പുതിയ ബുര്‍ജ് ഖലീഫ ഡിസൈന്‍ ചെയ്യാന്‍ അവസരം
Tue, 06 May 2025
അബുദാബി: വിസ പുതുക്കല്‍,താമസ സൗകര്യ വാഗ്ദാനം,പൊലീസ് അറിയിപ്പ്,തൊഴില്‍ വാഗ്ദാനം, ബാങ്ക് അപ്‌ഡേഷന്‍, യുഎഇ പാസ് തുടങ്ങി തട്ടിപ്പുകള്‍ പലവേഷത്തിലും രൂപത്തിലും നിങ്ങളെ തേടിയെത്താം. സൈബര്‍ തട്ടിപ്പുകള്‍ വരെ,സ്‌കാമര്‍മാര്‍ ഇപ്പോള്‍ പ്രത്യേക ജനസംഖ്യാ ശാസ്ത്രത്തിനും സമയക്രമത്തിനും അനുസൃതമായി അവരുടെ പദ്ധതികള്‍ തയാറാക്കുന്നുവെന്ന് വിദഗ്ധര്‍ മുന്നറിയിപ്പ് നല്‍കുന്നു. വിശ്വസനീയ ശബ്ദങ്ങളെ അനുകരിക്കാന്‍ കഴിയുന്ന എഐ അധിഷ്ഠിത ഡീപ്‌ഫേക്കുകള്‍ ഉള്‍പ്പെടെയുള്ള തട്ടിപ്പുകളുടെയും ഡിജിറ്റല്‍ തട്ടിപ്പിന്റെയും വര്‍ധിച്ചുവരുന്ന സങ്കീര്‍ണ്ണതയാണ് ഈ ആശങ്കാജനകമായ പ്രവണതയ്ക്ക് കാരണമെന്ന് വിദഗ്ധര്‍ പറയുന്നു. തട്ടിപ്പുകാര്‍ അത്യാധുനിക സാങ്കേതികവിദ്യ ചൂഷണം ചെയ്യുന്നു. സെന്‍സിറ്റീവ് ഡാറ്റ മോഷ്ടിക്കാന്‍ രൂപകല്‍പ്പന ചെയ്ത ക്ലോണ്‍ ചെയ്ത സര്‍ക്കാര്‍ പോര്‍ട്ടലുകളില്‍ നിന്നാണ് ഫിഷിങ്് ഇമെയിലുകള്‍ ഉത്ഭവിക്കുന്നത്. കൂടാതെ ഒറിജിലനെന്ന് തോന്നിപ്പിക്കുന്ന വെബ്‌സൈറ്റുകളും വ്യാജ സാക്ഷ്യ പത്രങ്ങളും തട്ടിപ്പിനായി ഉപയോഗിക്കുന്നു. ആഘോഷ കാലങ്ങളില്‍ വ്യാജ ചാരിറ്റി ഡ്രൈവുകള്‍ അല്ലെങ്കില്‍ സത്യമാകാന്‍ കഴിയാത്തത്ര നല്ല ഡീലുകള്‍ പോലുള്ള പദ്ധതികള്‍ ആവിഷ്‌കരിക്കുന്നു. ‘ഇരകളെ’ വഞ്ചനാപരമായ പിഴകളോ ബില്ലുകളോ അടയ്ക്കാന്‍ നിര്‍ബന്ധിക്കുന്നതിനായി അവര്‍ സര്‍ക്കാര്‍ സ്ഥാപനങ്ങളെയും ഇത്തിസലാത്ത് പോലുള്ള ടെലികോം ദാതാക്കളെയും അനുകരിക്കുന്നു.
ഉപഭോക്തൃ അവകാശ സംരക്ഷണ വകുപ്പിലെ ജീവനക്കാരെ അനുകരിക്കുന്നതില്‍ വിദഗ്ധരായ ക്രിമിനല്‍ സംഘത്തെ കഴിഞ്ഞ ദിവസം ദുബൈ പൊലീസ് അറസ്റ്റ് ചെയ്തിരുന്നു. തട്ടിപ്പില്‍ കുടുങ്ങിയാല്‍ നിമിഷങ്ങള്‍ക്കകം ബാങ്ക് വിവരങ്ങളില്‍ കയറി പണം തട്ടാനുള്ള സംവിധാനം ഇവര്‍ക്കുണ്ട്. പ്രവാസികള്‍ ഇക്കാര്യത്തില്‍ ജാഗ്രത കാണിക്കണമെന്നാണ് അധികൃതര്‍ മുന്നറിയിപ്പ് നല്‍കുന്നത്. പലകാര്യങ്ങള്‍ക്കും മുന്‍കൂര്‍ ഫീസ് ആവശ്യപ്പെടുന്നതിനോ തൊഴില്‍ വാഗ്ദാനങ്ങള്‍ നല്‍കുന്നതിനോ അവരെ ഇരയാക്കുന്നു. യുഎഇയിലെ ഏകദേശം പകുതി (49 ശതമാനം) ഉപഭോക്താക്കളും തട്ടിപ്പിന് ഇരയായിട്ടുണ്ടെന്നാണ് ഒരു പഠനം പറയുന്നത്.
15 ശതമാനം പേര്‍ ഒന്നിലധികം തവണ ഇരകളായിട്ടുണ്ട്. യുഎഇയിലെ സര്‍വേയില്‍ പങ്കെടുത്ത ഉപഭോക്താക്കളില്‍ 59 ശതമാനം പേര്‍ക്കും തട്ടിപ്പ് കണ്ടെത്താനുള്ള സ്വന്തം കഴിവില്‍ ഒരു പരിധിവരെ ആത്മവിശ്വാസമുണ്ടെങ്കിലും 92 ശതമാനം പേര്‍ തങ്ങളുടെ കുടുംബാംഗങ്ങളോ സുഹൃത്തുക്കളോ ഒരു തട്ടിപ്പിന് ഇരയാകുമെന്ന് ഭയപ്പെടുന്നു. ഉപഭോക്താക്കള്‍ അവരുടെ ബാങ്ക് അക്കൗണ്ടുകള്‍ സൂക്ഷ്മമായി നിരീക്ഷിക്കണം. അനധികൃത ഇടപാടുകള്‍ക്കായി ബാങ്ക്,ക്രെഡിറ്റ് കാര്‍ഡ് സ്റ്റേറ്റ്‌മെന്റുകള്‍ പതിവായി പരിശോധിക്കേണ്ടത് അനിവാര്യമാണ്. എന്തെങ്കിലും സംഭവിച്ചാല്‍ ഉടന്‍ റിപ്പോര്‍ട്ട് ചെയ്യണം.
