ചേരാനല്ലൂരില്‍ ബെന്‍സ് കാര്‍ ഇടിച്ച് സ്‌കൂട്ടര്‍ യാത്രികന്‍ മരിച്ച സംഭവം; ജഡ്ജിയുടെ മകനെതിരെ നരഹത്യാക്കുറ്റം ചുമത്തി
Sun, 25 Oct 2026
ദുബൈ: ദുബൈ ഇന്റര്‍നാഷണല്‍ ഹോളി ഖുറാന്‍ അവാര്‍ഡിന്റെ 29ാമത് എഡിഷന്‍ പ്രഖ്യാപിച്ച് ദുബൈ ഭരണാധികാരി. ഖുര്‍ആന്‍ മനഃപാഠമാക്കുന്നവരെ ആദരിക്കുന്നതിനുള്ള ലോകത്തിലെ ഏറ്റവും വലിയ പുരസ്‌കാരമായ ദുബൈ ഇന്റര്‍നാഷണല്‍ ഹോളി ഖുര്‍ആന്‍ അവാര്‍ഡിന്റെ 29ാമത് എഡിഷന്‍ യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ശൈഖ് മുഹമ്മദ് ബിന്‍ റാഷിദ് അല്‍ മക്തൂം ചൊവ്വാഴ്ച പ്രഖ്യാപിച്ചു. ഈ ആഗോള പുരസ്‌കാരത്തിന്റെ കഴിഞ്ഞ എഡിഷനില്‍ 105 രാജ്യങ്ങളില്‍ നിന്നുള്ള 5,618 പുരുഷന്മാരും സ്ത്രീകളും പങ്കെടുത്തിരുന്നു. ഈ വര്‍ഷം 3.3 ദശലക്ഷം ഡോളറാണ് (ഏകദേശം 27 കോടിയിലധികം ഇന്ത്യന്‍ രൂപ) അവാര്‍ഡിന്റെ സമ്മാനത്തുക. Quran.gov.ae എന്ന വെബ്‌സൈറ്റ് വഴി ഇപ്പോള്‍ രജിസ്റ്റര്‍ ചെയ്യാവുന്നതാണ്. ‘ദൈവവചനങ്ങള്‍ വെളിച്ചവും മാര്‍ഗദര്‍ശനവും കാരുണ്യവുമാണ്. കഴിഞ്ഞ 29 വര്‍ഷമായി അത് മനഃപാഠമാക്കുന്നവരെ ഞങ്ങള്‍ ആദരിക്കുന്നു. ദൈവം ഇച്ഛിച്ചാല്‍, ഞങ്ങള്‍ ഈ പാതയിലും യാത്രയിലും ഇനിയും തുടരും,’ ശൈഖ മുഹമ്മദ് എക്‌സിലെ (X) ഒരു പോസ്റ്റില്‍ കുറിച്ചു. ഈ വര്‍ഷത്തെ വിജയികളെ 2027 റമദാനില്‍ ആദരിക്കുമെന്നും അദ്ദേഹം അറിയിച്ചു.
ഖുര്‍ആന്‍ മനഃപാഠമാക്കിയവരെ മൂന്ന് വിഭാഗങ്ങളിലായാണ് ഈ അവാര്‍ഡുകള്‍ ആദരിക്കുന്നത്. ഒന്നാം വിഭാഗം: ദുബൈ ഇന്റര്‍നാഷണല്‍ ഖുര്‍ആന്‍ അവാര്‍ഡ് പുരുഷ വിഭാഗം 16 വയസ്സും അതിനുമുകളിലും (ഓപ്പണ്‍ ഏജ് ഗ്രൂപ്പ്), രണ്ടാം വിഭാഗം: ദുബൈ ഇന്റര്‍നാഷണല്‍ ഖുര്‍ആന്‍ അവാര്‍ഡ് പുരുഷസ്ത്രീ വിഭാഗം 16 വയസ്സും അതിനുതാഴെയും, മൂന്നാം വിഭാഗം: ഗ്ലോബല്‍ ഖുര്‍ആനിക് പേഴ്‌സണാലിറ്റി (ആഗോള ഖുര്‍ആനിക വ്യക്തിത്വം)
