ഹല കാസ്രോഡ് ഗ്രാന്റ് ഫെസ്റ്റ് ഒക്ടോ.26ന്; സ്വാഗത സംഘം ഓഫീസ് തുറന്നു
Sat, 20 Sep 2025
കസാഖിസ്ഥാന്‍ പ്രധാനമന്ത്രി ഓള്‍ജാസ് ബെക്‌റ്റെനോവുമായി ലുലു ഗ്രൂപ്പ് ചെയര്‍മാന്‍ എം.എ. യൂസഫലി ചര്‍ച്ച നടത്തി
അസ്താന: മധ്യേഷന്‍ രാജ്യമായ കസാഖിസ്ഥാനില്‍ നിന്നുള്ള കാര്‍ഷികോത്പന്നങ്ങളുടെ കയറ്റുമതി ഊര്‍ജ്ജിതമാക്കാന്‍ ലുലു ഗ്രൂപ്പ്. ഇതുമായി ബന്ധപ്പെട്ട് കസാഖിസ്ഥാന്‍ പ്രധാനമന്ത്രി ഓള്‍ജാസ് ബെക്‌റ്റെനോവുമായി ലുലു ഗ്രൂപ്പ് ചെയര്‍മാന്‍ എം.എ. യൂസഫലി ചര്‍ച്ച നടത്തി. അസ്താനയിലെ പ്രധാനമന്ത്രിയുടെ ഓഫീസില്‍ വെച്ചായിരുന്നു കൂടിക്കാഴ്ച. കസാഖിസ്ഥാനിലെ കാര്‍ഷികോത്പ്പന്നങ്ങള്‍ക്ക് വിപുലമായ വിപണി ലഭ്യമാക്കുമെന്ന് കൂടിക്കാഴ്ചക്കിടെ യൂസഫലി പ്രധാനമന്ത്രിയെ അറിയിച്ചു. ഇതിന്റെ ഭാഗമായി പൊതുസ്വകാര്യ പങ്കാളിത്വത്തോടെയുള്ള അഗ്രോ ടെക്ക്‌നോപാര്‍ക്ക് ലോജിസ്റ്റിക്‌സ് ഹബ്ബില്‍ ഭക്ഷ്യസംസ്‌കരണ കയറ്റുമതി കേന്ദ്രവുമടക്കം ലുലു യാഥാര്‍ത്ഥ്യമാക്കും. കൂടുതല്‍ പ്രാദേശിക ഉത്പന്നങ്ങള്‍ സംഭരിക്കുന്നതിനും മിഡില്‍ഈസ്റ്റില്‍ ഉള്‍പ്പടെ വിപണി ലഭ്യമാക്കുന്നതിനും പദ്ധതി വഴിവയ്ക്കും. നിലവില്‍ കസാക്കിസ്ഥാന്‍ നിന്ന് മാംസോത്പ്പന്നങ്ങള്‍, കാര്‍ഷിക വിഭവങ്ങളും അടക്കം ഗള്‍ഫ് രാജ്യങ്ങളിലുള്ള ലുലു സ്റ്റോറുകളിലേക്ക് ഇറക്കുമതി ചെയ്യുന്നുണ്ട്. ഈ സഹകരണം വിപുലമാക്കുന്നതിന്റെ ഭാഗമായാണ് പുതിയ പദ്ധതികള്‍. കസാഖിസ്ഥാന്‍ പ്രസിഡന്റ് കാസിം ജോമാര്‍ട്ട് ടോകയേവിന്റെ നിര്‍ദേശപ്രകാരം എല്ലാ പിന്തുണയും ലുലുവിന്റെ പദ്ധതികള്‍ക്ക് നല്‍കുമെന്ന് പ്രധാനമന്ത്രി വ്യക്തമാക്കി. 70ലധികം രാജ്യങ്ങളിലേക്ക് കസാക്കിസ്ഥാന്‍ ഉത്പന്നങ്ങള്‍ കയറ്റുമതി ചെയ്യുന്നുണ്ട്. ഇത് ഇരട്ടിയാക്കാനുള്ള സര്‍ക്കാര്‍ ലക്ഷ്യങ്ങള്‍ക്ക് കരുത്തേകുന്നതാണ് ലുലു ഗ്രൂപ്പുമായുള്ള പ്രധാനമന്ത്രിയുടെ കൂടിക്കാഴ്ച. അബുദാബി കിരീടാവകാശി ശൈഖ് ഖാലിദ് ബിന്‍ മുഹമ്മദ് ബിന്‍ സായിദ് അല്‍ നഹ്യാന്റെ നേതൃത്വത്തില്‍ കഴിഞ്ഞ മെയില്‍ കസാഖിസ്ഥാനില്‍ ഔദ്യോഗിക സന്ദര്‍ശനം നടത്തിയപ്പോള്‍ ഇതുമായി ബന്ധപ്പെട്ട് പ്രാരംഭ ചര്‍ച്ചകള്‍ യൂസഫലി കസാഖിസ്ഥാന്‍ അധികൃതരുമായി നടത്തിയിരുന്നു. കസാഖിസ്ഥാന്‍ വ്യാപാര മന്ത്രി അര്‍മ്മാന്‍ ഷക്കലെവ്, കസാഖിസ്ഥാനിലെ ഇന്ത്യന്‍ സ്ഥാനപതി വൈ.കെ സൈലാസ് തങ്കല്‍ എന്നിവരുമായും യൂസഫലി കൂടിക്കാഴ്ച നടത്തി. ലുലു ഗ്രൂപ്പിന്റെ ഉപസ്ഥാപനങ്ങളായ അല്‍ തയ്യിബ് ഫുഡ് ഇന്‍ഡസ്ട്രീസ് ഡയറക്ടര്‍ റിയാദ് ജബ്ബാര്‍, ഫെയര്‍ എക്‌സ്‌പോര്ട്‌സ് ഇന്ത്യ ചീഫ് എക്‌സിക്യുടീവ് ഓഫീസര്‍ നജിമുദീന്‍ ഇബ്രാഹീം എന്നിവരും സംബന്ധിച്ചു.
