അബുദാബി ശൈഖ് സായിദ് ഗ്രാന്ഡ് മസ്ജിദില് സന്ദര്ശകര്ക്ക് പ്രവേശന ഫീസ് ഏര്പ്പെടുത്തി
Thu, 17 Sep 2026
ഫുജൈറ: യുഎഇ സുപ്രീം കൗണ്സില് അംഗവും ഫുജൈറ ഭരണാധികാരിയുമായ ശൈഖ് ഹമദ് ബിന് മുഹമ്മദ് അല് ഷര്ഖി ഭരണാധികാരിയായി ചുമതലയേറ്റതിന്റെ 52ാം വാര്ഷികം ഫുജൈറ ഇന്ന് ആചരിച്ചു. അഞ്ചു പതിറ്റാണ്ടിലേറെ നീണ്ട കാലയളവില് സമഗ്ര വികസനത്തിന്റെ വിവിധ മേഖലകളില് ശ്രദ്ധേയമായ മുന്നേറ്റമാണ് എമിറേറ്റ് കൈവരിച്ചത്. വിദ്യാഭ്യാസം, ആരോഗ്യം, അടിസ്ഥാനസൗകര്യം, സമ്പദ്വ്യവസ്ഥ, തുറമുഖം, ഊര്ജം, ലോജിസ്റ്റിക്സ്, വിനോദസഞ്ചാരം, സംസ്കാരം, മാനവിക പ്രവര്ത്തനം തുടങ്ങിയ മേഖലകളില് ഘട്ടംഘട്ടമായ വികസനമാണ് ഫുജൈറ കൈവരിച്ചത്. യുഎഇ ഫെഡറല് വികസന പദ്ധതിയുമായി ചേര്ന്നുനിന്നുകൊണ്ടാണ് എമിറേറ്റ് സ്വന്തം സവിശേഷതകള് നിലനിര്ത്തി മുന്നേറിയത്.
കടലും തുറമുഖവും വളര്ച്ചയുടെ കരുത്തായി
ഇന്ത്യന് മഹാസമുദ്രവുമായി നേരിട്ട് ബന്ധമുള്ള ഫുജൈറയുടെ ഭൂമിശാസ്ത്രപരമായ സ്ഥാനം അന്താരാഷ്ട്ര വ്യാപാരത്തിനും ഊര്ജ ഗതാഗതത്തിനും വലിയ സാധ്യതകളാണ് തുറന്നത്. തുറമുഖങ്ങള്, സമുദ്ര സേവനങ്ങള്, വ്യവസായ സൗകര്യങ്ങള് എന്നിവയില് നടത്തിയ നിക്ഷേപങ്ങളിലൂടെ ഈ സാധ്യത സാമ്പത്തിക ശക്തിയായി മാറ്റുകയായിരുന്നു. ഒരുകാലത്ത് ഉപജീവനത്തിന്റെയും യാത്രയുടെയും ആശയവിനിമയത്തിന്റെയും പ്രധാന മാര്ഗമായിരുന്ന കടല് പിന്നീട് സംഭരണം, എണ്ണ ശുദ്ധീകരണം, ബങ്കറിംഗ്, ലോജിസ്റ്റിക്സ് തുടങ്ങിയ മേഖലകളുടെ വളര്ച്ചയ്ക്ക് അടിത്തറയായി. 2025ലെ ഫുജൈറ സ്റ്റാറ്റിസ്റ്റിക്കല് ബുക്ക് പ്രകാരം എമിറേറ്റിന്റെ മൊത്ത ആഭ്യന്തര ഉല്പാദനം ഏകദേശം 33 ബില്യണ് ദിര്ഹം ആണ്. റിഫൈനറി ശേഷി പ്രതിദിനം ഏകദേശം 4.01 ലക്ഷം ബാരല് ആയി ഉയര്ന്നതായും കണക്കുകള് വ്യക്തമാക്കുന്നു. എണ്ണഊര്ജ മേഖലകള്ക്കൊപ്പം ടൂറിസം, വ്യവസായം, ലോജിസ്റ്റിക്സ്, നിക്ഷേപം തുടങ്ങിയ മേഖലകളിലും വളര്ച്ചയ്ക്കുള്ള സാധ്യതകള് വര്ധിച്ചു.
