ദുബൈയില്‍ ഗതാഗത സംവിധാനം മെച്ചപ്പെടുത്തി ആര്‍ടിഎ; 16 പദ്ധതികള്‍
Mon, 18 Aug 2025
ദുബൈ: എമിറേറ്റില്‍ ഗതാഗതം സംവിധാനം മെച്ചപ്പെടുത്തുന്ന 16 പദ്ധതികള്‍ പ്രഖ്യാപിച്ച് ദുബൈ റോഡ്‌സ് ആന്‍ഡ് ട്രാന്‍സ്‌പോര്‍ട്ട് അതോറിറ്റി.
എമിറേറ്റിലുടനീളമുള്ള റെസിഡന്‍ഷ്യല്‍, വിദ്യാഭ്യാസ മേഖലകളും പ്രധാന ഗതാഗത ഇടനാഴികളും ഉള്‍പ്പെടുന്നതാണ് ഈ പദ്ധതികള്‍. ദുബൈയുടെ വളര്‍ച്ചക്ക് അനുസൃതമായി റോഡ് ശൃംഖലയുടെ കാര്യക്ഷമത വര്‍ദ്ധിപ്പിക്കുന്നതിനും ഗതാഗതം മെച്ചപ്പെടുത്തുന്നതിനും സ്മാര്‍ട്ട് മൊബിലിറ്റി സേവനങ്ങള്‍ വികസിപ്പിക്കുന്നതിനുമുള്ള ആര്‍ടിഎയുടെ ലക്ഷ്യത്തിന്റെ ഭാഗമാണ് ഈ പദ്ധതികള്‍. രണ്ട് പ്രധാന പദ്ധതികള്‍ തുറന്നുകൊണ്ട് ആര്‍ടിഎ ആഗസ്ത് മാസത്തില്‍ പദ്ധതി നടപ്പിലാക്കാന്‍ തുടങ്ങി. ആദ്യത്തേത് റെസിഡന്‍ഷ്യല്‍, വാണിജ്യ മേഖലകള്‍ തമ്മിലുള്ള ബന്ധിപ്പിക്കുന്ന സുപ്രധാന പദ്ധതിയായ ഉമ്മു സുഖീം സ്ട്രീറ്റ് വികസന പദ്ധതിക്കുള്ളിലെ ഒരു പുതിയ തുരങ്കമായിരുന്നു. രണ്ടാമത്തെ പദ്ധതി, പ്രവേശന, എക്‌സിറ്റ് സൗകര്യങ്ങള്‍ സുഗമമാക്കുന്നതിനും ചുറ്റുമുള്ള റോഡ് ശൃംഖലയുമായുള്ള ബന്ധം മെച്ചപ്പെടുത്തുന്നതിനുമായി അല്‍ അവീര്‍ 1ല്‍ ഒരു പുതിയ പ്രവേശന കവാടം തുറന്നു. ഇതേകാലയളവില്‍ ആര്‍ടിഎ മൂന്ന് പുതിയ ഗതാഗത മെച്ചപ്പെടുത്തല്‍ പദ്ധതികള്‍ നടപ്പാക്കി. അല്‍ സഫ പ്രദേശത്തെ സര്‍വീസ് റോഡിലെ അമേരിക്കന്‍ സ്‌കൂള്‍ ഓഫ് ദുബൈക്ക് സമീപമുള്ള മെച്ചപ്പെടുത്തലുകള്‍, അല്‍ സീദാഫ് സ്ട്രീറ്റിലെ ഗതാഗത സുരക്ഷ വര്‍ദ്ധിപ്പിക്കുന്നതിനുള്ള വികസന പ്രവര്‍ത്തനങ്ങള്‍, അല്‍ മനാമ സ്ട്രീറ്റില്‍ നിന്ന് അല്‍ മെയ്ദാന്‍ സ്ട്രീറ്റിലേക്കുള്ള വലതുവശത്തേക്ക് ഒരു പുതിയ ഫ്രീടേണ്‍ ലൈന്‍ നിര്‍മ്മാണം എന്നിവ ഇതില്‍ ഉള്‍പ്പെടുന്നു. വിദ്യാഭ്യാസ മേഖലകളിലെ ഗതാഗത അന്തരീക്ഷം മെച്ചപ്പെടുത്തുന്നതിന്റെ ഭാഗമായി അല്‍ ഗര്‍ഹൂദിലെ അല്‍ മവാകെബ് സ്‌കൂളിന് ചുറ്റുമുള്ള ഗതാഗത ക്രമീകരണങ്ങള്‍ ഉള്‍പ്പെടെയുള്ള മറ്റ് വികസന പ്രവര്‍ത്തനങ്ങളും ആര്‍ടിഎ നടത്തും. ജുമൈറയിലെ അല്‍ ബത്തീല്‍ സ്ട്രീറ്റില്‍ മറ്റ് മെച്ചപ്പെടുത്തലുകള്‍ നടപ്പിലാക്കും. അല്‍ മെയ്ദാന്‍ സ്ട്രീറ്റില്‍ നിന്ന് വരുന്നവര്‍ക്കായി അല്‍ ഹാദിഖ സ്ട്രീറ്റില്‍ യുടേണിനായി ഒരു അധിക ലൈന്‍ ചേര്‍ക്കും.
