ഓപ്പറേഷന് തൂഫാന് ഐക്യദാര്ഢ്യവുമായി നന്മ മേപ്പയൂര്
Tue, 07 Jul 2026
റിയാദ്: വിനോദസഞ്ചാരികള്ക്ക് വിപുലമായ ഒരു ട്രാവല് പാക്കേജ് ഒരുക്കി പുതിയ ‘ടൂറിസ്റ്റ് പാക്കേജ് വിസ’ (Tourist package visa) സേവനം സൗദി അറേബ്യ ആരംഭിച്ചു. ഒരു സമ്പൂര്ണ്ണ യാത്ര ആസൂത്രണം ചെയ്യുന്നതിനും ബുക്ക് ചെയ്യുന്നതിനുമുള്ള ബുദ്ധിമുട്ടുകള് കുറയ്ക്കാന് ഇത് സഹായിക്കും.
വിമാനയാത്രാ നിരക്ക്, അംഗീകൃത ടൂറിസ്റ്റ് ഭവനങ്ങളിലെ താമസം, ഇലക്ട്രോണിക് വിസ പ്രോസസ്സിംഗ് എന്നിവയുള്പ്പെടെ യാത്രയുടെ വിവിധ ഘടകങ്ങള് കോര്ത്തിണക്കുന്ന പാക്കേജുകള് ബുക്ക് ചെയ്യാന് ഈ സേവനം വിനോദസഞ്ചാരികളെ അനുവദിക്കുന്നു. കൂടാതെ സവിശേഷമായ അനുഭവങ്ങള്, വിനോദ പ്രവര്ത്തനങ്ങള്, ഇവന്റുകള് എന്നിവ കൂടി ഇതില് ഉള്പ്പെടുത്താനുള്ള ഓപ്ഷനും ഉണ്ട്. അപേക്ഷകര്ക്ക്, നിര്ദ്ദിഷ്ട പൈലറ്റ് മാര്ക്കറ്റുകളിലെ അംഗീകൃത ‘ജനറല് കാറ്റഗറി’ ട്രാവല്, ടൂറിസം സേവന ദാതാക്കള് വഴി ഈ സേവനം ഉപയോഗപ്പെടുത്താവുന്നതാണ്.
പാക്കേജിനുള്ളില് തന്നെ വിസ ക്രമീകരണ സേവനങ്ങള് കൂടി ഉള്പ്പെടുത്തുന്നതിലൂടെ, സേവന ദാതാക്കള് ഉപഭോക്താക്കള്ക്ക് കൂടുതല് സുഗമമായ അനുഭവം നല്കുകയും, കൂടുതല് സംയോജിതവും ആകര്ഷകവുമായ ടൂറിസം പാക്കേജുകള് രൂപകല്പ്പന ചെയ്യുകയും ചെയ്യും. ഇത് സന്ദര്ശകരെ അവരുടെ യാത്രകള് ദീര്ഘിപ്പിക്കാന് പ്രോത്സാഹിപ്പിക്കുന്നതാണ്. ‘ടൂറിസ്റ്റ് പാക്കേജ് വിസ’ സേവനം ടൂറിസം മേഖലയിലെ വിശാലമായ മാറ്റങ്ങളെയാണ് പ്രതിഫലിപ്പിക്കുന്നത്. യാത്രകള് സുഗമമാക്കുക, സ്വകാര്യ മേഖലയുമായുള്ള പങ്കാളിത്തം ശക്തിപ്പെടുത്തുക, കൂടുതല് മികച്ച ടൂറിസം അനുഭവങ്ങള് നല്കുക, രാജ്യത്തെയും അതിലെ വൈവിധ്യമാര്ന്ന വിനോദസഞ്ചാര കേന്ദ്രങ്ങളെയും കണ്ടെത്താന് ലോകത്തിന് മുന്നില് വിശാലമായ അവസരങ്ങള് തുറന്നിടുക എന്നിവയാണ് ഇതിന്റെ അടിസ്ഥാനം. വിനോദസഞ്ചാരികളുടെ വരവ് എളുപ്പമാക്കുന്നതിനും അവരുടെ യാത്രാനുഭവം മെച്ചപ്പെടുത്തുന്നതിനുമായി ‘വിഷന് 2030’ (Vision 2030) ലക്ഷ്യങ്ങള്ക്ക് അനുസൃതമായി സമീപ വര്ഷങ്ങളില് രാജ്യം ആരംഭിച്ച നിരവധി പ്രോഗ്രാമുകളുടെയും സേവനങ്ങളുടെയും തുടര്ച്ചയായാണ് ഈ പുതിയ സേവനവും വരുന്നത്. ഇടൂറിസ്റ്റ് വിസ, വിസ ഓണ് അറൈവല്, ട്രാന്സിറ്റ് വിസ തുടങ്ങിയവ ഇതില് ഉള്പ്പെടുന്നു. 2025ല് 2.9 കോടിയിലധികം (29 മില്യണ്) വിദേശ വിനോദസഞ്ചാരികളാണ് സൗദിയില് എത്തിയത്.
