ലുലു ഗ്രൂപ്പ് ലോജിസ്റ്റിക്സ് മാനേജര് ദുബൈയില് നിര്യാതനായി
Thu, 05 Feb 2026
അബുദാബി: കാര്ഷിക-ഭക്ഷ്യസുരക്ഷാ രംഗത്ത് നിര്മിത ബുദ്ധി വിജയകരമായി നടപ്പാക്കി അബുദാബി. ഈ മേഖലയില് കൃത്രിമ ഇന്റലിജന്സ് മാനേജ്മെന്റ് സിസ്റ്റങ്ങള്ക്ക് ഐഎസ്ഒ സര്ട്ടിഫിക്കേഷന് ലഭിക്കുന്ന ആദ്യ സ്ഥാപനമായി അബുദാബി അഗ്രികള്ച്ചര് ആന്ഡ് ഫുഡ് സേഫ്റ്റി അതോറിറ്റിക്ക് അംഗീകാരം. ഒരു യുഎഇ സര്ക്കാര് സ്ഥാപനം ഈ നേട്ടം കൈവരിക്കുന്നത് ഇതാദ്യമായാണ്. അന്താരാഷ്ട്ര മാനദണ്ഡങ്ങളും മികച്ച രീതികളും വികസിപ്പിക്കുന്നതിലും സ്വീകരിക്കുന്നതിലും മികവ് പുലര്ത്തുന്ന രാജ്യമെന്ന നിലയില് യുഎഇയുടെ പങ്കിനെ ഈ സര്ട്ടിഫിക്കേഷന് ഉറപ്പിക്കുന്നു.
കൃഷി, ഭക്ഷ്യസുരക്ഷ എന്നിവയുള്പ്പെടെയുള്ള പ്രധാന മേഖലകളുടെ കാര്യക്ഷമത വര്ദ്ധിപ്പിക്കുന്നതിന് എഐ പ്രയോജനപ്പെടുത്താനുള്ള യുഎഇയുടെ ശ്രമങ്ങളിലെ മറ്റൊരു ചുവടുവയ്പ്പാണ് ഈ നേട്ടമെന്ന് കൃത്രിമ ഇന്റലിജന്സ്, ഡിജിറ്റല് സമ്പദ്വ്യവസ്ഥ, റിമോട്ട് വര്ക്ക് ആപ്ലിക്കേഷനുകള് എന്നിവയുടെ സഹമന്ത്രി ഒമര് സുല്ത്താന് അല് ഒലാമ പറഞ്ഞു. ഡിജിറ്റല് പരിവര്ത്തനത്തിനും ഭക്ഷ്യസുരക്ഷയ്ക്കും അഡാഫ്സ നല്കിയ സംഭാവനയെ അദ്ദേഹം അഭിനന്ദിച്ചു. കൃത്രിമ ബുദ്ധി പ്രയോജനപ്പെടുത്തുന്നതില് അബുദാബിയുടെ ദര്ശനവുമായും യുഎഇയുടെ എഐ സ്ട്രാറ്റജിയുമായും ഈ സര്ട്ടിഫിക്കേഷന് യോജിക്കുന്നുവെന്ന് അഡാഫ്സ ആക്ടിംഗ് ഡയറക്ടര് ജനറല് ഡോ. താരിഖ് അല് അമേരി അഭിപ്രായപ്പെട്ടു.
എഐ നടപ്പാക്കുന്നതോടെ കാര്ഷിക മേഖലയില് ചെലവുകളും അപകടസാധ്യതകളും കുറയ്ക്കുന്നതിനൊപ്പം ഉല്പ്പാദനക്ഷമതയും കാര്യക്ഷമതയും വര്ദ്ധിപ്പിക്കുന്നു. സെന്സറുകളില് നിന്നും ഡ്രോണുകളില് നിന്നുമുള്ള ഡാറ്റ ഉപയോഗിച്ച്, വിളകള്ക്ക് ആവശ്യമായ വെള്ളം, വളങ്ങള്, കീടനാശിനികള് എന്നിവയുടെ കൃത്യമായ അളവ് എഐ നിര്ണ്ണയിക്കുന്നു. ഇത് മാലിന്യം കുറക്കാനും ഉല്പാദനക്ഷമത വര്ദ്ധിപ്പിക്കാനും സാധ്യമാകും. വിളയുടെ തരം, മണ്ണിന്റെ അവസ്ഥ, കാലാവസ്ഥ എന്നിവ കണക്കിലെടുത്ത് നിര്ദ്ദിഷ്ട കാര്ഷിക മേഖലകള്ക്കുള്ള അനുസൃതമായ ജല ആവശ്യകതകള് കണക്കാക്കാനും സ്മാര്ട്ട് ജലസേചന സംവിധാനങ്ങള് നടപ്പാക്കാനും കഴിയുന്നു. എഐ ഉപയോഗിച്ച് കാലാവസ്ഥാ പ്രതിരോധശേഷിയുള്ള നെല്ല് ഇനങ്ങള് വികസിപ്പിക്കാന് കഴിയും. വിശദമായ മണ്ണ് ഡാറ്റ നല്കുക, കീടനാശിനികളുടെയും വളങ്ങളുടെയും കൃത്യമായ പ്രയോഗത്തിനായി ഡ്രോണുകളെ ഉപയോഗിക്കുക,
വിളകളെ തരംതിരിച്ച് പരിശോധിക്കാന് എഐ സഹായിക്കും. എഐ അല്ഗോരിതങ്ങളിലൂടെ കീടങ്ങളെയും രോഗങ്ങളെയും നേരത്തെ തിരിച്ചറിയാനും ഇത് വിള നാശനഷ്ടങ്ങള് കുറയ്ക്കുന്നതിന് സമയബന്ധിതമായ ഇടപെടലുകള് നടത്താനും കഴിയും. സെന്സറുകള് കന്നുകാലികളുടെ ആരോഗ്യം ട്രാക്ക് ചെയ്യുന്നു, രോഗത്തിന്റെ പ്രാരംഭ ലക്ഷണങ്ങള് കണ്ടെത്താനും പ്രതിരോധ നടപടികള് സ്വീകരിക്കാനും കര്ഷകരെ സഹായിക്കുന്നു. എഐയില് പ്രവര്ത്തിക്കുന്ന സ്പ്രേയറുകള് ആവശ്യമുള്ളിടത്ത് മാത്രം കീടനാശിനികള് പ്രയോഗിക്കാന് സഹായിക്കും. രാസവളങ്ങളുടെ അമിത ഉപയോഗം കുറയ്ക്കുന്നു. റോബോട്ടുകള് വയലുകളില് നിന്ന് കളകളെ തിരിച്ചറിഞ്ഞ് നീക്കം ചെയ്യുന്നു. ഇത്തരത്തില് കാര്ഷിക മേഖലയിലും ഭക്ഷ്യസുരക്ഷാ രംഗത്തും എഐ സാങ്കേതിക ക്രിയാത്മകമായി ഉപയോഗിക്കാനുള്ള സംവിധാനങ്ങളാണ് അബുദാബി നടപ്പാക്കുന്നത്.
