര നിലവാരമുള്ള വേദിയായിരുന്നു സൈബര്‍ സ്‌ക്വയര്‍. കുട്ടികളുടെ അറിയാനുള്ള ആഗ്രഹം വളര്‍ത്തുക,അവരെ ലക്ഷ്യബോധമുള്ളവരാക്കി മാറ്റുക എന്നിവയില്‍ സൈബര്‍ സ്‌ക്വയര്‍ പ്രതിജ്ഞാബദ്ധരാണെന്ന് സിഇഒ എന്‍പി ഹാരിസ് പറഞ്ഞു. ‘വിദ്യാര്‍ഥികള്‍ക്ക് അതിരുകള്‍ ഭേദിക്കാനും, വിമര്‍ശനാത്മകമായി ചിന്തിക്കാനും, പ്രശ്‌നങ്ങള്‍ക്കുള്ള പരിഹാരം കണ്ടെത്താനും പ്രചോദനം നല്‍കുന്ന ഇടമായി ഈ സാങ്കേതിക ഉത്സവവേദി പ്രവര്‍ത്തിക്കുന്നുവെന്നും അദ്ദേഹം കൂട്ടിച്ചേര്‍ത്തു. ദുബൈ സര്‍വകലാശാല പ്രസിഡന്റ് ഡോ.ഈസ മുഹമ്മദ് അല്‍ ബസ്തകി എക്‌സ്‌പോ ഉദ്ഘാടനം ചെയ്തു. ‘ഇത് വെറുമൊരു മത്സരം മാത്രമല്ല,ഭാവി നേതാക്കള്‍ക്കുള്ള സര്‍ഗാത്മക വിജ്ഞാനത്തിന്റെയും സാധ്യതയുടെയും ആഘോഷമാണെന്ന് ഡോ. അല്‍ ബസ്തകി അഭിപ്രായപ്പെട്ടു.
ദുബൈ സര്‍വകലാശാലയിലെ അസോസിയേറ്റ് പ്രൊഫസര്‍ ഡോ.അലവി കുഞ്ഞു പന്തക്കന്‍ സ്വാഗതം പറഞ്ഞു. മുബാഷിര്‍ തയ്യില്‍ (സീനിയര്‍ ആര്‍ക്കിടെക്ട് എഐ ആന്റ് അനലിറ്റിക്‌സ് കോഗ്‌നിസന്റ് യുകെ),ഡോ.നജീബ് മുഹമ്മദ് (ഡയരക്ടര്‍, അന്‍സാര്‍ ഇംഗ്ലീഷ് സ്‌കൂള്‍),സുമ പോള്‍ (അസീസി വിദ്യാനികേതന്‍ പബ്ലിക് സ്‌കൂള്‍ പ്രിന്‍സിപ്പല്‍) എന്നിവരുള്‍പ്പെടെയുള്ള വിദ്യാഭ്യാസ വിദഗ്ധരും വ്യവസായ പ്രഫഷണലുകളും പ്രഭാഷണം നടത്തി. അജ്മാന്‍ ഇന്റര്‍നാഷണല്‍ ഇന്ത്യന്‍ സ്‌കൂളിലെ വൈഗ പ്രവീണ്‍ നയന ടെക് ടോക്ക് വിഭാഗത്തില്‍ ഒന്നാം സ്ഥാനം നേടി. കോഴിക്കോട് സദ്ഭാവന വേള്‍ഡ് സ്‌കൂളിലെ സെയ്ദ് മുഹമ്മദ് എഐ/റോബോട്ടിക്‌സ് വിഭാഗത്തില്‍ മികച്ച വിജയം നേടി. റാസല്‍ഖൈമ ഗ്രേസ് വാലി ഇന്ത്യന്‍ സ്‌കൂളിലെ ഇന്ത്യന്‍ പബ്ലിക് സ്‌കൂള്‍,കോട്ടക്കലിലെ പീസ് പബ്ലിക് സ്‌കൂള്‍ എന്നിവിടങ്ങളില്‍ നിന്നുള്ള വിദ്യാര്‍ഥികളും വിവിധ വിഭാഗങ്ങളില്‍ ജേതാക്കളായി. സാങ്കേതിക വിദ്യയുടെ പ്രോത്സാഹനത്തിലും ഡിജിറ്റല്‍ പഠനത്തിലും മികവ് പുലര്‍ത്തുന്ന സ്‌കൂളുകളെയും അധ്യാപകരെയും സൈബര്‍ സ്‌ക്വയര്‍ ടെക് വിഷനറി അവാര്‍ഡ്,സ്‌കൂള്‍ ഓഫ് ടുമാറോ അവാര്‍ഡ്,കോഡിങ് ആന്റ് എഐ നാഷണല്‍ പയനിയര്‍ അവാര്‍ഡ് ഇന്ത്യ എന്നിവ നല്‍കി ആദരിച്ചു. ദുബൈ സര്‍വകലാശാലയുമായുള്ള തന്ത്രപരമായ പങ്കാളിത്തത്തിലൂടെയാണ് ഈ പരിപാടി നടത്തിയത്.
മേഖലയിലെ പ്രതിബദ്ധതയുള്ള സ്‌കൂളുകളുടെയും വിദ്യാഭ്യാസ വിദഗ്ധരുടെയും പിന്തുണയും ഫെസ്റ്റിനുണ്ടായിരുന്നു. വേള്‍ഡ് ഡിജിറ്റല്‍ ഫെസ്റ്റിന്റെ അടുത്ത പതിപ്പ് 2026ല്‍ യുഎസ്എയിലെ കേംബ്രിഡ്ജിലെ എംഐടിയില്‍ നടത്തുമെന്നും അതേവര്‍ഷം തന്നെ യുഎഇയില്‍ മറ്റൊരു രാജ്യാന്തര പരിപാടി സംഘടിപ്പിക്കുമെന്നും സൈബര്‍ സ്‌ക്വയര്‍ അറിയിച്ചു. രണ്ട് പരിപാടികളിലുമായി 1,000ത്തിലധികം വിദ്യാര്‍ഥികള്‍ പങ്കെടുക്കുമെന്നാണ് പ്രതീക്ഷയെന്നും അധികൃതര്‍ പറഞ്ഞു. ഈ വര്‍ഷത്തെ ഇന്റര്‍നാഷണല്‍ ഡിജിറ്റല്‍ ഫെസ്റ്റിനെക്കുറിച്ചുള്ള കൂടുതല്‍ വിവരങ്ങള്‍ക്ക് https://cybersquare.org/idfdubai 2025 എന്ന വെബ്‌സൈറ്റ് സന്ദര്‍ശിക്കാം.
