കൂട്ടായ്മയാണ് രാഷ്ട്ര വികസനത്തിന്റെ കരുത്ത്: ശൈഖ് മുഹമ്മദ്
Sun, 13 Jul 2025
ദുബൈ: കനത്ത ചൂടില്‍ ആശ്വാസത്തിന്റെ കുടിവെള്ളം നല്‍കി മാതൃകയായി ദുബൈയിലെ സന്നദ്ധ സംഘടനകള്‍. ദുബൈയില്‍ താപനില 50 ഡിഗ്രി സെല്‍ഷ്യസ് കടന്ന പശ്ചാത്തലത്തില്‍ തൊഴിലാളികള്‍ക്കും ഡെലിവറി റൈഡര്‍മാര്‍ക്കും കര്‍ഷകര്‍ക്കും മറ്റും മാനുഷിക സഹായമെത്തിക്കാന്‍ അല്‍ ഫ്രീജ് ഫ്രിഡ്ജ് കാമ്പയിനുമായി സന്നദ്ധ സംഘടനകള്‍ രംഗത്തുണ്ട്. സൗജന്യ തണുത്ത വെള്ളം, ഐസ്‌ക്രീം, ജ്യൂസുകള്‍, ശീതളപാനീയങ്ങള്‍ തുടങ്ങി ചൂടിന്റെ ആഘാതം കുറക്കാനാകുന്ന വസ്തുക്കളാണ് വിതരണം ചെയ്യുക. മുഹമ്മദ് ബിന്‍ റാഷിദ് അല്‍ മക്തൂം ഗ്ലോബല്‍ ഇനിഷ്യേറ്റീവ് ഫൗണ്ടേഷന്‍, യുഎഇ വാട്ടര്‍ എയ്ഡ് ഫൗണ്ടേഷന്‍, യുഎഇ ഫുഡ് ബാങ്ക് എന്നിവയുടെ പിന്തുണയോടെ ഫുര്‍ജാന്‍ ദുബൈ ഫൗണ്ടേഷനാണ് കാമ്പയിന് നേതൃത്വം നല്‍കുന്നത്. സമൂഹത്തില്‍ അനുകമ്പയുടെയും ദാനത്തിന്റെയും മൂല്യങ്ങള്‍ പ്രോത്സാഹിപ്പിക്കുന്നതിന്റെ ഭാഗം കൂടിയാണ് കാമ്പയിന്. ചൂടിന്റെ കാഠിന്യം കുറയുന്ന ആഗസ്റ്റ് അവസാനം വരെ തുടരുന്ന അല്‍ ഫ്രീജ് ഫ്രിഡ്ജ് കാമ്പയിനിന്റെ പ്രയോജനം ഒരു ദശലക്ഷം തൊഴിലാളികള്‍ക്ക് ലഭിക്കുമെന്നാണ് കണക്കുകൂട്ടല്‍.
വേനല്‍ക്കാലത്ത് പ്രാദേശിക കമ്മ്യൂണിറ്റിയില്‍ നിന്നുള്ള സന്നദ്ധപ്രവര്‍ത്തകരുടെ പങ്കാളിത്തത്തോടെ ഔട്ട്‌ഡോര്‍ ഏരിയകളില്‍ ജോലി ചെയ്യുന്ന തൊഴിലാളികള്‍ക്കും ഡെലിവറി ഡ്രൈവര്‍മാര്‍ക്കും സഹായമെത്തിക്കുന്നതിന് ശീതീകരിച്ച വാഹനങ്ങള്‍ വിവിധ പ്രദേശങ്ങളില്‍ പര്യടനം നടത്തും. ഇതുവഴി നിര്‍ജ്ജലീകരണം, ചൂട് സമ്മര്‍ദ്ദം തുടങ്ങിയ തടയാനും തൊഴിലാളികളുടെ ആരോഗ്യം നിലനിര്‍ത്താനാകുമെന്നും കരുതുന്നു. അല്‍ ഫ്രീജ് ഫ്രിഡ്ജ്-എന്ന മാനുഷിക കമ്മ്യൂണിറ്റി കാമ്പയിന് ദുബൈ സമൂഹത്തില്‍ അന്തര്‍ലീനമായിട്ടുള്ള സംഭാവനയുടെയും അനുകമ്പയുടെയും മൂല്യങ്ങളെ പ്രതിഫലിപ്പിക്കുന്നതാണെന്ന് മുഹമ്മദ് ബിന്‍ റാഷിദ് അല്‍ മക്തൂം ഗ്ലോബല്‍ ഇനിഷ്യേറ്റീവ്‌സ് ഫൗണ്ടേഷന്‍ സിഇഒ ഡോ.അബ്ദുള്‍ കരീം സുല്‍ത്താന്‍ അല്‍ ഒലാമ പറഞ്ഞു.
