ഫിഫ ഗ്ലോബല് സിറ്റിസണ് വിദ്യാഭ്യാസ ഫണ്ടിന് 5 മില്യണ് ഡോളര് വാഗ്ദാനം ചെയ്ത് യുഎഇ
Sat, 18 Jul 2026
ടെഹ്റാന്: ഹോര്മുസ് കടലിടുക്കിലൂടെ കടന്നുപോകുകയായിരുന്ന രണ്ട് എണ്ണ ടാങ്കറുകള് മൈനുകളില് തട്ടി പൊട്ടിത്തെറിച്ചതായി ഇറാന്റെ റെവല്യൂഷണറി ഗാര്ഡുകള് ശനിയാഴ്ച പറഞ്ഞു, എന്നാല് ഈ അവകാശവാദം യുഎസ് സൈന്യം നിഷേധിച്ചു. അമേരിക്കന് രഹസ്യാന്വേഷണ ഏജന്സികളുടെ നിര്ദ്ദേശങ്ങള് പ്രകാരം ഹോര്മുസ് കടലിടുക്കിന് തെക്കുള്ള മൈന്ഫീല്ഡിലൂടെ കടന്നുപോകാന് ശ്രമിച്ച രണ്ട് എണ്ണ ടാങ്കറുകളാണ് പൊട്ടിത്തെറിച്ചതെന്ന് ഇറാന് വ്യക്തമാക്കി. ടാങ്കറുകള് ഏതാണെന്ന് വ്യക്തമാക്കാതെയാണ് ഇറാന് വാര്ത്താ ഏജന്സിയായ ഇര്ന റിപ്പോര്ട്ട് ചെയ്തിരിക്കുന്നത്. നാവികര് വഞ്ചിതരായി മൈന്ഫീല്ഡില് പ്രവേശിക്കരുതെന്നും മുന്നറിയിപ്പ് നല്കി.
എന്നാല് ഇറാന് അവകാശവാദത്തെ യുഎസ് സെന്ട്രല് കമാന്ഡ് നിഷേധിച്ചു. ഇരുരാജ്യങ്ങളും തമ്മില് ഹോര്മുസില് പരസ്പരം പോരുകളും അവകാശവാദങ്ങളും തുടരുമ്പോള് ഇതുവഴിയുള്ള കപ്പല്ഗതാഗതം കൂടുതല് സങ്കീര്ണമായിരിക്കുകയാണ്. അമേരിക്ക സംരക്ഷിക്കാന് ശ്രമിക്കുന്ന തെക്കന് ഇടനാഴികള് ഉപയോഗിക്കാതെ, കടലിടുക്കിന്റെ വടക്കുഭാഗത്ത് തങ്ങളുടെ തീരത്തോട് ചേര്ന്നുള്ള പാതകള് മാത്രമേ ഉപയോഗിക്കാവൂ എന്ന് ടാങ്കറുകള്ക്കും ചരക്ക് കപ്പലുകള്ക്കും ഇറാന് മുന്നറിയിപ്പ് നല്കുന്നുണ്ട്. കടലിടുക്കിലെ കപ്പല് ഗതാഗതത്തിനെതിരെയുള്ള ഇറാന്റെ ഭീഷണികള്ക്ക് മറുപടിയായി, ഇറാനിയന് തുറമുഖങ്ങള്ക്കെതിരെ യുഎസ് നാവിക ഉപരോധം പുനഃസ്ഥാപിച്ചു. കടലിടുക്കിനെ നിരീക്ഷിക്കാനും ഭീഷണിപ്പെടുത്താനുമുള്ള ടെഹ്റാന്റെ കഴിവുകളെ ദുര്ബലപ്പെടുത്തുക എന്ന ലക്ഷ്യത്തോടെ ഇറാനിലെ ലക്ഷ്യസ്ഥാനങ്ങളില് അവര് രാത്രികാല വ്യോമാക്രമണങ്ങളും നടത്തിവരുന്നു. കപ്പലുകള് പൊട്ടിത്തെറിച്ചെന്നും ഇല്ലെന്നുമുള്ള അവകാശവാദങ്ങള് ഉണ്ടെങ്കിലും ഇക്കാര്യത്തില് സ്ഥിരീകരണമുണ്ടായിട്ടില്ല.