ഒന്നാം വിഭാഗത്തില്‍ പങ്കെടുക്കുന്നതിനുള്ള യോഗ്യതകള്‍-പാരായണ നിയമങ്ങളും തജ്‌വീദും പാലിച്ച് വിശുദ്ധ ഖുര്‍ആന്‍ പൂര്‍ണ്ണമായി മനഃപാഠമാക്കിയിരിക്കണം. അപേക്ഷകന്‍ 2010 മെയ് 31നോ അതിന് ശേഷമോ ജനിച്ചയാളായിരിക്കണം. മത്സരത്തിന്റെ മുന്‍ പതിപ്പുകളില്‍ അവസാന ഘട്ടത്തില്‍ എത്തുകയോ ആദരിക്കപ്പെടുകയോ ചെയ്ത ആളാകരുത്. സ്വന്തം രാജ്യത്തിന്റെ ദേശീയ വേഷം ധരിച്ചിരിക്കണം. നല്ല പെരുമാറ്റം പ്രകടിപ്പിക്കുകയും യുണൈറ്റഡ് അറബ് എമിറേറ്റ്‌സിന്റെ നിയമങ്ങളും പൊതുമര്യാദകളും പാലിക്കുകയും വേണം. ഒന്നാം സ്ഥാനക്കാരന്: 1 ദശലക്ഷം ഡോളര്‍ ($1 million), രണ്ടാം സ്ഥാനം: 100,000 ഡോളര്‍, മൂന്നാം സ്ഥാനം: 50,000 ഡോളര്‍. രണ്ടാം വിഭാഗത്തില്‍ പങ്കെടുക്കുന്നതിനുള്ള യോഗ്യതകള്‍-മത്സരാര്‍ത്ഥികള്‍ പാരായണ നിയമങ്ങളും തജ്‌വീദും പാലിച്ച് വിശുദ്ധ ഖുര്‍ആന്‍ പൂര്‍ണ്ണമായി മനഃപാഠമാക്കിയിരിക്കണം. അവര്‍ക്ക് 16 വയസ്സ് കവിയാന്‍ പാടില്ല, കൂടാതെ 2010 ജൂണ്‍ 1നോ അതിന് ശേഷമോ ജനിച്ചവരായിരിക്കണം. മത്സരത്തിന്റെ മുന്‍ പതിപ്പുകളില്‍ അവസാന ഘട്ടത്തില്‍ എത്തുകയോ ആദരിക്കപ്പെടുകയോ ചെയ്തവരാകരുത്. പരീക്ഷയ്ക്ക് നിശ്ചയിച്ചിട്ടുള്ള സമയം കൃത്യമായി പാലിക്കണം. നല്ല പെരുമാറ്റം പ്രകടിപ്പിക്കുകയും യുണൈറ്റഡ് അറബ് എമിറേറ്റ്‌സിന്റെ നിയമങ്ങളും പൊതുമര്യാദകളും പാലിക്കുകയും വേണം. ഒന്നാം സ്ഥാനക്കാരന്: 1 ദശലക്ഷം ഡോളര്‍ ($1 million), രണ്ടാം സ്ഥാനം: 100,000 ഡോളര്‍, മൂന്നാം സ്ഥാനം: 50,000 ഡോളര്‍. മൂന്നാം വിഭാഗത്തില്‍ പങ്കെടുക്കുന്നതിനുള്ള യോഗ്യതകള്‍-നാമനിര്‍ദ്ദേശം ചെയ്യപ്പെടുന്ന വ്യക്തി ഇസ്‌ലാമിനെയും മുസ്‌ലിംകളെയും സേവിക്കുന്നതില്‍ മികച്ച പങ്കുവഹിച്ച ആളായിരിക്കണം. സമൂഹത്തില്‍ ഗുണപരമായ സ്വാധീനവും മികച്ച സംഭാവനകളും നല്‍കിയ വ്യക്തിയായിരിക്കണം.
മൗലികതയും മികവും പുലര്‍ത്തുന്ന മൂര്‍ത്തമായ പണ്ഡിതോചിതമായ രചനകള്‍ അദ്ദേഹം തയ്യാറാക്കിയിരിക്കണം. ഇസ്‌ലാമിക ലോകത്ത് മാതൃകയാക്കാവുന്ന ഒരു വ്യക്തിത്വവും മികച്ച പ്രശസ്തിയും ഉള്ള ആളായിരിക്കണം അദ്ദേഹം. ഈ വിഭാഗത്തിലെ വിജയിക്ക് 1 ദശലക്ഷം ഡോളര്‍ സാമ്പത്തിക സമ്മാനമായി ലഭിക്കും.
