ഇത് ഞമ്മടെ പീട്യ! ദുബൈയില്‍ മാതാപിതാക്കള്‍ക്ക് ഹനാന്‍ ഷായുടെ വമ്പന്‍ സര്‍പ്രൈസ്
Tue, 10 Nov 2026
ന്യൂഡല്‍ഹി: 2004-ലെ ലോക്സഭാ തിരഞ്ഞെടുപ്പില്‍ കോണ്‍ഗ്രസ് നേതൃത്വത്തിലുള്ള യു.പി.എ സഖ്യം വിജയിച്ചതിന് പിന്നാലെ പ്രധാനമന്ത്രി പദത്തില്‍ നിന്ന് പിന്മാറാന്‍ എടുത്ത തീരുമാനത്തിന് പിന്നിലെ സാഹചര്യങ്ങള്‍ വ്യക്തമാക്കി കോണ്‍ഗ്രസ് നേതാവ് സോണിയ ഗാന്ധി. ‘ബിലോഗിങ്: എ ജേര്‍ണി ഓഫ് ലൗ’ എന്ന തന്റെ പുതിയ ആത്മകഥയിലാണ് അവര്‍ ഇക്കാര്യം വെളിപ്പെടുത്തിയിരിക്കുന്നത്. ചൊവ്വാഴ്ച രാജ്യത്തുടനീളമുള്ള പുസ്തകശാലകളില്‍ എത്തിയ പുസ്തകത്തില്‍, ദേശീയ രാഷ്ട്രീയത്തെ സ്വാധീനിച്ച ആ നിര്‍ണായക തീരുമാനത്തെക്കുറിച്ചും അന്നത്തെ സംഭവവികാസങ്ങളെക്കുറിച്ചും സോണിയ ഗാന്ധി വിശദീകരിക്കുന്നുണ്ട്.
പ്രധാനമന്ത്രിയാകാനില്ലെന്ന തീരുമാനമെടുത്ത ഉടന്‍ മകന്‍ രാഹുല്‍ ഗാന്ധിയുടെ മുറിയിലെത്തി വിവരം പറഞ്ഞതിനെക്കുറിച്ചും അവര്‍ പറയുന്നുണ്ട്. ‘ഞാന്‍ രാഹുലിന്റെ മുറിയില്‍ ചെന്ന് വാതിലില്‍ മുട്ടി. ‘ഞാന്‍ തീരുമാനമെടുത്തു. എന്റെ നിലപാടില്‍ ഞാന്‍ ഉറച്ചുനില്‍ക്കും’ എന്ന് ഞാന്‍ അവനോട് പറഞ്ഞു. അവന്‍ എന്റെ അരികിലേക്ക് വന്ന് കെട്ടിപ്പിടിച്ചുകൊണ്ട് പറഞ്ഞു, ‘അത് ശരിയായ തീരുമാനമാണ്’. തുടര്‍ന്ന് കോണ്‍ഗ്രസ് പാര്‍ലമെന്ററി പാര്‍ട്ടി യോഗത്തിലേക്ക് താന്‍ എത്തിയതും, അവിടെ അംഗങ്ങള്‍ എഴുന്നേറ്റുനിന്ന് കരഘോഷത്തോടെ തന്നെ സ്വീകരിച്ചതും സോണിയ ഓര്‍ത്തെടുക്കുന്നു.
പുതിയ സര്‍ക്കാരിനെ നയിക്കാന്‍ കഴിവുള്ള ഒരാളെ കണ്ടെത്തേണ്ടതുണ്ടായിരുന്നു. മുതിര്‍ന്ന നേതാക്കള്‍ പലരും ആ പദവിക്ക് യോഗ്യരായിരുന്നുവെങ്കിലും മന്‍മോഹന്‍ സിങ്ങാണ് അതിന് ഏറ്റവും അനുയോജ്യനെന്ന് തനിക്ക് തോന്നിയെന്ന് സോണിയ ഗാന്ധി വ്യക്തമാക്കുന്നു.
‘പാര്‍ട്ടിയില്‍ ഏതെങ്കിലും പ്രത്യേക ഗ്രൂപ്പില്‍ ഉള്‍പ്പെടാത്ത വ്യക്തിയായിരുന്നു അദ്ദേഹം. അന്നത്തെ സര്‍ക്കാരിന് കമ്മ്യൂണിസ്റ്റ് പാര്‍ട്ടികളുടെ പിന്തുണയും ഉണ്ടായിരുന്നു. നയങ്ങള്‍ കൃത്യമായി നടപ്പിലാക്കാന്‍ മന്‍മോഹന്‍ സിങ്ങിന് കഴിയുമെന്ന് ഞാന്‍ വിശ്വസിച്ചു. അക്കാലത്ത് ഇന്ത്യയുടെ ധനകാര്യ മന്ത്രിയെന്ന നിലയിലുള്ള അദ്ദേഹത്തിന്റെ അനുഭവസമ്പത്തും, അഴിമതികളില്ലാത്ത വ്യക്തിത്വവും, ഭരണരംഗത്തെ ആഴത്തിലുള്ള അറിവും അദ്ദേഹത്തെ ഈ പദവിയിലേക്ക് തെരഞ്ഞെടുക്കാന്‍ കാരണമായെന്ന് സോണിയ കൂട്ടിച്ചേര്‍ത്തു.