ആഗോള ഊര്ജ മാരിടൈം ഹബ്ബായി ഫുജൈറ
ഹോര്മുസ് കടലിടുക്കിന് പുറത്തുള്ള തന്ത്രപ്രധാനമായ സ്ഥാനം ഫുജൈറയുടെ ഊര്ജ മാരിടൈം മേഖലകളിലെ പ്രാധാന്യം വര്ധിപ്പിച്ചു. ക്രൂഡ് ഓയിലും പെട്രോളിയം ഉല്പന്നങ്ങളും സംഭരിക്കല്, ചരക്ക് കൈകാര്യം ചെയ്യല്, കപ്പലുകള്ക്ക് ഇന്ധനം നല്കല് തുടങ്ങിയ സേവനങ്ങള് ഇവിടെ വിപുലമായി. ലോകത്തിലെ വലിയ എണ്ണ ടെര്മിനലുകളില് ഒന്നായി കണക്കാക്കപ്പെടുന്ന സൗകര്യവും പ്രത്യേക സംഭരണ സംവിധാനങ്ങളും മറൈന് ടെര്മിനലുകളും ഫുജൈറയുടെ എണ്ണവ്യാപാര മേഖലയെ ശക്തിപ്പെടുത്തുന്നു. ഫുജൈറ തുറമുഖം കണ്ടെയ്നര്, ജനറല് കാര്ഗോ, പ്രോജക്ട് കാര്ഗോ, വാഹനങ്ങള് എന്നിവ കൈകാര്യം ചെയ്യുന്നതിനൊപ്പം റെയില് അധിഷ്ഠിത ഗതാഗത സേവനങ്ങളും നല്കുന്നു. മറൈന് പൈലറ്റേജ്, ടോവിങ്, ബോട്ട് മെയിന്റനന്സ്, മലിനീകരണ നിയന്ത്രണം, അടിയന്തര പ്രതികരണം തുടങ്ങിയ സേവനങ്ങളും ഇവിടെ ലഭ്യമാണ്.
ഇത്തിഹാദ് റെയില് പുതിയ സാധ്യതകള് തുറക്കുന്നു
ഫുജൈറയെ യുഎഇയുടെ ഇത്തിഹാദ് റെയില് ശൃംഖലയുമായി ബന്ധിപ്പിച്ചത് എമിറേറ്റിന്റെ സാമ്പത്തിക വളര്ച്ചയിലെ പ്രധാന ഘട്ടമായി മാറി. തുറമുഖങ്ങള്, വ്യവസായ മേഖലകള്, വിപണികള് എന്നിവ തമ്മിലുള്ള ചരക്ക് നീക്കം കൂടുതല് കാര്യക്ഷമമാക്കാന് റെയില് ശൃംഖല സഹായിക്കുന്നു.
ഗതാഗത സമയവും ചെലവും കുറയ്ക്കുന്നതിലൂടെ ഫുജൈറയുടെ തന്ത്രപ്രധാനമായ ഭൂമിശാസ്ത്ര സ്ഥാനത്തിന് കൂടുതല് സാമ്പത്തിക മൂല്യം ലഭിക്കുന്നുവെന്നാണ് വിലയിരുത്തല്. ഇതോടൊപ്പം അല് റുഗൈലാത്തിലും ദിബ്ബ അല് ഫുജൈറയിലും രണ്ട് പുതിയ ടെര്മിനലുകള് വികസിപ്പിക്കുന്നതിനായി ഡിപി വേള്ഡുമായി സഹകരിച്ചുള്ള പദ്ധതിയും പുരോഗമിക്കുന്നു. 50 വര്ഷത്തെ കണ്സഷന്റെ അടിസ്ഥാനത്തിലാണ് പദ്ധതി.
വിനോദ-വിദ്യാഭ്യാസ മേഖലയിലും വലിയ സാധ്യത
മലനിരകള്, താഴ്വരകള്, കടല്ത്തീരങ്ങള്, കോട്ടകള്, പൈതൃക കേന്ദ്രങ്ങള് എന്നിവ ഫുജൈറയുടെ ടൂറിസം മേഖലയുടെ പ്രധാന ആകര്ഷണങ്ങളാണ്.
