യുഎഇ, സഊദി അടക്കമുള്ള രാജ്യങ്ങളില് ഈദുല്ഫിത്വര് വെള്ളിയാഴ്ച
Fri, 20 Mar 2026
ജിദ്ദ: ഉംറ തീര്ത്ഥാടന വിസയും നിബന്ധനകളും കര്ശനമാക്കി സഊദി അറേബ്യ. ടൂറിസ്റ്റ് വിസയില് ഉംറ ചെയ്യാന് കഴിയില്ല. അതിന് ശ്രമിക്കുന്നവരെ അധികൃതര് തടയും. മദീനയിലെ റിയാസ് ഉല് ജന്നയിലേക്കുള്ള പ്രവേശനം നിഷേധിക്കുകയും ചെയ്യും. ഉംറ യാത്ര ആസൂത്രണം ചെയ്യുമ്പോള് പ്രധാനപ്പെട്ട പത്ത് നിബന്ധനകള് ഓപ്പറേറ്റര്മാര് വ്യക്തമാക്കിയിട്ടുണ്ട്. വിസക്ക് അപേക്ഷിക്കുമ്പോള് തീര്ത്ഥാടകര് നിര്ബന്ധമായും ഹോട്ടല് ബുക്ക് ചെയ്തിരിക്കണം. മാസാര് സിസ്റ്റം വഴി അംഗീകൃത ഹോട്ടല് തിരഞ്ഞെടുക്കണം, ഇത് നുസുക് ആപ്പുമായി ബന്ധിപ്പിച്ചിരിക്കുന്നു. അല്ലെങ്കില് സഊദി അറേബ്യയിലെ ബന്ധുക്കളോടൊപ്പം താമസിക്കുമെന്ന് രേഖകള് സഹിതം അപേക്ഷിക്കണം. മാത്രമല്ല ടാക്സികള് പോലും പോര്ട്ടല് വഴി ബുക്ക് ചെയ്യണം. ഉംറക്ക് വേണ്ടി ടൂറിസ്റ്റ് വിസകളില്ല. എപ്പോള് വേണമെങ്കിലും തടഞ്ഞേക്കാം. എല്ലാ തീര്ത്ഥാടകരും നുസുക് പ്ലാറ്റ്ഫോം വഴി ഇ-വിസയായോ അംഗീകൃത ഓപ്പറേറ്റര്മാര് വഴി ഒരു പാക്കേജ് ബുക്ക് ചെയ്തോ ഉംറ വിസക്ക് അപേക്ഷിക്കണം. യാത്രാ പദ്ധതി മുന്കൂട്ടി അപ്ലോഡ് ചെയ്യണം. കൂടുതല് സമയം താമസിക്കുന്നത് പിഴകള്ക്ക് കാരണമാകും. മടക്കയാത്ര മാറ്റിവച്ചാല്, ഏജന്റുമാര്ക്ക് ഒരാള്ക്ക് 750 സഊദി റിയാല് മുതല് പിഴ ചുമത്തും. യുകെ, യുഎസ്, കാനഡ, ഷെഞ്ചന് രാജ്യങ്ങളില് നിന്നുള്ള വിസയുള്ള യാത്രക്കാര്ക്കോ അവിടുത്തെ താമസക്കാര്ക്കോ വിസ ഓണ് അറൈവല് ലഭിക്കും. വിമാനത്താവളത്തില് തന്നെ താമസം, ഗതാഗതം, മടക്ക ബുക്കിംഗുകള് എന്നിവ പരിശോധിക്കും. തീര്ത്ഥാടകര് രജിസ്റ്റര് ചെയ്ത ടാക്സികളോ നുസുക് ആപ്പ് വഴി ക്രമീകരിച്ച ട്രെയിനുകളോ ഉപയോഗിക്കണം അല്ലെങ്കില് മുന്കൂട്ടി ഗതാഗതം ബുക്ക് ചെയ്യണം. വിമാനത്താവളത്തില് നിന്ന് ടാക്സി എടുക്കാന് കഴിയില്ല. ഹറമൈന് എക്സ്പ്രസ് ട്രെയിന് ഒരു പ്രധാന ഗതാഗത ഓപ്ഷനാണ്, പക്ഷേ അത് രാത്രി 9 മണി വരെ മാത്രമേ പ്രവര്ത്തിക്കൂ. ലംഘനങ്ങള്ക്ക് കനത്ത പിഴ ചുമത്തും. ടൂര് ഓപ്പറേറ്റര്മാരെ ഉദ്ധരിച്ച് ഖലീജ് ടൈംസാണ് ഇക്കാര്യങ്ങള് റിപ്പോര്ട്ട് ചെയ്തത്.
