വിദ്യാഭ്യാസ മന്ത്രി ഇടപെട്ടു; എല്പിഎസ്ടി സമരം അവസാനിപ്പിച്ചു
Tue, 11 Aug 2026
അബുദാബി: അമ്മ നഷ്ടപ്പെട്ട കുട്ടിയെ സംരക്ഷിക്കാന് ആര് സംരക്ഷിക്കുമെന്ന കേസില് അപൂര്വ വിധിയുമായി അബുദാബി കോടതി. പ്രവാസി കുടുംബത്തില് പ്രതിസന്ധിയിലായ കുട്ടിക്കാണ് അനുയോജ്യമായ സംരക്ഷണം ഉറപ്പാക്കി കോടതിയുടെ ഉത്തരവ്. കേസില് പിതാവ് കുട്ടിയെ പരിചരിക്കാന് അനുയോജ്യനല്ലെന്ന് കോടതി കണ്ടെത്തിയതിനാല്, കുട്ടിയെ ഇതിനകം പരിചരിച്ചുവരുന്ന അമ്മായിക്കും അവരുടെ ഭര്ത്താവിനും പൂര്ണ നിയമപരവും ശാരീരികവുമായ കസ്റ്റഡി നല്കി. പ്രത്യേകിച്ച് പിതാവിന്റെ ഒപ്പില്ലാതെ പാസ്പോര്ട്ട്, ഐഡി രേഖകള് തുടങ്ങിയവ പുതുക്കാനുള്ള അധികാരം അമ്മായിക്ക് നല്കിയതാണ് ഈ വിധിയുടെ പ്രധാന പ്രത്യേകത. കുട്ടിയുടെ ഏറ്റവും നല്ല താല്പര്യം പരിഗണിക്കുമ്പോള്, അമ്മായിയോടും അവരുടെ ഭര്ത്താവിനോടും ഒപ്പം യുഎഇയില് തുടരുന്നതാണ് ഉചിതമെന്ന് കോടതി വിലയിരുത്തി. കുട്ടിക്ക് ബുദ്ധിമുട്ടുകളും മോശം അനുഭവങ്ങളും ഉണ്ടായിരുന്ന സാഹചര്യത്തില് നിന്ന് അകന്ന് സുരക്ഷിതമായ അന്തരീക്ഷത്തില് വളരാന് ഇത് സഹായിക്കുമെന്നും കോടതി പറഞ്ഞു. പുതിയ തരത്തിലുള്ള സുപ്രധാന വിധിയാണ് അബുദാബി സിവില് ഫാമിലി കോടതി ഒരു പ്രവാസി കുട്ടിയുടെ അമ്മായിക്ക് പൂര്ണമായ നിയമപരവും ശാരീരികവുമായ കസ്റ്റഡിയിലൂടെ നല്കിയിരിക്കുന്നത്. ജൂലൈ 23ലെ വിധി പ്രകാരം, പിതാവിന്റെ ഒപ്പില്ലാതെ തന്നെ കുട്ടിയുടെ തിരിച്ചറിയല് രേഖകള്ക്കും മറ്റ് ഔദ്യോഗിക രേഖകള്ക്കും അപേക്ഷിക്കാനും അവ പുതുക്കാനും അമ്മായിക്ക് സാധിക്കും. സമാന സാഹചര്യങ്ങളിലുള്ള പ്രവാസി കുടുംബങ്ങള്ക്ക് ഈ അധികാരം വളരെ പ്രധാനപ്പെട്ടതാണെന്ന് അഭിഭാഷകര് പറഞ്ഞു.
കുടുംബത്തെ പ്രതിനിധീകരിച്ച അഭിഭാഷകന് ബൈറണ് ജെയിംസ് പറഞ്ഞു, അബുദാബി സിവില് ഫാമിലി കോടതി ഒരു മാതാപിതാവല്ലാത്ത ബന്ധുവിന് കുട്ടിയുടെ പൂര്ണ ശാരീരികവും നിയമപരവുമായ കസ്റ്റഡി നല്കുകയും, മാതാപിതാവിന്റെ സഹായമില്ലാതെ കുട്ടിയുടെ തിരിച്ചറിയല് രേഖകള് പുതുക്കാനുള്ള അധികാരം നല്കുകയും ചെയ്ത ആദ്യത്തെ വിധിയാണ്. ‘മാതാപിതാക്കളല്ലാത്ത ഒരാള്ക്ക് കസ്റ്റഡി നല്കുന്നത് അസാധാരണമാണ്. സാധാരണയായി കസ്റ്റഡിയുടെ ആദ്യ പരിഗണന മാതാപിതാക്കള്ക്കാണ്. അതിനാല് മാതാപിതാക്കളില് യോജിച്ചൊരു ബദല് ഇല്ലെന്ന് കോടതി ബോധ്യപ്പെടുമ്പോഴാണ് ഇത്തരം വിധി ഉണ്ടാകുന്നത്,’ ജെയിംസ് പറഞ്ഞു. കേസിലെ കുട്ടി ഇതിനകം തന്നെ തന്റെ അമ്മായിയോടും അവരുടെ ഭര്ത്താവിനോടും ഒപ്പം യുഎഇയില് താമസിച്ചുവരികയായിരുന്നു. കുട്ടിയുടെ പിതാവ് വിദേശത്താണ് താമസിച്ചിരുന്നത്. കോടതി രേഖകള് പ്രകാരം, കുട്ടിയുടെ അമ്മ 2021ല് അമിതമായ മദ്യപാനത്തെ തുടര്ന്ന് ഉണ്ടായ കരള് തകരാറിനെ തുടര്ന്ന് മരിച്ചു. കുട്ടിയുടെ പിതാവ് നിരവധി കേസുകളില് തടവ് ശിക്ഷയനുഭവിച്ചിട്ടുണ്ടെന്നും കോടതി കണ്ടെത്തിയിരുന്നു. പിതാവിനൊപ്പം സുരക്ഷിതമല്ലെന്നും വ്യക്തമായിരുന്നു. കുട്ടിക്ക് സ്ഥിരതയുള്ള വീട്, വിദ്യാഭ്യാസം, മാനസിക പിന്തുണ, ദൈനംദിന പരിചരണം എന്നിവ നല്കുന്നത് തങ്ങളും ഭര്ത്താവുമാണെന്ന് അമ്മായി കോടതിയെ അറിയിച്ചു.
