സ്വയം നിയന്ത്രിത വാഹനങ്ങളുടെ കണ്ട്രോള് റൂം പ്രവര്ത്തനമാരംഭിച്ചു
Tue, 14 Jul 2026
ദുബൈ: ജബല് അലി തുറമുഖത്ത് നിന്നും ഹോര്മുസ് വഴിയുള്ള ചരക്ക് നീക്കം ഒഴിവാക്കുന്നതിന് യുഎഇയുടെ കിഴക്കന് തീരത്ത് പുതിയ തുറമുഖവും കണ്ടെയ്നര് ടെര്മിനലും നിര്മിക്കാന് ദുബൈ പദ്ധതിയിടുന്നു. ഡിപി വേള്ഡായിരിക്കും ഇതിന് ചുക്കാന് പിടിക്കുക. ഫുജൈറയിലെ തീരപ്രദേശത്ത് തികച്ചും പുതിയ ഒരു മള്ട്ടിപര്പ്പസ് തുറമുഖവും അതേ എമിറേറ്റിലെ നിലവിലെ ഹാര്ബറില് ഒരു പുതിയ ടെര്മിനലും വികസിപ്പിക്കുന്നതിനായി ദുബൈ ആസ്ഥാനമായുള്ള പോര്ട്ട് ഓപ്പറേറ്റര് ചര്ച്ചകള് നടത്തിവരികയാണെന്ന് ഇതുമായി ബന്ധപ്പെട്ട വൃത്തങ്ങള് അറിയിച്ചു.
കഴിഞ്ഞ രണ്ട് ദശകങ്ങളായി, ലോകമെമ്പാടുമുള്ള തുറമുഖങ്ങളുടെയും ലോജിസ്റ്റിക്സുകളുടെയും ഒരു വമ്പന് ശൃംഖല കെട്ടിപ്പടുക്കുന്നതിലൂടെ, അന്താരാഷ്ട്ര തലത്തില് യു.എ.ഇ-യുടെ ഏറ്റവും മികച്ച സ്ഥാപനങ്ങളിലൊന്നായി ഡിപി വേള്ഡ് മാറിയിട്ടുണ്ട്. തുറമുഖത്തിന്റെ ശേഷിയില് കുറച്ചുഭാഗം ദുബൈക്ക് പുറത്തേക്ക് മാറ്റുന്നത് എമിറേറ്റിനെ സംബന്ധിച്ചിടത്തോളം വലിയൊരു മാറ്റമാണ് അടയാളപ്പെടുത്തുന്നത്. കാരണം, ജബല് അലിയുടെ വളര്ച്ചയുടെ പിന്ബലത്തിലാണ് ദുബൈ ഒരു ആഗോള വ്യാപാര-സാമ്പത്തിക കേന്ദ്രമായി സ്വയം മാറിയത്. എന്നാല് ഡിപി വേള്ഡിന്റെ ഈ പുതിയ പദ്ധതികള് യു.എ.ഇ ഗവണ്മെന്റിന്റെ വിശാലമായ ലക്ഷ്യങ്ങളുമായി ഒത്തുപോകുന്നതാണ്. യു.എസ്-ഇസ്രായേല് ആക്രമണത്തിന് ശേഷം ഹോര്മുസ് കടലിടുക്കിലൂടെയുള്ള ചരക്കുനീക്കം കൂടുതല് സങ്കീര്ണതിയിലേക്ക് കടന്ന സാഹചര്യത്തിലാണ് പുതിയ നീക്കം. ഇറാനുമായുള്ള ഭാവിയിലെ ശത്രുതകളില് നിന്ന് തങ്ങളുടെ സമ്പദ്വ്യവസ്ഥയെ സംരക്ഷിക്കാനാണ് യു.എ.ഇ ഇതിലൂടെ ശ്രമിക്കുന്നത്. ഈ പുതിയ പദ്ധതി ഒമാന് ഉള്ക്കടലില് ഡിപി വേള്ഡിന്റെ സാന്നിധ്യം വര്ദ്ധിപ്പിക്കും. കണ്ടെയ്നറുകള്ക്ക് ഹോര്മുസ് കടലിടുക്കിലൂടെ കടന്നുപോകാതെ തന്നെ രാജ്യത്തേക്ക് പ്രവേശിക്കാനും പുറത്തുപോകാനും ഇത് സഹായിക്കും. തുടര്ന്ന് ഇവ ട്രക്കുകള് വഴി ദുബൈ അബുദാബി, അയല് ഗള്ഫ് രാജ്യങ്ങള് എന്നിവിടങ്ങളിലേക്ക് കരമാര്ഗ്ഗം എത്തിക്കാന് സാധിക്കും. ഇത്തിഹാദ് റെയിലിന്റെ ചരക്കുഗതാഗതം പൂര്ണമാകുന്നതോടെ കരമാര്ഗമുള്ള ചരക്കുനീക്കം എളുപ്പമാക്കും. ഹോര്മുസില് പ്രതിസന്ധി രൂക്ഷമായതോടെ ജബല് അലിയിലെ പ്രവര്ത്തനങ്ങള് 90 മുതല് 95 ശതമാനം വരെ കുറഞ്ഞു. ഇത് ജലപാതയ്ക്ക് പകരമുള്ള ബദല് മാര്ഗ്ഗങ്ങള് തേടാന് പോര്ട്ട് ഓപ്പറേറ്ററെ പ്രേരിപ്പിച്ചതായി ബന്ധപ്പെട്ടവര് പറഞ്ഞു. പുതിയ പദ്ധതിയുടെ ഘടനയും ധനസഹായവും ഇതുവരെ തീരുമാനിച്ചിട്ടില്ലെങ്കിലും, ഗവണ്മെന്റ് ഉദ്യോഗസ്ഥരുമായി ഡിപി വേള്ഡ് ഇപ്പോള് ഒരു ടേം ഷീറ്റ് ചര്ച്ച ചെയ്യുകയാണെന്ന് വൃത്തങ്ങള് അറിയിച്ചു. പുതിയ തുറമുഖം ഒന്നര വര്ഷത്തിനുള്ളില് പൂര്ത്തിയാക്കാന് കഴിയുമെന്ന് മുതിര്ന്ന കമ്പനി ഉദ്യോഗസ്ഥന് പറഞ്ഞു. യുദ്ധത്തിന് മുന്പ് കടലിടുക്കിലൂടെയുള്ള ഗതാഗതം പ്രതിദിനം ഏകദേശം 135 കപ്പലുകള് ആയിരുന്നു. എന്നാല് യു.എസും ഇറാനും ഒരു ഇടക്കാല വെടിനിര്ത്തലില് ഒപ്പുവെച്ചതിന് ശേഷം ജലപാത വീണ്ടും തുറന്നതായി പ്രഖ്യാപിച്ചെങ്കിലും, പ്രതിദിന ഗതാഗതം 40-ല് കൂടുതല് ആയിട്ടില്ല. പുതിയ ശത്രുതകള് ഗതാഗതം വീണ്ടും ഗണ്യമായി കുറയാന് കാരണമായി.
