ദുബൈയില്‍ ഓര്‍മ കേരളോത്സവം ഡിസം.1ന്; മുഖ്യമന്ത്രി പിണറായി വിജയന്‍ ഉദ്ഘാടനം ചെയ്യും
Sun, 30 Nov 2025
ദുബൈ: സര്‍ക്കാര്‍ സേവനങ്ങള്‍ കൂടുതല്‍ കാര്യക്ഷമമാക്കുന്നതിനും പരസ്പര സഹകരണം ശക്തമാക്കുന്നതിനുമായി ദുബൈ ജനറല്‍ ഡയറക്ടറേറ്റ് ഓഫ് ഐഡന്റിറ്റി ആന്‍ഡ് ഫോറിനേഴ്‌സ് അഫയേഴ്‌സും (GDRFA) ദുബൈ ഇന്റര്‍നാഷണല്‍ ഫിനാന്‍ഷ്യല്‍ സെന്റര്‍ (DIFC) അതോറിറ്റിയും പങ്കാളിത്ത കരാറില്‍ ഒപ്പുവെച്ചു. ദുബൈയില്‍ നടന്ന ചടങ്ങില്‍ ജിഡിആര്‍എഫ്എയ്ക്ക് വേണ്ടി എന്‍ട്രി ആന്‍ഡ് റെസിഡന്‍സ് പെര്‍മിറ്റ് സെക്ടര്‍ അസിസ്റ്റന്റ് ഡയറക്ടര്‍ ജനറല്‍ മേജര്‍ ജനറല്‍ ഖലഫ് അഹമ്മദ് അല്‍ ഗൈത്തും, ഡിഐഎഫ്‌സി അതോറിറ്റിക്കായി ചീഫ് എക്‌സിക്യൂട്ടീവ് ഓഫീസര്‍ ആരിഫ് അമീരിയുമാണ് കരാറില്‍ ഒപ്പുവെച്ചത്. ദുബൈയുടെ വികസന സ്വപ്നങ്ങള്‍ക്ക് കരുത്തേകാനും, സേവനങ്ങളുടെ നിലവാരം ഉയര്‍ത്തി ജനജീവിതം മെച്ചപ്പെടുത്താനും ലക്ഷ്യമിട്ടാണ് ഇരു സ്ഥാപനങ്ങളും കൈകോര്‍ക്കുന്നത്. ഡിഐഎഫ്‌സിയിലെ ഉപഭോക്താക്കള്‍ക്കും ഫാമിലി വെല്‍ത്ത് സെന്റര്‍ അംഗങ്ങള്‍ക്കും മികച്ച സേവനങ്ങള്‍ വേഗത്തില്‍ ലഭ്യമാക്കാന്‍ ഈ സഹകരണത്തിലൂടെ സാധിക്കും. നിയമ, സാങ്കേതിക, ഭരണപരമായ കാര്യങ്ങളില്‍ ഇരു വിഭാഗങ്ങളും ഒത്തൊരുമിച്ച് പ്രവര്‍ത്തിക്കും. സര്‍ക്കാര്‍ സേവനങ്ങളെ ഏകോപിപ്പിക്കുന്നതില്‍ ഇതൊരു പുതിയ നാഴികക്കല്ലാണെന്ന് ജിഡിആര്‍എഫ്എ ഡെപ്യൂട്ടി ഡയറക്ടര്‍ ജനറല്‍ മേജര്‍ ജനറല്‍ ഉബൈദ് മുഹൈര്‍ ബിന്‍ സുറൂര്‍ പറഞ്ഞു. നൂതനവും ഭാവിയിലേക്ക് ഉറ്റുനോക്കുന്നതുമായ സേവനങ്ങളാണ് ദുബൈ ലക്ഷ്യമിടുന്നതെന്നും അദ്ദേഹം കൂട്ടിച്ചേര്‍ത്തു. നിക്ഷേപകര്‍ക്കും ഉപഭോക്താക്കള്‍ക്കും നടപടിക്രമങ്ങള്‍ എളുപ്പമാക്കാനും ദുബൈയെ ആഗോള ബിസിനസ് ഹബ്ബായി നിലനിര്‍ത്താനും ഈ കൂട്ടായ്മ സഹായിക്കുമെന്ന് ഡിഐഎഫ്‌സി ഗവര്‍ണര്‍ ഈസ കാസിം അഭിപ്രായപ്പെട്ടു. രണ്ട് വര്‍ഷത്തേക്കാണ് കരാര്‍ ഒപ്പുവെച്ചിരിക്കുന്നത്. ഉയര്‍ന്ന ആസ്തിയുള്ള വ്യക്തികള്‍ക്കും കുടുംബ ബിസിനസുകള്‍ക്കും ആവശ്യമായ സേവനങ്ങള്‍ നല്‍കുന്നതിലും അവരുടെ വളര്‍ച്ചയ്ക്ക് പിന്തുണ നല്‍കുന്നതിലും ഈ സഹകരണം നിര്‍ണ്ണായകമാകുമെന്ന് അധികൃതര്‍ അറിയിച്ചു
