മ്യൂസിയം ഓഫ് ദ ഫ്യൂച്ചര് സെപ്റ്റംബര് 1 മുതല് താല്ക്കാലികമായി അടച്ചിടും; തുറക്കുമ്പോള് പുതിയ അനുഭവങ്ങള്
Tue, 25 Aug 2026
ബെയ്ജിങ്: ഇറാനുമായി വ്യാപാരം നടത്തുന്ന രാജ്യങ്ങള്ക്കും സ്ഥാപനങ്ങള്ക്കുമെതിരെ അമേരിക്ക ഉപരോധം ഏര്പ്പെടുത്തുമെന്ന ഭീഷണിയെ ചൈന ശക്തമായി എതിര്ത്തു. ഇത്തരം ഏകപക്ഷീയ ഉപരോധങ്ങള് നിയമവിരുദ്ധമാണെന്നും സ്വന്തം താല്പര്യങ്ങള് സംരക്ഷിക്കാന് ‘ആവശ്യമായ എല്ലാ നടപടികളും’ സ്വീകരിക്കുമെന്നും ചൈന മുന്നറിയിപ്പ് നല്കി. ചൈനയും ഇറാനും തമ്മിലുള്ള സഹകരണം അന്താരാഷ്ട്ര നിയമത്തിന്റെ പരിധിയിലാണ് നടക്കുന്നതെന്നും അതില് പുറത്തുനിന്നുള്ള ഇടപെടല് അംഗീകരിക്കാനാകില്ലെന്നും ചൈനീസ് വിദേശകാര്യ മന്ത്രാലയ വക്താവ് ലിന് ജിയാന് പറഞ്ഞു.
ഇറാന്റെ എണ്ണ കയറ്റുമതിയുടെ ഏകദേശം 80 ശതമാനവും ചൈന വാങ്ങുന്നതായാണ് കണക്കാക്കുന്നത്. മുന്കാലത്തും ഇറാന്റെ എണ്ണവരുമാനം തടയാനുള്ള യുഎസ് ശ്രമങ്ങളെ ചൈന എതിര്ത്തിട്ടുണ്ട്. ഇറാനുമായി വ്യാപാരം തുടരുന്ന സ്ഥാപനങ്ങള്ക്കെതിരെ തിങ്കളാഴ്ച യുഎസ് ട്രഷറി സെക്രട്ടറി സ്കോട്ട് ബെസന്റ് പുതിയ ഉപരോധങ്ങള് പ്രഖ്യാപിച്ചു. ഇറാനുമായുള്ള വ്യാപാരത്തില് പങ്കാളികളാണെന്ന് ആരോപിക്കപ്പെടുന്ന 60 വ്യക്തികള്, സ്ഥാപനങ്ങള്, കപ്പലുകള് എന്നിവയാണ് ആദ്യഘട്ടത്തില് പട്ടികയില് ഉള്പ്പെട്ടത്. എന്നാല് ഇറാന്റെ എണ്ണവ്യാപാരത്തിന് ധനസഹായം നല്കുന്ന ചൈനീസ് ധനകാര്യ സ്ഥാപനങ്ങളെ പട്ടികയില് ഉള്പ്പെടുത്തിയില്ല. ചൈനയുമായി നേരിട്ടുള്ള സാമ്പത്തിക ഏറ്റുമുട്ടല് ഒഴിവാക്കാനുള്ള യുഎസ് ജാഗ്രതയാണ് ഇതിന് പിന്നിലെന്നാണ് വിലയിരുത്തല്.
ഈ വിഷയത്തില് ചൈന തിരിച്ചടിച്ചാല് ആഗോള വിപണിയെ ബാധിച്ചേക്കും. ചൈനയ്ക്കെതിരെ കടുത്ത സാമ്പത്തിക നടപടിയെടുത്താല് ചൈന തിരിച്ചടിക്കാനുള്ള സാധ്യത യുഎസ് ഭരണകൂടം കണക്കിലെടുക്കുന്നുണ്ട്. ധനവിപണികളിലൂടെയോ നിര്ണായക ധാതുക്കളുടെ കയറ്റുമതിയില് നിയന്ത്രണം ഏര്പ്പെടുത്തുന്നതിലൂടെയോ ചൈന പ്രതികരിച്ചേക്കാം. അടുത്ത മാസം യുഎസ് പ്രസിഡന്റ് ഡൊണാള്ഡ് ട്രംപും ചൈനീസ് പ്രസിഡന്റ് ഷി ജിന്പിങ്ങും തമ്മില് ഉച്ചകോടി നടക്കാനിരിക്കെ, ഇരു രാജ്യങ്ങളും തമ്മിലുള്ള സാമ്പത്തിക സംഘര്ഷം കൂടുതല് രൂക്ഷമാകുന്നത് യുഎസിന് വലിയ വെല്ലുവിളിയാകും. അതിനിടെ, ഹോര്മുസ് കടലിടുക്കിന്റെ പ്രവര്ത്തനം ഏതാണ്ട് നിലച്ച നിലയിലാണ്. തിങ്കളാഴ്ച രണ്ട് വാണിജ്യ കപ്പലുകള്ക്ക് മാത്രമാണ് കടലിടുക്ക് വിജയകരമായി കടക്കാനായത്. ചൊവ്വാഴ്ച കടലിടുക്കിന്റെ പ്രവേശന ഭാഗത്ത് ഒരു എണ്ണക്കപ്പലിന് അജ്ഞാത പ്രൊജക്ടൈല് പതിച്ചതായും റിപ്പോര്ട്ടുണ്ട്. ഹോര്മുസിലെ തടസ്സം തുടരുന്നത് എണ്ണവിലയിലും ആഗോള സമ്പദ്വ്യവസ്ഥയിലും വലിയ പ്രത്യാഘാതം ഉണ്ടാക്കാനുള്ള സാധ്യതയുണ്ട്. നവംബറിലെ യുഎസ് കോണ്ഗ്രസ് തെരഞ്ഞെടുപ്പ് അടുത്തിരിക്കെ ഇത് ട്രംപ് ഭരണകൂടത്തിന് രാഷ്ട്രീയമായും വെല്ലുവിളിയാകാം.
