ഇത് ഞമ്മടെ പീട്യ! ദുബൈയില്‍ മാതാപിതാക്കള്‍ക്ക് ഹനാന്‍ ഷായുടെ വമ്പന്‍ സര്‍പ്രൈസ്
Tue, 10 Nov 2026
തിരുവനന്തപുരം: പ്രായപൂര്‍ത്തിയാകാത്ത കുട്ടികള്‍ വാഹനം ഓടിക്കുന്ന സംഭവങ്ങളില്‍ രക്ഷിതാക്കള്‍ക്കെതിരെ കര്‍ശന നടപടി സ്വീകരിക്കണമെന്ന് ഗതാഗതമന്ത്രി സി.പി ജോണ്‍. കുട്ടികള്‍ക്ക് വാഹനം നല്‍കുന്ന രക്ഷിതാക്കളാണ് ഉത്തരവാദികളെന്നും കുട്ടികള്‍ക്ക് വാഹനത്തിന്റെ താക്കോല്‍ കൈമാറരുതെന്നും മന്ത്രി പറഞ്ഞു. കുട്ടികളെ നിയന്ത്രിക്കാന്‍ കഴിയുന്നില്ലെങ്കില്‍ രക്ഷിതാക്കള്‍ വാഹനം വില്‍ക്കണമെന്നും അവരുടെ വീട്ടില്‍ വാഹനം വേണ്ടെന്ന് വയ്ക്കണമെന്നുമാണ് മന്ത്രിയുടെ നിര്‍ദേശം.
പ്രായപൂര്‍ത്തിയാകാത്ത കുട്ടികള്‍ വാഹനം ഓടിച്ച സംഭവങ്ങളില്‍ ഉന്നതരായ വ്യക്തികളുടെ പേരില്‍ പോലും കേസെടുത്തിട്ടുണ്ടെന്നും ഇക്കാര്യത്തില്‍ യാതൊരു ദാക്ഷിണ്യവും ഉണ്ടാകില്ലെന്ന് ആഭ്യന്തരമന്ത്രിയും വ്യക്തമാക്കിയിട്ടുണ്ടെന്നും മന്ത്രി പറഞ്ഞു. 16, 17 വയസ്സുള്ള കുട്ടികള്‍ക്ക് ഉപദേശം നല്‍കിയതുകൊണ്ട് വലിയ കാര്യമുണ്ടാകുമെന്ന് കരുതുന്നില്ലെന്നും മന്ത്രി പറഞ്ഞു.
അതേസമയം, സ്വകാര്യ ബസുകളുടെ മത്സരയോട്ടത്തിന് പ്രധാന കാരണങ്ങളിലൊന്ന് കാലഹരണപ്പെട്ട സമയക്രമമാണെന്ന് മന്ത്രി ചൂണ്ടിക്കാട്ടി. പതിറ്റാണ്ടുകള്‍ പഴക്കമുള്ള സമയക്രമത്തിലാണ് സ്വകാര്യ ബസുകള്‍ ഇപ്പോഴും സര്‍വീസ് നടത്തുന്നത്. ഒരു കിലോമീറ്റര്‍ ദൂരം സഞ്ചരിക്കാന്‍ രണ്ടര മിനിറ്റ് മതിയെന്നാണ് സര്‍ക്കാര്‍ നിശ്ചയിച്ചിട്ടുള്ളത്. എന്നാല്‍ നഗരങ്ങളില്‍ ഗതാഗതക്കുരുക്ക് കാരണം ഈ സമയത്തിനുള്ളില്‍ ബസുകള്‍ക്ക് ലക്ഷ്യസ്ഥാനത്ത് എത്താന്‍ കഴിയുന്നില്ല. നിശ്ചിത സമയത്തിനുള്ളില്‍ എത്താനായില്ലെങ്കില്‍ നടപടികള്‍ നേരിടേണ്ടിവരുന്നതും മത്സരയോട്ടത്തിന് കാരണമാകുന്നുണ്ടെന്ന് മന്ത്രി വിശദീകരിച്ചു.
