സഊദിയില്‍ വാഹനപകടത്തില്‍ മലയാളി ഉള്‍പ്പെടെ 4 പേര്‍ മരിച്ചു
Wed, 20 Aug 2025
'നിങ്ങള്‍ക്കായി ഞങ്ങള്‍ ഇവിടെയുണ്ട്' എന്ന പ്രമേയത്തിലാണ് കാമ്പയിന്‍
ദുബൈ: ജനറല്‍ ഡയരക്ടറേറ്റ് ഓഫ് ഐഡന്റിറ്റി ആന്റ് ഫോറിനേഴ്‌സ് അഫയേഴ്‌സ് (ജിഡിആര്‍എഫ്എ) ദുബൈ ഹില്‍സ് മാളില്‍ ‘ഞങ്ങള്‍ നിങ്ങള്‍ക്കായി ഇവിടെയുണ്ട്’ എന്ന ശീര്‍ഷകത്തില്‍ ബോധവത്കരണ കാമ്പയിന്‍ ആരംഭിച്ചു. മേജര്‍ ജനറല്‍ ഉബൈദ് മുഹൈര്‍ ബിന്‍ സുറൂര്‍ കാമ്പയിന്‍ ഉദ്ഘാടനം നിര്‍വഹിച്ചു. പൗരന്മാര്‍ക്കും താമസക്കാര്‍ക്കുമിടയില്‍ ജിഡിആര്‍എഫ്എയുടെ സേവനങ്ങളെക്കുറിച്ച് കൂടുതല്‍ അവബോധം സൃഷ്ടിക്കുകയും അവ ലളിതവും പ്രാപ്യവുമായ രീതിയില്‍ ജനങ്ങളിലേക്ക് എത്തിക്കുകയും ചെയ്യുകയാണ് കാമ്പയിന്‍ ലക്ഷ്യം. മാളില്‍ പ്രത്യേകം സജ്ജീകരിച്ച പവലിയന്‍ രാവിലെ 10 മുതല്‍ രാത്രി 10 വരെ പൊതുജനങ്ങള്‍ക്ക് സന്ദര്‍ശിക്കാം.
ആദ്യ ദിനം തന്നെ സന്ദര്‍ശകരില്‍ നിന്നും മികച്ച പ്രതികരണമാണ് ലഭിച്ചത്. ഗോള്‍ഡന്‍ വിസ,പ്രവേശനാനുമതി,ഐഡന്റിറ്റി കാര്‍ഡ്,ദേശീയതാ സേവനങ്ങള്‍, ‘അമര്‍ അസിസ്റ്റന്റ്’ എന്ന സ്മാര്‍ട്ട് സംവിധാനവും ഉള്‍പ്പെടെ വിവിധ സേവനങ്ങളെക്കുറിച്ച് വിശദമായി അറിയാന്‍ സന്ദര്‍ശകര്‍ക്ക് ഇവിടെ അവസരമുണ്ട്.
വിവരദായകമായ സ്റ്റാളുകളും പരിശീലനം ലഭിച്ച ജീവനക്കാരിലൂടെ നേരിട്ടുള്ള മാര്‍ഗനിര്‍ദേശങ്ങളും കാമ്പയിനിന്റെ ഭാഗമാണ്. കുട്ടികള്‍ക്കായി ‘സലീം’, ‘സലാമ്’ എന്നീ കാര്‍ട്ടൂണ്‍ കഥാപാത്രങ്ങളെ ഉള്‍പ്പെടുത്തി സജ്ജമാക്കിയിട്ടുള്ള വിദ്യാഭ്യാസ കോര്‍ണറും ഏറെ ശ്രദ്ധേയമാണ്. ഡയറക്ടറേറ്റ് കഴിഞ്ഞ കാലങ്ങളില്‍ നടത്തിവന്ന ബോധവത്ക്കരണ പ്രവര്‍ത്തനങ്ങളുടെ തുടര്‍ച്ചയാണ് പുതിയ കാമ്പയിന്‍. സേവനങ്ങള്‍ക്കുറിച്ചുള്ള സംശയങ്ങള്‍ തീര്‍ക്കാനും വ്യക്തിഗതമായ ഇടപെടലുകള്‍ക്കുമായി പൊതുജനങ്ങള്‍ക്കൊപ്പം നേരിട്ട് സംവദിക്കാനുള്ള മികച്ച അവസരമായി കാമ്പയിന്‍ മാറുന്നു. ഫീഡ്ബാക്ക് സ്വീകരിക്കാന്‍ പ്രത്യേക സംവിധാനം ഏര്‍പ്പെടുത്തിയതും ജനകീയ ഇടപെടലിന് അവസരം ഒരുക്കുന്നുവെന്ന് അധികൃതര്‍ അറിയിച്ചു. കാമ്പയിന്‍ നാളെ സമാപിക്കും.
