സ്വയം നിയന്ത്രിത വാഹനങ്ങളുടെ കണ്ട്രോള് റൂം പ്രവര്ത്തനമാരംഭിച്ചു
Tue, 14 Jul 2026
അബുദാബി: അബുദാബിയിലുടനീളമുള്ള സ്വയംഭരണ വാഹനങ്ങളുടെ പ്രവര്ത്തനങ്ങള് നിയന്ത്രിക്കുന്നതിനും നിരീക്ഷിക്കുന്നതിനുമായി ഇന്റഗ്രേറ്റഡ് ട്രാന്സ്പോര്ട്ട് സെന്റര് കേന്ദ്ര കണ്ട്രോള് റൂം ഉദഘാടനം ചെയ്തു. പ്രൈവറ്റ് ഓഫീസിലെ സ്പെഷ്യല് പ്രോജക്ട്സ് ഡിപ്പാര്ട്ട്മെന്റ് ഡയറക്ടര് ശൈഖ് ഹംദാന് ബിന് സഈദ് ബിന് തഹ്നൂണ് അല് നഹ്യാന്, മുനിസിപ്പാലിറ്റികളുടെയും ഗതാഗത വകുപ്പിന്റെയും ചെയര്മാന് മുഹമ്മദ് അലി അല് ഷൊറാഫ എന്നിവരുടെ സാന്നിധ്യത്തില് ഉത്ഘാടന പ്രഖ്യാപനം നടത്തി. തത്സമയ നിരീക്ഷണം, ഡാറ്റ വിശകലനം, തീരുമാനം എന്നിവയ്ക്കുള്ള നൂതന സംവിധാനങ്ങളിലൂടെ മേഖലയുടെ നേരിട്ടുള്ള മേല്നോട്ടവും ഫലപ്രദമായ നിയന്ത്രണവും വര്ദ്ധിപ്പിക്കുക, ഉയര്ന്ന നിലവാരത്തിലുള്ള സുരക്ഷയും പ്രവര്ത്തന കാര്യക്ഷമതയും ഉറപ്പാക്കുക എന്നിവയാണ് ലക്ഷ്യം. എമിറേറ്റിലെ ഓട്ടോണമസ് വാഹന സേവനങ്ങളുടെ തുടര്ച്ചയായ വികാസത്തിന്റെ ഭാഗമായാണ് കണ്ട്രോള് റൂം തുറക്കുന്നത്. ഈ മേഖലയുടെ ദ്രുതഗതിയിലുള്ള വളര്ച്ചയ്ക്ക് അനുസൃതമായി നിയന്ത്രണ സംവിധാനങ്ങള് വികസിപ്പിക്കേണ്ടതിന്റെ പ്രാധാന്യമാണ് ഇതിലൂടെ വ്യക്തമാകുന്നത്.
നിരീക്ഷണ, പ്രതികരണ പ്രവര്ത്തനങ്ങളും നിയുക്ത ഷെഡ്യൂളുകള്ക്കും നിയന്ത്രണ ആവശ്യകതകള്ക്കും അനുസൃതമായി അംഗീകൃത സമയങ്ങളില് കണ്ട്രോള് റൂം പ്രവര്ത്തിക്കുന്നുവെന്ന് ഐടിസി പറഞ്ഞു. അംഗീകൃത നടപടിക്രമങ്ങള്ക്കനുസൃതമായി, സ്വയംഭരണ വാഹനങ്ങളുടെ പ്രവര്ത്തനം ഉടനടി നിരീക്ഷിക്കാനും അടിയന്തിര സാഹചര്യങ്ങളില് ദ്രുത പ്രതികരണം നടത്താനും ഇതിലൂടെ കഴിയും. അതുവഴി റോഡ് സുരക്ഷ വര്ദ്ധിപ്പിക്കാനാകും. കേന്ദ്രീകൃത മേല്നോട്ട സംവിധാനം ഉള്പ്പെടെ വിപുലമായ നിരീക്ഷണ, പ്രവര്ത്തന സംവിധാനങ്ങള് കണ്ട്രോള് റൂമില് സജ്ജീകരിച്ചിരിക്കുന്നു. വാഹന ലൊക്കേഷനുകള്, വേഗത, റൂട്ടുകള് എന്നിവയുടെ തത്സമയ ട്രാക്കിംഗ് പ്രാപ്തമാക്കുന്ന സംയോജിത പ്ലാറ്റ്ഫോമും ഇതില് ഉള്പ്പെടുന്നു.