പ്രകൃതിസൗന്ദര്യവും ചരിത്രപൈതൃക സമ്പത്തും സംയോജിപ്പിച്ചുള്ള ടൂറിസം വികസനത്തിലൂടെ എമിറേറ്റിന്റെ സവിശേഷമായ വ്യക്തിത്വം കൂടുതല് ലോകത്തിനു മുന്നിലെത്തിക്കാനാണ് ശ്രമം. വികസനത്തിന്റെ കേന്ദ്രത്തില് ജനങ്ങളെ നിര്ത്തിയുള്ള സമീപനമാണ് ഫുജൈറയുടെ മുന്നേറ്റത്തിന്റെ മറ്റൊരു പ്രത്യേകത. വിദ്യാഭ്യാസത്തിന് തുടക്കം മുതല് നല്കിയ പ്രാധാന്യം ഇന്നും തുടരുന്നു. നിലവില് എമിറേറ്റിലെ സ്കൂളുകളിലും സര്വകലാശാലകളിലുമായി ഏകദേശം 46,000 വിദ്യാര്ഥികള് പഠിക്കുന്നുണ്ട്. ഫുജൈറയില് നിന്നുള്ള ആയിരക്കണക്കിന് പേര് മാസ്റ്റര്, ഡോക്ടറല് ബിരുദങ്ങളും നേടിയിട്ടുണ്ട്. ഫുജൈറ സര്വകലാശാല ഉള്പ്പെടെയുള്ള ഉന്നത വിദ്യാഭ്യാസ സ്ഥാപനങ്ങള് തൊഴില്വിപണിയുടെ ആവശ്യങ്ങള്, പ്രഫഷണല് പരിശീലനം, പ്രത്യേക പഠന മേഖലകള് എന്നിവയുമായി വിദ്യാഭ്യാസത്തെ ബന്ധിപ്പിക്കുന്നതില് പ്രധാന പങ്കുവഹിക്കുന്നു.
ആരോഗ്യ മേഖലയിലും വിപുലീകരണം
പൊതുമേഖലയിലും സ്വകാര്യ മേഖലയിലുമായി ഫുജൈറയില് ഏകദേശം 129 ആശുപത്രികളും ആരോഗ്യ കേന്ദ്രങ്ങളും ക്ലിനിക്കുകളും പ്രവര്ത്തിക്കുന്നു. ഇവിടങ്ങളില് ഏകദേശം 4,600 ഡോക്ടര്മാരും നഴ്സുമാരും സേവനം ചെയ്യുന്നു. 2025ല് ഏകദേശം 11,500 ശസ്ത്രക്രിയകള് നടത്തിയതായാണ് കണക്ക്. ആരോഗ്യസംരക്ഷണ മേഖലയിലെ വികസനം ജനങ്ങളുടെ ജീവിത നിലവാരം ഉയര്ത്തുന്നതില് പ്രധാന പങ്കുവഹിക്കുന്നതായി റിപ്പോര്ട്ട് ചൂണ്ടിക്കാട്ടുന്നു.
സാമ്പത്തിക വികസനത്തിനൊപ്പം സാംസ്കാരിക മേഖലക്കും ഫുജൈറ പ്രത്യേക പ്രാധാന്യം നല്കി. ഫുജൈറ ഇന്റര്നാഷണല് മോണോഡ്രാമ ഫെസ്റ്റിവല് എമിറേറ്റിന്റെ സാംസ്കാരിക സാന്നിധ്യം അന്താരാഷ്ട്ര തലത്തില് ശക്തിപ്പെടുത്തിയ പ്രധാന പരിപാടികളിലൊന്നാണ്. അല് ബദര് ഫെസ്റ്റിവല്, ഫുജൈറ ഇന്റര്നാഷണല് ഫിലോസഫി കോണ്ഫറന്സ്, ഫുജൈറ ഇന്റര്നാഷണല് കോണ്ഫറന്സ് ഓണ് കാലിഗ്രഫി ആന്ഡ് ഓര്ണമെന്റേഷന് തുടങ്ങിയ പരിപാടികളും സാംസ്കാരികബൗദ്ധിക മേഖലകള്ക്ക് കൂടുതല് വൈവിധ്യം നല്കി. ഫുജൈറ മീഡിയ ഫോറവും മാധ്യമം, പൊതുബോധം, പ്രഫഷണല് ഉത്തരവാദിത്തം എന്നിവ തമ്മിലുള്ള ബന്ധം ചര്ച്ച ചെയ്യുന്ന പ്രധാന വേദിയായി മാറിയിട്ടുണ്ട്. ‘കൃത്യമായ വിവരങ്ങള് നല്കുന്നതിലും വസ്തുതകള് വസ്തുനിഷ്ഠമായി വിശദീകരിക്കുന്നതിലും ഉത്തരവാദിത്തമുള്ള മാധ്യമം പ്രധാന തൂണാണ്. സമൂഹത്തിന് ആശ്വാസവും പൊതുബോധവും വര്ധിപ്പിക്കുന്നതില് പോസിറ്റീവ് മാധ്യമപ്രവര്ത്തനം നിര്ണായക പങ്കാളിയായി തുടരും,’ ശൈഖ് ഹമദ് ബിന് മുഹമ്മദ് അല് ഷര്ഖി പറഞ്ഞു.
