ഷാര്‍ജയില്‍ ഓട്ടോ വെയര്‍ഹൗസുകളില്‍ സുരക്ഷാ പരിശോധനകള്‍ ശക്തമാക്കുന്നു
Fri, 19 Sep 2025
ദുബൈ: ജീവനക്കാരില്‍ കായിക മനോഭാവവും ആരോഗ്യകരമായ ജീവിതശൈലിയുമൊരുക്കുന്നതിനായി ജി.ഡി.ആര്‍.എഫ്.എ ദുബൈ (ജനറല്‍ ഡയറക്ടറേറ്റ് ഓഫ് ഐഡന്റിറ്റി ആന്‍ഡ് ഫോറിനേഴ്‌സ് അഫയേഴ്‌സ്) ആദ്യമായി വെര്‍ച്വല്‍ സൈക്കിളിങ് റേസ് സംഘടിപ്പിച്ചു. വെര്‍ച്വല്‍ സൈക്ലിങ് പ്ലാറ്റ്‌ഫോമായ മൈഹൂഷുയുടെ സഹകരണത്തോടെയായിരുന്നു മത്സരം. ജനറല്‍ ഡയറക്ടറേറ്റിന്റെ മുഖ്യ കാര്യാലയത്തിലാണ് ആവേശകരമായ മത്സരങ്ങള്‍ നടന്നത്. മേധാവി ലഫ്. ജനറല്‍ മുഹമ്മദ് അഹ്മദ് അല്‍ മര്‍റി, ഉപമേധാവി മേജര്‍ ജനറല്‍ ഉബൈദ് മുഹൈര്‍ ബിന്‍ സുറൂര്‍ അടക്കമുള്ള ഉദ്യോഗസ്ഥര്‍ മത്സരങ്ങള്‍ കാണാന്‍ എത്തി. ജീവനക്കാരുടെ സജീവ പങ്കാളിത്തം ഉറപ്പുവരുത്തിയ ഈ കായികപരിപാടി, ആധുനിക സാങ്കേതികവിദ്യയും കായികവിനോദവും സമന്വയിപ്പിച്ച വേറിട്ട അനുഭവമായി. മത്സരാര്‍ത്ഥികള്‍ക്ക് വെര്‍ച്വല്‍ റിയാലിറ്റി വഴിയുള്ള സൈക്കിള്‍ റൈഡിംഗിലൂടെ ലോകത്തിന്റെ വിവിധ ഭാഗങ്ങളിലെ സൈക്ലിങ് ട്രാക്കുകളില്‍ സഞ്ചരിക്കുന്ന അനുഭവം ലഭിച്ചു. ശാരീരികക്ഷമത വര്‍ധിപ്പിക്കല്‍, സൗഹൃദപരമായ മത്സരാഭാവം വളര്‍ത്തല്‍, മാനസിക ഉല്ലാസം ഉറപ്പാക്കല്‍ എന്നിവയാണ് പരിപാടിയുടെ പ്രധാന ലക്ഷ്യങ്ങള്‍. ജീവനക്കാരുടെ ക്ഷേമവും ആരോഗ്യപരമായ അന്തരീക്ഷവും ഉറപ്പാക്കുന്നതിനായി ഇനിയും ഇത്തരം നൂതന പരിപാടികള്‍ സംഘടിപ്പിക്കുമെന്നും ജി.ഡി.ആര്‍.എഫ്.എ അധികൃതര്‍ വ്യക്തമാക്കി.
