ദുബൈ അല്‍ ഖലീജ് സ്ട്രീറ്റ് ടണല്‍ തുറന്നു: മണിക്കൂറില്‍ 12,000 വാഹനങ്ങള്‍ക്ക് സഞ്ചരിക്കാം
Sun, 08 Nov 2026
ദുബൈ: ഇന്‍ഫിനിറ്റി ബ്രിഡ്ജിനും ദേരയ്ക്കുമിടയില്‍ യാത്ര ചെയ്യുന്ന വാഹനയാത്രക്കാര്‍ക്കായി പുതിയ അല്‍ ഖലീജ് സ്ട്രീറ്റ് ടണല്‍ ഗതാഗതത്തിനായി തുറന്നുകൊടുത്തു. 1.65 കിലോമീറ്റര്‍ നീളമുള്ള ഈ ടണലില്‍ ഇരുവശങ്ങളിലേക്കും മൂന്ന് ലെയ്നുകള്‍ വീതമാണുള്ളത്. മണിക്കൂറില്‍ 12,000 വാഹനങ്ങള്‍ വരെ ഉള്‍ക്കൊള്ളാന്‍ ഈ പാതയ്ക്ക് ശേഷിയുണ്ട്.
ഇന്‍ഫിനിറ്റി ബ്രിഡ്ജ് റാമ്പിന്റെ അവസാന ഭാഗത്തെയും അല്‍ ഖലീജ് സ്ട്രീറ്റ് – അല്‍ വുഹൈദ സ്ട്രീറ്റ് കവലയെയും ബന്ധിപ്പിച്ചുകൊണ്ട് തടസ്സങ്ങളില്ലാത്ത ഗതാഗതം ഉറപ്പാക്കാനാണ് ദുബൈ റോഡ്‌സ് ആന്‍ഡ് ട്രാന്‍സ്‌പോര്‍ട്ട് അതോറിറ്റി (ആര്‍ടിഎ) ഞായറാഴ്ച ഈ ടണല്‍ തുറന്നത്.
ദേര, അല്‍ മംസാര്‍, അബു ഹൈല്‍, അല്‍ വുഹൈദ തുടങ്ങിയ പ്രദേശങ്ങളിലേക്കും ദുബൈ ഐലന്‍ഡ്‌സ്, വാട്ടര്‍ഫ്രണ്ട് മാര്‍ക്കറ്റ്, അല്‍ ഹംരിയ പോര്‍ട്ട് തുടങ്ങിയ പ്രധാന കേന്ദ്രങ്ങളിലേക്കുമുള്ള പ്രവേശനം എളുപ്പമാക്കാന്‍ പുതിയ ടണല്‍ സഹായിക്കും.
