സ്വയം നിയന്ത്രിത വാഹനങ്ങളുടെ കണ്ട്രോള് റൂം പ്രവര്ത്തനമാരംഭിച്ചു
Tue, 14 Jul 2026
സനാ: ഇറാനില് നിന്നുള്ള ഒരു വിമാനം സനായിലെ അന്താരാഷ്ട്ര വിമാനത്താവളത്തില് ഇറങ്ങുന്നത് തടയുന്നതിനായി സര്ക്കാര് സേന വിമാനത്താവള റണ്വേ ലക്ഷ്യമിട്ട് ആക്രമണം നടത്തിയതായി യെമന്റെ അന്താരാഷ്ട്ര അംഗീകാരമുള്ള സര്ക്കാര് അറിയിച്ചു. യെമന് തലസ്ഥാനമായ സനായും വടക്കന് യെമന്റെ ഭൂരിഭാഗം പ്രദേശങ്ങളും, ചെങ്കടല് തീരത്തെ പ്രധാന തുറമുഖ നഗരമായ ഹുദൈദ ഉള്പ്പെടെ, ഇറാന് പിന്തുണയുള്ള ഹൂതി വിമതരുടെ നിയന്ത്രണത്തിലാണ്. അതേസമയം, സൗദി അറേബ്യയും മറ്റ് ഗള്ഫ് രാജ്യങ്ങളും പിന്തുണയ്ക്കുന്ന യെമന് സര്ക്കാര് തെക്കന് നഗരമായ ഏദനിലാണ് പ്രവര്ത്തിക്കുന്നത്. ഇറാന് ഭരണകൂടത്തിന്റെ പിന്തുണയുള്ള ഹൂതികള് യെമന് ദേശീയ വിമാനങ്ങളെ സനാ വിമാനത്താവളത്തില് ഇറങ്ങാന് അനുവദിച്ചില്ല. അതേസമയം ഇറാനിയന് വിമാനത്തെ യെമന് വ്യോമാതിര്ത്തി ലംഘിച്ച് ഇറക്കാന് ശ്രമിച്ചു. അതിനാലാണ് വിമാനത്താവള റണ്വേ ലക്ഷ്യമിട്ട് ആക്രമണം നടത്തിയതെന്ന് സര്ക്കാര് പുറത്തിറക്കിയ പ്രസ്താവനയില് പറഞ്ഞു. ആക്രമണത്തിന് മുമ്പ് പ്രതിരോധ മന്ത്രാലയം വിമാനത്താവളത്തിലും പരിസര പ്രദേശങ്ങളിലും ഉണ്ടായിരുന്ന സാധാരണക്കാര്, ജീവനക്കാര്, നയതന്ത്ര പ്രതിനിധികള്, മനുഷ്യാവകാശ-സഹായ സംഘടനകളുടെ പ്രവര്ത്തകര് എന്നിവര് ഉടന് ഒഴിഞ്ഞുപോകണമെന്ന് മുന്നറിയിപ്പ് നല്കിയിരുന്നു.
ആക്രമണത്തിന് മറുപടി നല്കുമെന്ന് ഹൂതി വിമതര് പ്രഖ്യാപിച്ചു. ആക്രമണത്തിന് സൗദി അറേബ്യയാണ് ഉത്തരവാദിയെന്ന് അവര് ആരോപിച്ചിട്ടുണ്ട്. ഈ ആക്രമണത്തിന് മറുപടിയും ശിക്ഷയും ഉണ്ടാകുമെന്ന് ഹൂതി സൈനിക വക്താവ് യഹ്യ സരീ പറഞ്ഞു. സംഭവത്തെക്കുറിച്ച് സൗദി അറേബ്യ ഇതുവരെ ഔദ്യോഗിക പ്രതികരണം നടത്തിയിട്ടില്ല. ഈ പുതിയ സംഭവവികാസം ഐക്യരാഷ്ട്രസഭയുടെ പിന്തുണയോടെ നിലവില് വന്ന വെടിനിര്ത്തലിന് ശേഷമുള്ള സംഘര്ഷം വീണ്ടും ശക്തമാകുമെന്ന ആശങ്ക ഉയര്ത്തിയിരിക്കുകയാണ്. 2015-ല് ഹൂതികള് സനാ പിടിച്ചടക്കി സര്ക്കാരിനെ പുറത്താക്കിയതിനെ തുടര്ന്നാണ് സൗദി നേതൃത്വത്തിലുള്ള സഖ്യസേന യെമനില് സൈനിക ഇടപെടല് ആരംഭിച്ചത്. വര്ഷങ്ങളായി തുടരുന്ന യുദ്ധം ലക്ഷക്കണക്കിന് ആളുകളെ കുടിയൊഴിപ്പിക്കുകയും രാജ്യത്തിന്റെ അടിസ്ഥാന സൗകര്യങ്ങള് തകര്ക്കുകയും ചെയ്തിട്ടുണ്ട്. ലോകത്തിലെ ഏറ്റവും ഗുരുതരമായ മാനുഷിക പ്രതിസന്ധികളിലൊന്നായി യെമനിലെ സാഹചര്യം ഐക്യരാഷ്ട്രസഭ വിശേഷിപ്പിക്കുന്നു.