മാനവിക പ്രവര്ത്തനങ്ങള്ക്കും മുന്ഗണന
ജനങ്ങളുമായുള്ള നേരിട്ടുള്ള ആശയവിനിമയത്തിനും ഭരണാധികാരി പ്രത്യേക പ്രാധാന്യം നല്കുന്നതായി റിപ്പോര്ട്ട് ചൂണ്ടിക്കാട്ടുന്നു. അദ്ദേഹത്തിന്റെ മജ്ലിസ് ജനങ്ങളുടെ ആവശ്യങ്ങള് നേരിട്ട് കേള്ക്കാനും പിന്തുടരാനുമുള്ള വേദിയായി തുടരുന്നു. ഹമദ് ബിന് മുഹമ്മദ് അല് ഷര്ഖി ഹ്യൂമാനിറ്റേറിയന് ഫൗണ്ടേഷനും ഫുജൈറ ചാരിറ്റി അസോസിയേഷനും വഴി 2025 വരെ നല്കിയ മാനവിക സഹായങ്ങളുടെ മൂല്യം 385 മില്യണ് ദിര്ഹത്തിലേറെ വരും.
ഗസ്സയിലെ ജനങ്ങള്ക്ക് സഹായം നല്കുന്നതിനുള്ള യുഎഇയുടെ മാനവിക പ്രവര്ത്തനങ്ങളുടെ ഭാഗമായി ‘ഓപ്പറേഷന് ചിവല്റസ് നൈറ്റ് 3’ മുഖേന സഹായ സാമഗ്രികള് അയച്ചതും ഗസ്സയിലേക്ക് 679 സഹായ ട്രക്കുകള് അയക്കുന്നതിനുള്ള പ്രവര്ത്തനങ്ങളില് പങ്കാളിത്തം വഹിച്ചതും ഇതില് ഉള്പ്പെടുന്നു.
വികസനത്തിന്റെ 52 വര്ഷങ്ങള്
52 വര്ഷത്തെ ഭരണകാലയളവില് ഫുജൈറ സാമ്പത്തിക വളര്ച്ചയ്ക്കൊപ്പം വിദ്യാഭ്യാസം, ആരോഗ്യം, സംസ്കാരം, മാനവിക പ്രവര്ത്തനം തുടങ്ങിയ മേഖലകളിലും ശക്തമായ അടിത്തറ സൃഷ്ടിച്ചു. മലനിരകളും കടലും ചുറ്റിപ്പറ്റിയിരുന്ന ഒരു ചെറിയ എമിറേറ്റില് നിന്ന് ആഗോള വ്യാപാരം, ഊര്ജം, മാരിടൈം സേവനങ്ങള്, ലോജിസ്റ്റിക്സ്, സംസ്കാരം എന്നിവയില് വ്യക്തമായ സാന്നിധ്യമുള്ള കേന്ദ്രമായി ഫുജൈറ വളര്ന്നു. ശൈഖ് ഹമദ് ബിന് മുഹമ്മദ് അല് ഷര്ഖിയുടെ നേതൃത്വത്തില് ആരംഭിച്ച വികസന യാത്ര പുതിയ ഘട്ടത്തിലേക്ക് കടക്കുമ്പോള്, ഇതുവരെ നേടിയ നേട്ടങ്ങളെ അടിസ്ഥാനമാക്കി കൂടുതല് സാമ്പത്തിക അവസരങ്ങളും സാമൂഹിക വികസനവും സൃഷ്ടിക്കാനുള്ള ശ്രമത്തിലാണ് എമിറേറ്റ്.
