പശ്ചിമേഷ്യയിലെ സംഘര്‍ഷം അവസാനിപ്പിക്കണം: യുഎഇ
Wed, 18 Jun 2025
യുഎഇ ലോകത്ത് മാതൃകകള്‍ കെട്ടിപ്പടുക്കുന്ന രാഷ്ട്രം: ശൈഖ് മുഹമ്മദ് ബിന്‍ റാഷിദ് അല്‍ മക്തൂം
ദുബൈ: പൊതുജന സേവനങ്ങള്‍ക്കായി ലോകത്ത് മുന്‍നിര മാതൃകകള്‍ കെട്ടിപ്പടുക്കുന്ന രാഷ്ട്രമാണ് യുഎഇയെന്ന് വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിന്‍ റാഷിദ് അല്‍ മക്തൂം പറഞ്ഞു. പൗരന്മാരുടെ ജീവിതം ലളിതമാക്കാനും കൂടുതല്‍ മെച്ചപ്പെടുത്താനും വ്യത്യസ്തമായ സേവന പദ്ധതികളാണ് രാജ്യത്ത് പ്രസിഡന്റ് ശൈഖ് മുഹമ്മദ് ബിന്‍ സായിദ് അല്‍ നഹ്യാന്റെ നേതൃത്വത്തില്‍ നടപ്പാക്കിയിട്ടുള്ളതെന്നും അദ്ദേഹം വ്യക്തമാക്കി.
ദുബൈയില്‍ സീറോ ഗവണ്‍മെന്റ് പ്രോഗ്രാമിന്റെ രണ്ടാംഘട്ടം ഉദ്ഘാടനം ചെയ്ത് സംസാരിക്കുകയായിരുന്നു ശൈഖ് മുഹമ്മദ് ബിന്‍ റാഷിദ്. കാര്യക്ഷമത, ഗുണനിലവാരം,സ്വാധീനം എന്നിവയ്ക്ക് മുന്‍ഗണന നല്‍കുന്നതാണ് യുഎഇ നടപ്പാക്കിയ മാതൃകാ പദ്ധതികള്‍. മികച്ച രീതികള്‍ സമന്വയിപ്പിച്ച്,വൈദഗ്ധ്യവും സാങ്കേതിക വിദ്യയും പ്രയോജനപ്പെടുത്തിയാണ് യുഎഇ സര്‍ക്കാര്‍ ഇവ യാഥാര്‍ത്ഥ്യമാക്കിയത്. കുറഞ്ഞ പരിശ്രമത്തോടെയും പരമാവധി സ്വാധീനത്തോടെയും ജനങ്ങളുടെ ആവശ്യങ്ങള്‍ നിറവേറ്റുന്ന കാര്യക്ഷമമായ സേവനങ്ങള്‍ നല്‍കാനാണ് ഇതിലൂടെ സര്‍ക്കാര്‍ ശ്രമിക്കുന്നത്. സീറോ ഗവണ്‍മെന്റ് ബ്യൂറോക്രസി പ്രോഗ്രാമിന്റെ രണ്ടാം ഘട്ടം ആരംഭിച്ചിരിക്കുകയാണ്.
ഇത് ലളിതവും വേഗതയേറിയതും കൂടുതല്‍ സ്വാധീനം ചെലുത്തുന്നതുമായ സര്‍ക്കാര്‍ സേവനങ്ങള്‍ സൃഷ്ടിക്കുന്നതിനായി രൂപകല്‍പ്പന ചെയ്ത ദേശീയ പദ്ധതിയാണ്. ഈ പ്രോഗ്രാമിന്റെ ആദ്യ ഘട്ടത്തില്‍ സേവന വിതരണ സമയം 70%ത്തിലധികം കുറച്ചിട്ടുണ്ട്. 4,000ത്തിലധികം അനാവശ്യ നടപടിക്രമങ്ങള്‍ ഇല്ലാതാക്കി. 12 ദശലക്ഷം മണിക്കൂറിലധികം ഉപഭോക്താക്കള്‍ സമയലാഭം ലഭിച്ചുവെന്നും ശൈഖ് മുഹമ്മദ് ബിന്‍ റാഷിദ് അല്‍ മക്തൂം പറഞ്ഞു.
‘സര്‍ക്കാര്‍ നടപടിക്രമങ്ങള്‍ കാര്യക്ഷമമാക്കുന്നതില്‍ ഏര്‍പ്പെട്ടിരിക്കുന്ന 30ലധികം സര്‍ക്കാര്‍ സ്ഥാപനങ്ങള്‍ക്കും 690 ടീമുകള്‍ക്കും നന്ദിപറയുന്നു. ഇന്ന് ഈ ശ്രമങ്ങള്‍ ഒന്നുകൂടി വിപുലപ്പെടുത്തുകയാണ്. സങ്കീര്‍ണതയില്ലാത്ത ഒരു സര്‍ക്കാര്‍,കാത്തിരിപ്പ് സമയമില്ലാത്ത സേവനങ്ങള്‍,ജനങ്ങളുടെ ജീവിതം വ്യക്തമായി മെച്ചപ്പെടുത്തുന്ന ഫലങ്ങള്‍ എന്നിവ തങ്ങളുടെ ലക്ഷ്യം സാക്ഷാത്കരിക്കുന്നതിന് ഡിജിറ്റല്‍ ബ്യൂറോക്രസി ഇല്ലാതാക്കുന്നതില്‍ ശ്രദ്ധ കേന്ദ്രീകരിക്കുന്നുവെന്നും അദ്ദേഹം കൂട്ടിച്ചേര്‍ത്തു.
ഉദ്ഘാടന ചടങ്ങില്‍ 200ലധികം മന്ത്രിമാര്‍,ഡെപ്യൂട്ടി മന്ത്രിമാര്‍,ഫെഡറല്‍ സ്ഥാപനങ്ങളുടെ ഡയറക്ടര്‍ ജനറല്‍മാര്‍ എന്നിവര്‍ പങ്കെടുത്തു. എല്ലാ മന്ത്രാലയങ്ങളുടെയും സര്‍ക്കാര്‍ സ്ഥാപനങ്ങളുടെയും ശ്രമങ്ങളെ ഏകീകരിക്കുന്ന, സീറോ ബ്യൂറോക്രസി പദ്ധതികള്‍ക്കും സംരംഭങ്ങള്‍ക്കുമുള്ള സമഗ്രമായ ഒരു ദേശീയ ചട്ടക്കൂടായാണ് ഇത് പ്രവര്‍ത്തിക്കുന്നത്. സേവന വിതരണത്തില്‍ യുഎഇ സര്‍ക്കാരിനെ ലോകത്ത് ഒന്നാം സ്ഥാനത്ത് എത്തിക്കുകയും സീറോ ബ്യൂറോക്രസി കൈവരിക്കുകയും ചെയ്യുക എന്നതാണ് പ്രോഗ്രാമിന്റെ പ്രധാന ലക്ഷ്യം.
