യുഎഇ സന്ദര്ശനത്തിനെത്തിയ ഫ്രഞ്ച് പ്രസിഡന്റിനെ പ്രസിഡന്റ് ശൈഖ് മുഹമ്മദ് ബിന് സായിദ് സ്വീകരിച്ചു
Wed, 24 Dec 2025
ദുബൈ: തിങ്കളാഴ്ച യുഎഇയില് സ്കൂളുകള് തുറക്കുന്ന സാഹചര്യത്തില് നൂതന സുരക്ഷ പദ്ധതിയൊരുക്കി ദുബൈ പൊലീസ്. എമിറേറ്റില് വിദ്യാര്ത്ഥികള്ക്ക് മികച്ച സുരക്ഷ ഒരുക്കാനാണ് പൊലീസ് തയ്യാറായിരിക്കുന്നത്. ഗതാഗത തടസ്സം നേരിടുന്നുണ്ടോ എന്ന് നിരീക്ഷിക്കാന് ഒമ്പത് ഡ്രോണുകള് ആകാശത്ത് പറക്കും. കൂടാതെ ആറ് ആഡംബര പട്രോള് കാറുകള്, നാല് മൗണ്ട് പോലീസ് യൂണിറ്റുകള്, ഫീല്ഡ് സാന്നിധ്യം വര്ദ്ധിപ്പിക്കുന്നതിന് 60 സൈക്കിളുകള് വിന്യസിക്കും. സ്കൂള് മേഖലകള് സുരക്ഷിതമാക്കുന്നതിനായി 250 സുരക്ഷാ, ഗതാഗത പട്രോളിംഗുകള് ഒരുക്കിയിട്ടുണ്ട്. കൂടാതെ, 15 വിവിധ സംഘടനകളുടെ പങ്കാളിത്തത്തോടെയുള്ള 28 ബോധവല്ക്കരണ പരിപാടികള്ക്കൊപ്പം, ‘സുരക്ഷാ അംബാസഡര്മാര്’ പ്രോഗ്രാമില് 300 കുട്ടികള് പങ്കെടുക്കും. 750ലധികം മുതിര്ന്ന ഉദ്യോഗസ്ഥരും പൊലീസ് ഉദ്യോഗസ്ഥരും വിദ്യാര്ത്ഥികളുമായി നേരിട്ട് ഇടപഴകും. ദുബൈ പോലീസ് അക്കാദമിയുടെ ആക്ടിംഗ് ഡയറക്ടര് ബ്രിഗേഡിയര് നാസര് അല് സാരി ഇക്കാര്യങ്ങള് ദുബൈയില് മാധ്യമങ്ങളോട് വിശദീകരിച്ചു. ഹിമായ കൗണ്സില് സെക്രട്ടറി ജനറല് ഡോ. ബ്രിഗേഡിയര് അബ്ദുള്റഹ്മാന് അല് മാമ്മരി, മനുഷ്യാവകാശ പൊതു വകുപ്പിലെ ചൈല്ഡ് ആന്ഡ് വുമണ് പ്രൊട്ടക്ഷന് ഡയറക്ടര് ലെഫ്റ്റനന്റ് കേണല് ഡോ. അലി അല് മത്രൂഷി, സ്കൂള് സെക്യൂരിറ്റി സംരംഭത്തിന്റെ തലവന് ക്യാപ്റ്റന് മജീദ് ബിന് സഈദ് അല് കാബി, പോസിറ്റീവ് സ്പിരിറ്റ് കൗണ്സില് ചെയര്വുമണ് ഫാത്തിമ ബുഹ്ജൈര്, സ്കൂള് പ്രിന്സിപ്പല്മാര്, മുതിര്ന്ന ഉദ്യോഗസ്ഥര് പങ്കെടുത്തു. ദുബൈ പൊലീസിന്റെ കമാന്ഡര്ഇന്ചീഫ് ലെഫ്റ്റനന്റ് ജനറല് അബ്ദുള്ള ഖലീഫ അല് മര്റിയുടെ നിര്ദ്ദേശപ്രകാരം വിദ്യാര്ത്ഥികളുടെ സുരക്ഷക്ക് സേന പ്രതിജ്ഞാബദ്ധമാണെന്ന് ഡോ. ബ്രിഗേഡിയര് അല് മാമ്മരി ഊന്നിപ്പറഞ്ഞു. സുരക്ഷയും സമൂഹ അവബോധവും വളര്ത്തുന്നതിനായി വിദ്യാര്ത്ഥികളുമായും രക്ഷിതാക്കളുമായും ഇടപഴകുന്നതിനായി ഫീല്ഡ് ടീമുകള് ഹിമായ സ്കൂളുകള് ഉള്പ്പെടെ 71 സ്കൂളുകള് സന്ദര്ശിക്കുമെന്ന് അദ്ദേഹം പറഞ്ഞു. ഹിമായ ഇന്റര്നാഷണല് സെന്റര്, പോസിറ്റീവ് സ്പിരിറ്റ് കൗണ്സില്, സ്കൂള് സുരക്ഷാ സംരംഭം, സേഫ്റ്റി അംബാസഡേഴ്സ് പ്രോഗ്രാം, നസീജ് സംരംഭം തുടങ്ങിയ സംവിധാനങ്ങള് പദ്ധതിയുടെ ഭാഗമാവുന്നുണ്ട്.