അബുദാബിയിലെ സാധുവായ വാടക കരാര് ഉള്പ്പെടെയുള്ള രേഖകളും കുട്ടിക്ക് സ്ഥിരമായ താമസവും സുരക്ഷാ നിയന്ത്രണവും അനുയോജ്യമായ വിദ്യാഭ്യാസ ആസൂത്രണവും ആവശ്യമാണെന്ന് വ്യക്തമാക്കുന്ന വിദഗ്ധരുടെ വിലയിരുത്തലുകളും അവര് കോടതിയില് സമര്പ്പിച്ചു. കേസ് നടപടികളെക്കുറിച്ച് പിതാവിനെ ഔദ്യോഗികമായി അറിയിച്ചിരുന്നെങ്കിലും അദ്ദേഹം ഒരു ഹിയറിംഗിലും ഹാജരായില്ല. അപേക്ഷയെ എതിര്ക്കുകയും ചെയ്തില്ല. കുട്ടിയെ പരിചരിക്കാന് അമ്മായിയും അവരുടെ ഭര്ത്താവുമാണ് ഏറ്റവും അനുയോജ്യരായ ആളുകളെന്ന് അദ്ദേഹം സമ്മതിച്ചതായി കരുതുന്ന ഒരു എഴുത്തുപ്രസ്താവനയും കോടതി പരിഗണിച്ചു. അബുദാബിയിലെ സിവില് മാരേജ് ആന്ഡ് ഡിവോഴ്സ് പ്രൊസീജേഴ്സ് റെഗുലേഷനിലെ ആര്ട്ടിക്കിള് 43 ആണ് കോടതി പ്രധാനമായും പരിഗണിച്ചത്. ഈ വിധി പ്രവാസി കുടുംബങ്ങള്ക്ക് വലിയ പ്രാധാന്യമുള്ളതാണ്. ഒരു മാതാപിതാവ് മരിക്കുകയോ, കുട്ടിയില് നിന്ന് അകന്ന് കഴിയുകയോ, കുട്ടിയെ പരിചരിക്കാന് കഴിവില്ലാത്ത അവസ്ഥയിലാകുകയോ ചെയ്യുമ്പോള് ബന്ധുക്കള് കുട്ടിയുടെ ഉത്തരവാദിത്തം ഏറ്റെടുക്കുന്ന സംഭവങ്ങള് പ്രവാസി കുടുംബങ്ങളില് പലരും കരുതുന്നതിലും കൂടുതലാണെന്ന് അഭിഭാഷകന് ജെയിംസ് പറഞ്ഞു.
എന്നാല് കുടുംബങ്ങള് തമ്മിലുള്ള അനൗപചാരിക ധാരണകള്ക്കും സ്വന്തം രാജ്യത്ത് നിന്നുള്ള ഗാര്ഡിയന്ഷിപ്പ് രേഖകള്ക്കും യുഎഇയിലെ സ്കൂളുകള്, ആശുപത്രികള്, ഇമിഗ്രേഷന് അധികാരികള് എന്നിവയ്ക്ക് മുന്നില് സ്വതവേ നിയമപരമായ അംഗീകാരം ലഭിക്കണമെന്നില്ല. കുടുംബങ്ങള് പലപ്പോഴും ഈ പ്രശ്നം തിരിച്ചറിയുന്നത് ഏറ്റവും മോശമായ സമയത്താണെന്ന് അദ്ദേഹം പറഞ്ഞു. ഈ വിധി ഇത്തരം പ്രായോഗിക പ്രശ്നങ്ങളില് പലതും പരിഹരിക്കുന്നതായി അദ്ദേഹം വ്യക്തമാക്കി. കാരണം യുഎഇയില് പ്രാദേശികമായി അംഗീകരിക്കപ്പെട്ട കോടതി ഉത്തരവ് ലഭിക്കുന്നതിലൂടെ കുട്ടിയെ സ്കൂളില് ചേര്ക്കാനും, ചികിത്സയ്ക്ക് സമ്മതം നല്കാനും, താമസ വിസ സ്പോണ്സര് ചെയ്യാനും, ഔദ്യോഗിക തിരിച്ചറിയല് രേഖകള് പുതുക്കാനും കൂടുതല് എളുപ്പമാകും.
