ഡോളര് ദുര്ബലം; സ്വര്ണം ശക്തം; പവന് 2120 രൂപ വര്ധിച്ചു
Thu, 06 Aug 2026
ദുബൈ: സ്വര്ണവില ഉയര്ന്നു. അമേരിക്കന് ഡോളറിന്റെ മൂല്യം ഇടിഞ്ഞതും യുഎസ് ട്രഷറി ബോണ്ട് യീല്ഡുകള് കുറഞ്ഞതും മൂലം സ്വര്ണവില ഏഴ് ആഴ്ചയ്ക്കിടയിലെ ഏറ്റവും ഉയര്ന്ന നിലയിലെത്തി. തുടര്ച്ചയായ നാലാം ദിവസമാണ് സ്വര്ണവില ഉയരുന്നത്. ആഗോള വിപണിയില് സ്പോട്ട് ഗോള്ഡ്: ഔണ്സിന് 4,289.00 യുഎസ് ഡോളറായി. ജൂണ് 18ന് ശേഷമുള്ള ഏറ്റവും ഉയര്ന്ന നിരക്കാണിത്. യുഎസ് ഗോള്ഡ് ഫ്യൂച്ചേഴ്സ്: ഔണ്സിന് 4,345.50 യുഎസ് ഡോളറിലെത്തി. അമേരിക്കയുടെ 10 വര്ഷ കാലാവധിയുള്ള ട്രഷറി ബോണ്ടിന്റെ യീല്ഡ് കുറഞ്ഞതും യുഎസ് ഡോളര് ദുര്ബലമായതും മറ്റ് കറന്സികള് കൈവശമുള്ള നിക്ഷേപകര്ക്ക് സ്വര്ണം കൂടുതല് ആകര്ഷകമാക്കി. ആഗോള വിപണിയില് എണ്ണവിലയിലെ ചാഞ്ചാട്ടവും നിക്ഷേപകരെ സ്വര്ണത്തിലേക്ക് ആകര്ഷിച്ചു. കേരളത്തില് സ്വര്ണം പവന് 2120 രൂപ വര്ധിച്ചു. ഇപ്പോള് ഒരു പവന് സ്വര്ണത്തിന് 1,09,800 രൂപ നല്കണം.
