വിമാന സര്‍വീസുകള്‍ കൂട്ടത്തോടെ റദ്ദാക്കി; സൗദി യാത്ര പ്രതിസന്ധിയില്‍
Sat, 24 Oct 2026
ബ്യൂണസ് ഐറിസ്: അന്താരാഷ്ട്ര മത്സരങ്ങളില്‍ നിന്ന് വിരമിച്ച ഇതിഹാസ താരം ലയണല്‍ മെസിയോടുള്ള ആദരമായി പത്താം മിനിറ്റില്‍ ഫുട്‌ബോള്‍ മത്സരങ്ങള്‍ ഒരു മിനിറ്റ് നിര്‍ത്തിവയ്ക്കാന്‍ അര്‍ജന്റീന ഫുട്‌ബോള്‍ അസോസിയേഷന്‍ (എഎഫ്എ). റഫറിമാര്‍ കളി നിര്‍ത്തിവെക്കുന്നതോടൊപ്പം ഒരു മിനിറ്റ് എല്ലാവരും കയ്യടിക്കുമെന്നും എഎഫ്എ അറിയിച്ചു. ഈ വാരാന്ത്യത്തില്‍ നടക്കുന്ന മത്സരങ്ങളുടെ 10ാം മിനിറ്റിലാണ് കളി നിര്‍ത്തിവെക്കുക. അര്‍ജന്റീനയെ പ്രതിനിധീകരിക്കുമ്പോള്‍ മെസി ധരിച്ചിരുന്ന പത്താം നമ്പര്‍ ജേഴ്‌സിയോടുള്ള ആദരസൂചകമായാണ് കളിയുടെ പത്താമത്തെ മിനിറ്റ് മാറ്റിവയ്ക്കുന്നത്.
2022ല്‍ അര്‍ജന്റീനയെ ലോകകപ്പ് കിരീടത്തിലേക്ക് നയിച്ച താരം ഏതാനും ദിവസം മുമ്പാണ് അപ്രതീക്ഷിത വിരമിക്കല്‍ പ്രഖ്യാപനം നടത്തിയത്. ഇതോടെയാണ് വാരാന്ത്യത്തില്‍ രാജ്യത്ത് നടക്കുന്ന എല്ലാ ഫുട്‌ബോള്‍ മത്സരങ്ങളും പത്താം മിനിറ്റില്‍ നിര്‍ത്തിവെച്ച് ആദരമര്‍പ്പിക്കാന്‍ എഎഫ്എ തീരുമാനിച്ചത്. സ്‌ക്രീന്‍ സൗകര്യമുള്ള സ്റ്റേഡിയങ്ങളില്‍ മത്സരങ്ങള്‍ക്ക് മുന്നോടിയായി മെസിയുടെ കരിയറിലെ വിവിധ ഘട്ടങ്ങള്‍ കോര്‍ത്തിണക്കിയ രണ്ട് മിനിറ്റോളം ദൈര്‍ഘ്യമുള്ള യാത്രയയപ്പ് വീഡിയോയും പ്രദര്‍ശിപ്പിക്കും.
2006 മുതല്‍ 2026 വരെയുള്ള ആറ് ലോകകപ്പുകളില്‍ മെസി കളിച്ചിട്ടുണ്ട്. 34 മത്സരങ്ങളില്‍ നിന്നായി 21 ഗോളുകള്‍ നേടി. 2026ലെ ലോകകപ്പില്‍ അള്‍ജീരിയക്കെതിരെ തന്റെ ആദ്യ ലോകകപ്പ് ഹാട്രിക്ക് ഉള്‍പ്പെടെ എട്ട് ഗോളുകളും നാല് അസിസ്റ്റുകളും നേടി. എട്ടുതവണ ബാലണ്‍ ഡി ഓര്‍ നേടിയ മെസി, അന്താരാഷ്ട്ര ഫുട്‌ബോളില്‍ നിന്ന് വിരമിച്ചെങ്കിലും മേജര്‍ ലീഗ് സോക്കറില്‍ ഇന്റര്‍ മയാമിക്കൊപ്പം തന്റെ ക്ലബ്ബ് കരിയര്‍ തുടരും.
