ഖത്തര് ഗ്യാസ് ഫാക്ടറിയിലുണ്ടായ അപകടത്തില് മരിച്ച മലയാളി കോഴിക്കോട് തൂണേരി സ്വദേശി
Tue, 23 Jun 2026
ദുബൈ: പ്രവാസികളുടെ ഐക്യത്തിന്റെയും സേവനവൃത്തിയുടെയും മഹാസംഗമമായ ഹലാ കാസ്രോട് ഗ്രാന്ഡ് ഫെസ്റ്റ് ഒക്ടോബര് 26ന് ദുബൈ ഇത്തിസലാത്ത് അക്കാദമി ഗ്രൗണ്ടില് അരങ്ങേറാനിരിക്കെ, ദുബൈ കെ.എം.സി.സി കാസറഗോഡ് ജില്ലാ കമ്മിറ്റി പുതിയൊരു ഡിജിറ്റല് ചുവടുവെപ്പായി മൊബൈല് ആപ്പ് പുറത്തിറക്കി. ആപ്പ് സ്റ്റോറിലും പ്ലേ സ്റ്റോറിലും ലഭ്യമാകുന്ന ഈ മൊബൈല് ആപ്പിലൂടെ പ്രവാസി മഹോത്സവവുമായി ബന്ധപ്പെട്ട എല്ലാ വിവരങ്ങളും എളുപ്പത്തില് ലഭ്യമാക്കാന് കഴിയും. പരിപാടികളുടെ ഷെഡ്യൂള്, രജിസ്ട്രേഷന്, ലൈവ് അപ്ഡേറ്റുകള് തുടങ്ങിയ സൗകര്യങ്ങള് ഉള്പ്പെടുത്തിയതാണ് ആപ്പ്. ‘ഹല കാസ്രോട്’ എന്ന പേരില് സെര്ച് ചെയ്താല് ആപ്പ് ഡൗണ്ലോഡ് ചെയ്യാന് കഴിയും. മൊബൈല് ആപ്പിന്റെ ഔദ്യോഗിക ലോഞ്ചിംഗ് കര്മ്മം ദുബൈ കെ.എം.സി.സി ഉപദേശകസമിതി ചെയര്മാന് ഷംസുദ്ദീന് ബിന് മുഹ്യദ്ദീന് നിര്വഹിച്ചു. സാമൂഹിക സേവന പ്രവര്ത്തനങ്ങള് കൂടുതല് ഫലപ്രദമാക്കാനും ജനങ്ങളിലേക്ക് എത്തിക്കാനും സാങ്കേതികവിദ്യയുടെ സാധ്യതകളെ കെ.എം.സി.സി ഉചിതമായി പ്രയോജനപ്പെടുത്തുന്നത് മാതൃകാപരമാണെന്ന് അദ്ദേഹം പറഞ്ഞു. ജി.എസ് കോര്പ്പറേറ്റ് ഓഫീസില് നടന്ന ചടങ്ങില് ദുബൈ കെ.എം.സി.സി കാസറഗോഡ് ജില്ലാ പ്രസിഡന്റ് സലാം കന്യപ്പാടി അധ്യക്ഷനായി. സി.ഡി.എ ഡയറക്ടര് റാഷിദ് ബിന് അസ്ലാം മുഖ്യ അതിഥിയായിരുന്നു. ജനറല് സെക്രട്ടറി ഹനീഫ് ടി.ആര്. സ്വാഗതം പറഞ്ഞു. കെ.എം.സി.സി സംസ്ഥാന വൈസ് പ്രസിഡന്റ് ഹംസ തൊട്ടി, സെക്രട്ടറി അഫ്സല് മെട്ടമ്മല്, ജില്ലാ ഭാരവാഹികളായ ഇസ്മായില് നാലാംവാതുക്കല്, കെ.പി. അബ്ബാസ് കളനാട്, സുബൈര് അബ്ദുല്ല, റഫീഖ് പി.പി. പടന്ന, പി.ഡി. നൂറുദ്ദീന്, അഷ്റഫ് ബായാര്, ആസിഫ് ഹൊസങ്കടി എന്നിവര് സംബന്ധിച്ചു. ജില്ലാ ട്രഷറര് ഡോ. ഇസ്മായില് നന്ദി പറഞ്ഞു.
