പിഎം ശ്രീ ഇടതുസര്ക്കാര് കോംപ്ലിക്കേറ്റാക്കി: മന്ത്രി പികെ കുഞ്ഞാലിക്കുട്ടി
Fri, 31 Jul 2026
സാവോ പൗളോ: ബ്രസീല് ഫുട്ബോളിന്റെ ഇതിഹാസ താരം നെയ്മര് ജൂനിയര് അന്താരാഷ്ട്ര ഫുട്ബോളില് നിന്ന് ഔദ്യോഗികമായി വിരമിച്ചു. 16 വര്ഷം നീണ്ട ദേശീയ ടീം കരിയറിന് വിരാമമിടുകയാണെന്ന് സാന്റോസ് ക്ലബിനായി കോപ്പ സുദാമെറിക്കാന മത്സരത്തിന് ശേഷം മാധ്യമങ്ങളോട് സംസാരിക്കവെയാണ് നെയ്മര് പ്രഖ്യാപിച്ചത്. ലോകകപ്പ് പുറത്താകലിന് പിന്നാലെ ഉയര്ന്നിരുന്ന അഭ്യൂഹങ്ങള്ക്കാണ് ഇതോടെ അവസാനമായത്.
‘ബ്രസീലിനായി കളിച്ച എന്റെ സമയം കഴിഞ്ഞു. ദേശീയ ടീമിനായി ഇനി കളിക്കണമെന്ന ആഗ്രഹമില്ല. ഈ ജേഴ്സിക്കായി ഞാന് എന്റെ ജീവിതവും രക്തവും സമര്പ്പിച്ചു. രാജ്യത്തെ പ്രതിനിധീകരിക്കാന് ലഭിച്ച അവസരത്തില് ഞാന് അഭിമാനിക്കുന്നു,’-നെയ്മര് വികാരഭരിതനായി പ്രതികരിച്ചു.
2026 ഫിഫ ലോകകപ്പിന്റെ പ്രീക്വാര്ട്ടര് മത്സരത്തില് നോര്വേയോട് 2-1ന് പരാജയപ്പെട്ട് ബ്രസീല് പുറത്തായതായിരുന്നു നെയ്മറിന്റെ ദേശീയ ടീമിനായുള്ള അവസാന മത്സരം. ആ മത്സരത്തില് ബ്രസീലിന്റെ ഏക ഗോള് നേടിയതും നെയ്മറായിരുന്നു. മത്സരശേഷം കണ്ണീരോടെ മൈതാനം വിട്ട താരം അന്നുതന്നെ തന്റെ അന്താരാഷ്ട്ര കരിയര് അവസാനിച്ചെന്ന സൂചന നല്കിയിരുന്നു.
2010ല് ബ്രസീലിനായി അരങ്ങേറ്റം കുറിച്ച നെയ്മര് ദേശീയ ടീമിനായി 130 മത്സരങ്ങളില് നിന്ന് 80 ഗോളുകളും 58 അസിസ്റ്റുകളും സ്വന്തമാക്കി. ഇതോടെ ബ്രസീലിന്റെ എക്കാലത്തെയും മികച്ച ഗോള്സ്കോററെന്ന റെക്കോര്ഡും അദ്ദേഹത്തിന്റെ പേരിലായി. 2023ല് പെലെയുടെ ഗോള് റെക്കോര്ഡ് മറികടന്നതും നെയ്മറായിരുന്നു. 2013ലെ ഫിഫ കോണ്ഫെഡറേഷന്സ് കപ്പ് കിരീടമാണ് ബ്രസീല് സീനിയര് ടീമിനൊപ്പം നെയ്മര് നേടിയ പ്രധാന നേട്ടം. നാല് ലോകകപ്പുകളില് ബ്രസീലിനെ പ്രതിനിധീകരിച്ചെങ്കിലും ലോകകപ്പ് കിരീടമെന്ന സ്വപ്നം അദ്ദേഹത്തിന് സഫലമാക്കാനായില്ല. പരിക്കുകളും അപ്രതീക്ഷിത പുറത്താകലുകളും അദ്ദേഹത്തിന്റെ ലോകകപ്പ് യാത്രയെ പലവട്ടം ബാധിച്ചു. അതേസമയം, അന്താരാഷ്ട്ര ഫുട്ബോളില് നിന്ന് വിരമിച്ചെങ്കിലും ക്ലബ് ഫുട്ബോളില് നെയ്മര് തുടരുമെന്നാണ് റിപ്പോര്ട്ടുകള്. നിലവില് ബ്രസീലിയന് ക്ലബ്ബായ സാന്റോസിനായാണ് അദ്ദേഹം കളിക്കുന്നത്.
