അബുദാബി പീര്‍ മുഹമ്മദ് ഫൗണ്ടേഷന്‍ റാഫി നൈറ്റ് നവംബര്‍ 15ന്
Mon, 27 Oct 2025
റിയാദ് : കെഎംസിസി കണ്ണൂര്‍ ജില്ലാ ‘തസ്‌വീദ്’ കാമ്പയിനിന്റെ ഭാഗമായി ഇന്റര്‍നാഷണല്‍ ബാഡ്മിന്റണ്‍ ടൂര്ണമെന്റ് 16,17 തീയതികളില്‍ റിയാദില്‍ നടക്കുമെന്ന് ഭാരവാഹികള്‍ വാര്‍ത്താ സമ്മേളനത്തില്‍ അറിയിച്ചു. എക്‌സിറ്റ് 18ലെ ഗ്രീന്‍ റിക്രിയേഷന്‍ ക്ലബില്‍ നടക്കുന്ന ടൂര്‍ണമെന്റില്‍ വിവിധ കാറ്റഗറികളിലായി 300ലധികം മത്സരാര്‍ത്ഥികള്‍ പങ്കെടുക്കും. വിജയികള്‍ക്ക് 15,000 റിയാലിന്റെ ക്യാഷ് െ്രെപസും ഉപഹാരങ്ങളും സമ്മാനിക്കുമെന്ന് സംഘാടകര്‍ പറഞ്ഞു. ആറു മാസം നീണ്ടുനില്‍ക്കുന്ന കര്‍മപദ്ധതികള്‍ ഉള്‍പ്പെടുത്തിയ ‘തസ്‌വീദ്’ കാമ്പയിന്‍ ഒക്ടോബറിലാണ് ജില്ലാ കമ്മിറ്റി പ്രഖ്യാപിച്ചത്.
സമൂഹത്തിന്റെ ഉയര്‍ച്ചയും പങ്കാളിത്തവും ലക്ഷ്യമാക്കി വിവിധ പരിപാടികളാണ് കാമ്പയിനിന്റെ ഭാഗമായി നടന്നുവരുന്നത്. ജില്ലയിലെ 11 മണ്ഡലം കമ്മിറ്റികളെ പങ്കെടുപ്പിച്ച് നടത്തിയ ക്രിക്കറ്റ് ടൂര്ണമെന്റ്,റിയാദിലെ വിവിധ സ്‌കൂളുകളില്‍ നിന്നുമുള്ള 2500 ലധികം വിദ്യാര്‍ഥികള്‍ പങ്കെടുത്ത ഇന്റര്‍നാഷനല്‍ ഇന്ത്യന്‍ സ്‌കൂള്‍ ഫെസ്റ്റ്,സ്ത്രീ ശാക്തീകരണ ഭാഗമായി നടത്തിയ ലേഡീസ് ഫെസ്റ്റ് തുടങ്ങിയ പരിപാടികള്‍ കാമ്പയിനിന്റെ ഭാഗമായി നടന്നു. പ്രവര്‍ത്തകരുടെയും പ്രഫഷണലുകളുടെയും ജീവിത കാഴ്ചപ്പാടുകളും സാമൂഹിക ഇടപെടലുകളും വളര്‍ത്തുന്നതിന് വേണ്ടി അന്താരാഷ്ട്ര ട്രെയിനര്‍ റാഷിദ് ഗസ്സാലി നയിക്കുന്ന പിആര്‍പി ഓണ്‍ലൈന്‍ കോഴ്‌സിന്റെ കോണ്‍വൊക്കേഷന്‍ പ്രോഗ്രാം അടുത്ത മാസം 14ന് റിയാദില്‍ നടക്കും.
പ്രമുഖ പണ്ഡിതന്മാരായ സിംസാറുല്‍ ഹഖ് ഹുദവി,ഹുസൈന്‍ മടവൂര്‍,മുസ്്‌ലിംലീഗ് സംസ്ഥാന സെക്രട്ടറി കെഎം ഷാജി തുടങ്ങിയ പ്രമുഖര്‍ പങ്കെടുക്കുന്ന ഐക്യസമ്മേളനം,ബിസിനസ് മീറ്റ്,ഇഫ്താര്‍ മീറ്റ് എന്നിവയും കാമ്പയിനിന്റെ ഭാഗമായി നടക്കും. കാമ്പയിനിന്റെ സമാപനം ‘കണ്ണൂര്‍ ഫെസ്റ്റ്’ എന്ന പേരില്‍ ഏപ്രില്‍ മാസത്തില്‍ നടക്കും. മുസ്്‌ലിംലീഗ് ദേശീയ,സംസ്ഥാന,ജില്ലാ നേതാക്കള്‍ പരിപാടിയില്‍ പങ്കെടുക്കും. കണ്ണൂരിന്റെ കലാ സാംസ്‌കാരിക തനിമ വിളംബരം ചെയ്യുന്ന പരിപാടിയായിരിക്കും കണ്ണൂര്‍ ഫെസ്റ്റ്. ജൂണ്‍, ജൂലൈ മാസങ്ങളില്‍ ജില്ലയിലെ 11 മണ്ഡലങ്ങളില്‍ നിന്നുള്ള 11 പെണ്‍കുട്ടികള്‍ക്ക് കണ്ണൂരില്‍ സമൂഹ വിവാഹവും സംഘടിപ്പിക്കുമെന്ന് ഭാരവാഹികള്‍ അറിയിച്ചു. വാര്‍ത്താ സമ്മേളനത്തില്‍ കെഎംസിസി നാഷണല്‍ കമ്മിറ്റി വൈസ് പ്രസിഡന്റ് വികെ മുഹമ്മദ്, സെന്‍ട്രല്‍ കമ്മിറ്റി വൈസ് പ്രസിഡന്റ് മജീദ് പെരുമ്പ,കണ്ണൂര്‍ ജില്ലാ പ്രസിഡന്റ് അന്‍വര്‍ വാരം, ജനറല്‍ സെക്രട്ടറി മുക്താര്‍ പിടിപി എന്നിവര്‍ പങ്കെടുത്തു.
