മൃതദേഹം നാട്ടിലെത്തിക്കാന്‍ ബന്ധപ്പെടേണ്ടത് ഇന്ത്യന്‍ കോണ്‍സുലേറ്റ് അംഗീകൃത സംഘടനകളെ മാത്രം
Fri, 22 Aug 2025
യുഎഇ ജുമുഅ ഖുതുബ മലയാള പരിഭാഷ
ഇക്കാലത്ത് ആണ്‍-പെണ്‍ ലിംഗഭേദമന്യെ യുവത നാടിനും സമൂഹത്തിനുമായി സേവന സന്നദ്ധരായി മുന്നോട്ടുവരുന്നത് ഏറെ ആശാവഹമാണ്. രാജ്യസേവനം എന്നത് സത്യവിശ്വാസത്തിന്റെയും സല്‍സ്വഭാവ മഹിമയുടെയും മനക്കരുത്തിന്റെയും ഉത്തരവാദിത്വ ബോധത്തിന്റെയും നിദര്‍ശനമാണ്. ധീരതയുടെയും പൗരുഷത്തിന്റെയും ഉത്തമ ശിക്ഷണത്തിന്റെയും സ്വഭാവ സ്വാംശീകരണത്തിന്റെയും ഉയര്‍ന്ന അടയാളം കൂടിയാണത്. മനുഷ്യന് നല്‍കപ്പെട്ടതില്‍വച്ച് ഏറ്റവും ഉത്തമമായത് ഏതെന്ന് ചോദിച്ചയാളോട് സല്‍സ്വഭാവമെന്നാണ് നബി (സ്വ) മറുപടി നല്‍കിയത്.
സാമൂഹിക സേവനത്തിലൂടെ വ്യക്തിത്വ രൂപീകരണവും വിശ്വാസ്യതയും നിശ്ചയദാര്‍ഢ്യവും നേതൃപാടവവുമുണ്ടാകുന്നു. സാമൂഹിക സേവകന്‍ നന്നായി ചിന്തിക്കുകയും സമയങ്ങളില്‍ കൃത്യനിഷ്ഠത പാലിക്കുകയും നമസ്‌കാരങ്ങള്‍ മുറപോലെ നിര്‍വഹിക്കുകയും ചെയ്യുന്നു. സാമൂഹിക സേവകന്റെ ഒരു ദിവസം സുബ്ഹ് നമസ്‌കാരത്തിലൂടെ തുടങ്ങുന്നു. ഉറക്കിനേക്കാള്‍ നമസ്‌കാരമാണ് ഏറ്റവും ഉത്തമമെന്നാണല്ലൊ സുബ്ഹി ബാങ്കിലെ ആഹ്വാനം. ജമാഅത്തായാണ് സുബ്ഹ് നമസ്‌കരിക്കുക. അങ്ങനെ പ്രഭാത നമസ്‌കാരം നിര്‍വഹിച്ചവന്റെ കാര്യം അല്ലാഹു ഏറ്റെടുക്കുമെന്നാണ് നബി (സ്വ) പറഞ്ഞിരിക്കുന്നത്. പ്രഭാത നമസ്‌കാരത്തിലെ ഖുര്‍ആന്‍ പാരായണം മാലാഖമാരാല്‍ സാക്ഷ്യം വഹിക്കപ്പെടുമെന്ന് അല്ലാഹുവും പറഞ്ഞിട്ടുണ്ട് (സൂറത്തുല്‍ ഇസ്‌റാഅ് 78). പിന്നെ ഒത്തൊരുമയോട് സേവന നിരതരാവുന്നു. ഖുര്‍ആനില്‍ പറയപ്പെട്ടത് പോലെ ദൃഢീകൃതമായ കെട്ടിടം പോലെയായിരിക്കും അവര്‍. സന്നദ്ധ സേവനത്തിന് നിരവധി സാമൂഹിക ഉപകാരങ്ങളുണ്ട്. അവയില്‍ പ്രധാനമാണ് ഐക്യബോധം. അവര്‍ ഒരൊറ്റ സംഘമായി,ഒരു കെട്ടിടത്തിലെ ഓരോ ഭാഗമെന്ന പോലെ ഉത്തരവാദിത്വ ബോധത്തോടെ ഉപകാര പ്രവര്‍ത്തനങ്ങളില്‍ മുഴുകും. അവര്‍ വിശ്വാസത്തിനും നാടിനും നാടിന്റെ സംവിധാനങ്ങള്‍ക്കും കാവല്‍ നില്‍ക്കും.
സാമൂഹിക സേവനം സ്വന്തം സ്വഭാവങ്ങള്‍ക്കും ചിന്തകള്‍ക്കും നൈപുണ്യങ്ങള്‍ക്കും ശരീരാരോഗ്യത്തിനും ഊര്‍ജം പകരാനുള്ള മാര്‍ഗം കൂടിയാണ്. ബലഹീനനായ സത്യവിശ്വാസിയേക്കാള്‍ ബലവാനായ സത്യവിശ്വാസിയാണ് ഉത്തമനും അല്ലാഹുവിന് ഏറ്റവും ഇഷ്ടപ്പെട്ടവനുമെന്നാണ് നബി (സ്വ) പറഞ്ഞത്. യുവാക്കള്‍ അവരുടെ വിലപ്പെട്ട സമയങ്ങള്‍ സാമൂഹിക,രാജ്യസേവനങ്ങളിലൂടെ ഉപകാരപ്രദമാക്കണം. അതിലൂടെ പുതിയ അറിവുകളും അനുഭവങ്ങളും നേടണം. ആരാധനകള്‍ സമയനിഷ്ഠയോടെ ചെയ്തുതീര്‍ക്കണം. ഉത്തമ അനുഷ്ഠാനങ്ങളും പാരമ്പര്യങ്ങളും നിലനിര്‍ത്തണം.
മക്കള്‍ സാമൂഹിക സേവനസന്നദ്ധരാവുന്നത് പ്രശംസനീയമാണ്. കണ്ണിന്റെ കുളിര്‍മകളായ,കരളിന്റെ കഷ്ണങ്ങളായ മക്കള്‍ക്ക് സാമൂഹിക സേവനം നല്ല പാഠങ്ങള്‍ നല്‍കും. അവരില്‍ മൂല്യങ്ങള്‍ വളര്‍ത്തും. സാമൂഹിക സേവനം നിങ്ങളുടെ ജീവിതത്തിലെ ഏറ്റവും നല്ല മുതല്‍ക്കൂട്ടായിരിക്കും. സ്വന്തത്തെ വിചാരണ ചെയ്യുന്നതും നിരീക്ഷിക്കുന്നതും നല്ലതാണ്. അതിനുള്ള അവസരങ്ങളാണ് കുടുംബത്തില്‍ നിന്നും കൂട്ടുകാരില്‍ നിന്നും വിട്ടുനിന്നുകൊണ്ട് സേവനസന്നദ്ധരാവുന്നതിലൂടെ കരഗതമാവുന്നത്. അങ്ങനെ സ്വകുടുംബത്തോടും സമൂഹത്തോടും സല്‍ഗുണരായി വര്‍ത്തിക്കണം.