സ്‌കൂള്‍ തിരക്കേറിയ സമയങ്ങളില്‍ വാഹനങ്ങളുടെ ഒഴുക്ക് സുഗമമാക്കുന്നതിനും സ്‌കൂളിന്റെ പരിസരത്തെ തിരക്ക് കുറയ്ക്കുന്നതിനുമായി അല്‍ ബര്‍ഷ സൗത്തിലെ നോര്‍ഡ് ആംഗ്ലിയ ഇന്റര്‍നാഷണല്‍ സ്‌കൂളിനായുള്ള പുതിയ പാര്‍ക്കിംഗ് സ്ഥലങ്ങള്‍ നിര്‍മ്മിക്കുന്നതിനുള്ള ഒരു പദ്ധതി ആര്‍ടിഎ ആരംഭിക്കും. ആഗസ്ത് 24 ന്, ദുബൈ സിലിക്കണ്‍ ഒയാസിസിന്റെ പ്രവേശന കവാടത്തില്‍ ഒരു പുതിയ പാത കൂട്ടിച്ചേര്‍ക്കല്‍, അല്‍ ഖുസൈസിലെ ഗതാഗത മെച്ചപ്പെടുത്തലുകള്‍, ലൂത്ത പള്ളിക്ക് സമീപമുള്ള നാദ് അല്‍ ഹമര്‍ സ്ട്രീറ്റില്‍ അല്‍ റെബത്ത് സ്ട്രീറ്റിലേക്കുള്ള ഒരു അധിക പാത എന്നിവ ഉള്‍പ്പെടെ അഞ്ച് പദ്ധതികളുടെ ഒരു പാക്കേജ് ആര്‍ടിഎ നടപ്പിലാക്കാന്‍ തുടങ്ങും. ഔദ് അല്‍ മുതീനയിലെ സായിദ് വിദ്യാഭ്യാസ സമുച്ചയത്തിന് സമീപമുള്ള ഗതാഗത മെച്ചപ്പെടുത്തലുകള്‍, അല്‍ മിസ്ഹാറിലെ നോര്‍ത്ത് അമേരിക്കന്‍ ഇന്റര്‍നാഷണല്‍ സ്‌കൂളിന് സമീപമുള്ള അധിക ഗതാഗത പരിഷ്‌കാരങ്ങള്‍ എന്നിവയും ഇതില്‍ ഉള്‍പ്പെടുന്നു. അതേസമയം, നാസര്‍ ബിന്‍ ലൂത്ത മസ്ജിദിന് സമീപമുള്ള റാസ് അല്‍ ഖോര്‍ സ്ട്രീറ്റില്‍ നിന്ന് നാദ് അല്‍ ഹമര്‍ ഇന്റര്‍ചേഞ്ചിലേക്ക് വരുന്ന വാഹനങ്ങള്‍ക്കായി ആര്‍ടിഎ 850 മീറ്റര്‍ നീളമുള്ള പുതിയ പാത നടപ്പിലാക്കാന്‍ തുടങ്ങി. അല്‍ റബത്ത് സ്ട്രീറ്റില്‍ നിന്ന് ഇടത്തേക്ക് തിരിഞ്ഞ് നാദ് അല്‍ ഹമറിലേക്ക് വരുന്ന വാഹനങ്ങള്‍ക്ക് സൗകര്യമൊരുക്കുന്നതിനായി പുതിയ പാത വികസിപ്പിക്കുകയും ചെയ്യുന്നു.
