ഐ.ഐ.സി നാനോ ഫുട്ബോള് ടൂര്ണമെന്റ് സെപ്റ്റംബര് 27 ന്; ട്രോഫി റിവീല് ചെയ്തു
Sat, 26 Sep 2026
നഗോയ: ഐച്ചി-നഗോയ ഏഷ്യന് ഗെയിംസില് യുഎഇയുടെ മെഡല് നേട്ടത്തിന് തുടക്കം. പുരുഷന്മാരുടെ 400 മീറ്റര് ഫൈനലില് സുലൈമാന് അബ്ദുല്റഹ്മാന് വെള്ളി മെഡല് നേടി. 44.99 സെക്കന്ഡിലാണ് സുലൈമാന് ഫിനിഷ് ചെയ്തത്. സ്വര്ണം നേടിയ തായ്ലന്ഡിന്റെ ജോഷ്വ അറ്റ്കിന്സണ് 44.90 സെക്കന്ഡില് ഫിനിഷ് ചെയ്തു. വെറും 0.09 സെക്കന്ഡിന്റെ വ്യത്യാസത്തിലാണ് യുഎഇ താരത്തിന് സ്വര്ണം നഷ്ടമായത്. യുഎഇയുടെ മറ്റൊരു താരം ഇമ്മാനുവല് ബമിഡെലെ 45.97 സെക്കന്ഡില് മത്സരം പൂര്ത്തിയാക്കി. ഏഷ്യന് ഗെയിംസിലെ യുഎഇയുടെ ആദ്യ മെഡലാണിത്. യുഎഇ അത്ലറ്റിക്സ് ഫെഡറേഷന് പ്രസിഡന്റ് മേജര് ജനറല് ഡോ. മുഹമ്മദ് അബ്ദുല്ല അല് മര് സുലൈമാന്റെ പ്രകടനത്തെ അഭിനന്ദിച്ചു. ‘മത്സരത്തിന്റെ ഉയര്ന്ന നിലവാരവും ഒന്നാം സ്ഥാനത്തേക്കുള്ള വളരെ ചെറിയ വ്യത്യാസവും കണക്കിലെടുക്കുമ്പോള് ഞങ്ങള്ക്ക് ഈ വെള്ളി സ്വര്ണത്തിന് തുല്യമാണ്,’ അല് മര് പറഞ്ഞു.
കുതിരസവാരിയിലും യുഎഇക്ക് മുന്നേറ്റം
ഇക്വസ്ട്രിയന് വിഭാഗത്തില് അലി ഖല്ഫാന് അല് ജഹൂരിയും ബിയാങ്ക ഷൂട്സും വ്യക്തിഗത ഡ്രസാജ് ഫൈനലിന് യോഗ്യത നേടി. രണ്ട് യോഗ്യതാ റൗണ്ടുകളിലായി മികച്ച 15 കോമ്പിനേഷനുകളില് ഇടം നേടിയതോടെയാണ് ഇരുവരും ഫൈനലിലെത്തിയത്. അല് ജഹൂരി LotusS എന്ന കുതിരയുമായി 65.706 ശതമാനം സ്കോര് നേടി. ആകെ സ്കോര് 132.736 ആയി. ഷൂട്സും Le Grand Ayden HBയും 66.059 ശതമാനം നേടി, ആകെ 132.706 പോയിന്റിലെത്തി.
ഒരേ ഏഷ്യന് ഗെയിംസ് പതിപ്പില് വ്യക്തിഗത ഫ്രീസ്റ്റൈല് ഫൈനലിലേക്ക് രണ്ട് യുഎഇ താരങ്ങള് ഒരുമിച്ച് യോഗ്യത നേടുന്നത് ആദ്യമായാണ്.
അമ്പെയ്ത്തിലും യുഎഇ താരങ്ങള് രംഗത്ത്
റിക്കര്വ് വിഭാഗത്തില് പുരുഷന്മാരുടെ വ്യക്തിഗത യോഗ്യതാ റൗണ്ടില് ഖലീഫ അല് കഅബി 643 പോയിന്റ് നേടി. വനിതകളില് ഐഷ അല് അലി 624, ഹെസ്സ അല് അവാദി 600, ഹുദ അല് അലി 539 പോയിന്റുകള് നേടി. വനിതാ കോമ്പൗണ്ടില് അമ്ന അല് അവാദി 691, ജുമാന അല് നജ്ജാര് 675, മൈഥ അല് നുഐമി 626 പോയിന്റുകള് നേടി. പുരുഷ കോമ്പൗണ്ടില് അബ്ദുല്ല അല് മന്സൂരി 668, സുല്ത്താന് അല് മന്ഹലി 665, യൂസഫ് അല് ഹൊസാനി 645 പോയിന്റ് നേടി.
നാളത്തെ മത്സരങ്ങള്
ഷൂട്ടിങ്ങില് ശൈഖ് മുഹമ്മദ് ബിന് ദല്മൂഖ് അല് മക്തൂമും യഹ്യ സുഹൈല് അല് മുഹൈരിയും പുരുഷന്മാരുടെ ട്രാപ്പ് യോഗ്യതാ മത്സരത്തില് പങ്കെടുക്കും. അതേസമയം, അത്ലറ്റിക്സില് മറിയം കരീം വനിതകളുടെ 400 മീറ്റര് ഹര്ഡില്സ് യോഗ്യതാ റൗണ്ടില് മത്സരിക്കും. ഫെന്സിങ്ങില് യുഎഇയുടെ പുരുഷ എപ്പി ടീം മത്സരിക്കും. കുതിരസവാരിയില് അല് ജഹൂരിയും ഷൂട്സും ഡ്രസാജ് ഫ്രീസ്റ്റൈല് ഫൈനലില് ഇറങ്ങും. അമ്പെയ്ത്തില് യുഎഇ പുരുഷ കോമ്പൗണ്ട് ടീം റൗണ്ട് ഓഫ് 16ല് ഇന്ത്യയെ നേരിടും. വനിതാ ടീം ദക്ഷിണ കൊറിയയെയും നേരിടും. കോമ്പൗണ്ട് മിക്സഡ് ടീം ഇനത്തില് അമ്ന അല് അവാദിയും അബ്ദുല്ല അല് മന്സൂരിയും ചൈനക്കെതിരെയും മത്സരിക്കും.
