ഗസ്സക്ക് കൈതാങ്ങായി യുഎഇ; 1.5 ബില്യന്‍ ഡോളര്‍ സഹായം
Fri, 01 Aug 2025
ദുബൈ: സിനിമാ ജീവിതത്തില്‍ വഴിത്തിരിവുണ്ടാക്കിയ ഭാഗ്യനഗരമാണ് ദുബൈ എന്ന് നടന്‍ അര്‍ജുന്‍ അശോകന്‍. നേരത്തെ സിനിമയില്‍ വലിയ റോളുകളൊന്നുമില്ലാത്ത സാഹചര്യത്തില്‍ ഒരു ബ്രേയ്‌ക്കെടുത്ത് കുടുംബത്തോടൊപ്പം ദുബൈയില്‍ വന്നപ്പോഴാണ് രോമാഞ്ചം എന്ന ചിത്രത്തിലേയ്ക്ക് നടന്‍ സൗബിന്‍ ഷാഹിറിന്റെ ക്ഷണം ലഭിച്ചത്. ആ ചിത്രത്തിലെ കഥാപാത്രം സിനിമാ ജീവിതത്തെ മാറ്റിമറിച്ചു. പിന്നീട് ഭാഗ്യം വിടാതെ പിന്തുടരുന്നുണ്ട്. കഴിഞ്ഞദിവസം ഇവിടെയെത്തിയത് നാട്ടില്‍ വലിയൊരു പ്രൊജക്ടിന്റെ കാര്യം ചര്‍ച്ച ചെയ്ത ശേഷമാണ്. ഇന്നലെ അവര്‍ വിളിച്ച് ഓക്കെ പറഞ്ഞു. ഇക്കാര്യം അച്ഛനോട് പറഞ്ഞപ്പോള്‍ എന്നാല്‍, നീ ഇടയ്ക്കിടെ പോയിട്ട് വാ എന്നായിരുന്നു മറുപടിയെന്നും അദ്ദേഹം പറഞ്ഞു. വിഷ്ണു ശങ്കര്‍ സംവിധാനം ചെയ്ത തന്റെ പുതിയ ചിത്രമായ സുനിതാ വളവിന്റെ പ്രമോഷനുമായി ബന്ധപ്പെട്ട് ദുബൈയില്‍ വാര്‍ത്താ സമ്മേളനത്തില്‍ സംസാരിക്കുകയായിരുന്നു അദ്ദേഹം.
സുമതി വളവ് പേടിത്തൊണ്ടന്മാരായ നാട്ടുകാരുടെ കഥയാണ്. നേരമിരുട്ടിയാല്‍ ആരും പുറത്തിറങ്ങുകയോ ആ വളവ് കടക്കുകയോ ഇല്ല. അവിടുത്തെ മണിച്ചിത്രത്താഴ് പുറത്തിറങ്ങിപ്പോള്‍ ഹിറ്റാകാത്ത കേരളത്തിലെ ഏക ഗ്രാമം. ഏറ്റവും പേടിത്തൊണ്ടനായ അപ്പുവിനെയാണ് ഞാന്‍ അവതരിപ്പിക്കുന്നത്. ജീവിതത്തിലും ഞാന്‍ പേടിത്തൊണ്ടനായതുകൊണ്ട് കഥാപാത്രം പെട്ടെന്ന് ഉള്‍ക്കൊള്ളാനായി. സാങ്കേതിക വിദ്യ ഒട്ടും വികസിക്കാത്ത കാലത്ത് നടക്കുന്ന കഥയാണിത്. ആ നാടിനെ പുതിയ സാങ്കേതിക വിദ്യയിലൂടെ പുനഃസൃഷ്ടിച്ച് പഴയ സിനിമയുടെ സ്വഭാവം കൊടുത്തതാണ് സുമതി വളവില്‍ സംവിധായകന്‍ കാണിച്ചിരിക്കുന്ന മിടുക്ക്. ചിത്രത്തെക്കുറിച്ച് ചര്‍ച്ച ചെയ്തപ്പോള്‍ എനിക്കേറ്റവും ഇഷ്ടപ്പെട്ടത് ഈ ഡയറക്ടേഴ്‌സ് ബ്രില്യന്‍സാണ്. പരസ്പരമുള്ള വിശ്വാസമാണ് ചിത്രത്തെ മികച്ചതാക്കി മാറ്റിയത്. രോമാഞ്ചത്തിലെ അനാമിക ആദ്യം ഭാഗ്യമായി. പിന്നീട് ഭ്രമയുഗത്തില്‍ ചാത്തനും തുടര്‍ന്ന് ഇപ്പോള്‍ സുമതിയും വന്നു. ഇനി ഏതൊക്കെ യക്ഷികളാണ് ബാക്കിയുള്ളതാണെന്ന് അറിയില്ല. ഇങ്ങനെ പോയാല്‍ സിനിമാ ജീവിതം എന്താകുമെന്ന് തമ്പുരാന് മാത്രമേ അറിയൂ. നല്ല കഥാപാത്രങ്ങളും നല്ല കഥയുമാണെങ്കില്‍ മറ്റൊന്നും നോക്കാതെ അഭിനയിക്കുമെന്നും അര്‍ജുന്‍ പറഞ്ഞു.
സംവിധായകന്‍ വിഷ്ണു ശശി ശങ്കര്‍, തിരക്കഥാകൃത്ത് അഭിലാഷ് പിള്ള, ചിത്രത്തിലെ മറ്റു നടീനടന്മാരായ ബാലു വര്‍ഗീസ്, ഗോപികാ അനില്‍, ശ്രാവണ്‍ മുകേഷ് എന്നിവരും വാര്‍ത്താ സമ്മേളനത്തില്‍ പങ്കെടുത്തു. തുടര്‍ന്ന് ചിത്രത്തിന്റെ പ്രിമിയര്‍ ഷോയും അരങ്ങേറി. അത്യന്തം ത്രില്ലടിപ്പിക്കുന്ന പ്രേതകഥയാണ് സുമതി വളവെന്നാണ് കണ്ടവരുടെ അഭിപ്രായം. വാട്ടര്‍മാന്‍ ഫിലിംസ്, ഗോകുലം മൂവീസ് എന്നിവയുടെ ബാനറില്‍ യഥാക്രമം മുരളി കുന്നുംപുറത്ത്, ഗോകുലം ഗോപാലന്‍ എന്നിവര്‍ ചേര്‍ന്ന് നിര്‍മിച്ച സുമതി വളവ് കേരളത്തിലും ഗള്‍ഫിലുമടക്കം വിവിധ കേന്ദ്രങ്ങളില്‍ റിലീസ് ചെയ്യും.
