കാഞ്ഞങ്ങാട് കെഎംസിസി മീലാദ് ഫെസ്റ്റ് സമാപിച്ചു
Thu, 17 Sep 2026
തൃശൂര്: മെസ്സിയുടെ പേരില് നടന്ന തട്ടിപ്പുമായി ബന്ധപ്പെട്ട അന്വേഷണത്തിന്റെ ഭാഗമായി റിപ്പോര്ട്ടര് ടി.വി ആസ്ഥാനത്ത് പ്രത്യേക അന്വേഷണ സംഘം നടത്തിയ പരിശോധനയില് നിയമവിരുദ്ധമായി ഒന്നുമില്ലെന്ന് ആഭ്യന്തര മന്ത്രി രമേശ് ചെന്നിത്തല. തൃശൂരില് മാധ്യമങ്ങളോട് പ്രതികരിക്കുകയായിരുന്നു മന്ത്രി. സ്വാഭാവികമായി റെയ്ഡില് സ്വീകരിക്കുന്ന നടപടികള് മാത്രമാണ് ചെയ്തത്. അതിനെ മാധ്യമസ്വാതന്ത്ര്യത്തിനെതിരായ നടപടിയെന്ന് തെറ്റിദ്ധരിപ്പിക്കുകയാണ്. ആളുകളെ തെറ്റിദ്ധരിപ്പിക്കരുത്. ന്യൂസ് റൂമും അഡ്മിനിസ്ട്രേറ്റീവ് ഓഫീസും ഒരേ കെട്ടിടത്തിലാണ് പ്രവര്ത്തിക്കുന്നത്. കേസ് അന്വേഷണത്തിന്റെ ഭാഗമായി നടക്കുന്ന റെയ്ഡ് ആഭ്യന്തര മന്ത്രി അറിയേണ്ടതില്ല. പൊലീസും സര്ക്കാരും മാധ്യമ സ്വാതന്ത്ര്യത്തിനെതിരെയെന്ന് പറയുന്നത് ശരിയല്ല. അത് പറയുന്നവര് സ്വയം പരിശോധിച്ചാല് മതി. അവര് ഭരിക്കുമ്പോള് എത്ര മാധ്യമങ്ങള്ക്കെതിരെ കേസെടുത്തുവെന്ന്. മാധ്യമസ്വാതന്ത്ര്യത്തിനും അവകാശത്തിനും വേണ്ടി എന്നും നിലകൊണ്ടിട്ടുള്ള ചരിത്രമാണ് കോണ്ഗ്രസിനും യുഡിഎഫിനുമുള്ളത്. സിപിഎം ഞങ്ങളെ മാധ്യമസ്വാതന്ത്ര്യം പഠിപ്പിക്കേണ്ടതില്ല. കഴിഞ്ഞ 10 വര്ഷത്തിനിടെ എത്രയോ മാധ്യമപ്രവര്ത്തകരെ ജയിലിലടച്ചു. അവര്ക്കെതിരെ കള്ളക്കേസെടുത്തു. ദിവസങ്ങളോളം ജയിലില് പാര്പ്പിച്ചു. അത്തരക്കാരാണ് ഇപ്പോള് മാധ്യമസ്വാതന്ത്ര്യത്തിന്റെ പേരില് പുരപ്പുറത്ത് കയറിയിരുന്ന് ഉച്ചത്തില് സംസാരിക്കുന്നത്.
മെസ്സിയുടെ പേരില് നടന്ന ജി.എസ്.ടി തട്ടിപ്പ് അന്വേഷിക്കുന്നതിനാണ് പ്രത്യേക അന്വേഷണ സംഘത്തെ നിയോഗിച്ചത്. എസ്.ഐ.ടി എങ്ങനെ പ്രവര്ത്തിക്കണമെന്നതിന് കൃത്യമായ നിയമനടപടികളുണ്ട്. അതനുസരിച്ചാണ് സംഘം പ്രവര്ത്തിക്കുന്നത്. പരിശോധന നിയമപരമായ വാറന്റോടെയാണ് നടത്തിയത്. വസ്തുതകള് വളച്ചൊടിക്കരുത്. റിപ്പോര്ട്ടര് ടി.വി ആസ്ഥാനത്ത് നടത്തിയ പരിശോധനയില് കേസുമായി ബന്ധപ്പെട്ട ആവശ്യമായതും നിര്ണായകവുമായ തെളിവുകള് അന്വേഷണ സംഘത്തിന് ലഭിച്ചിട്ടുണ്ട്. തെളിവുകള് സംബന്ധിച്ച കൂടുതല് വിവരങ്ങള് ഇപ്പോള് പുറത്തുവിടാനാകില്ല. തെളിവുകള് ലഭിച്ചില്ലെന്ന് ആരാണ് പറഞ്ഞതെന്നും മന്ത്രി ചോദിച്ചു. അന്വേഷണ സംഘം നിയമപരമായ നടപടികളുമായി മുന്നോട്ടുപോകുകയാണെന്നും അദ്ദേഹം വ്യക്തമാക്കി.
സ്പോര്ട്സ് സെക്രട്ടറിയുടെ റിപ്പോര്ട്ടിന്റെ അടിസ്ഥാനത്തിലാണ് വിഷയത്തില് അന്വേഷണം ആവശ്യപ്പെട്ട് മുഖ്യമന്ത്രിക്ക് കത്ത് ലഭിച്ചത്. മുഖ്യമന്ത്രി ഇത് പരിശോധിച്ച് തുടര്നടപടികള്ക്കായി ആഭ്യന്തര വകുപ്പിന് കൈമാറുകയായിരുന്നു. തുടര്ന്നാണ് പ്രത്യേക അന്വേഷണ സംഘം രൂപീകരിച്ചത്. അന്വേഷണത്തില് ആഭ്യന്തര വകുപ്പോ ആഭ്യന്തര മന്ത്രിയോ ഇടപെടാറില്ല. പൊലീസ് പരിശോധന നടത്തിയ മുഴുവന് സമയവും നടപടികള് വീഡിയോയില് പകര്ത്തിയിട്ടുണ്ട്. രാജ്യത്തെ നിയമവ്യവസ്ഥയ്ക്ക് അടിസ്ഥാനമായാണ് പരിശോധന നടന്നത്. കേരള പൊലീസ് നിയമവിരുദ്ധമായി ഒന്നും ചെയ്തിട്ടില്ലെന്നാണ് താന് മനസ്സിലാക്കുന്നത്. പൊലീസ് ഭാഗത്തുനിന്ന് ഏതെങ്കിലും തരത്തിലുള്ള വഴിവിട്ട നടപടി ഉണ്ടായതായി പിന്നീട് തെളിഞ്ഞാല് അത് പരിശോധിക്കാന് തയ്യാറാണെന്നും ആഭ്യന്തര മന്ത്രി രമേശ് ചെന്നിത്തല പറഞ്ഞു. റിപ്പോര്ട്ടര് ടി.വി ആസ്ഥാനത്ത് പരിശോധന നടത്തിയത് മാധ്യമപ്രവര്ത്തനത്തെ തടസ്സപ്പെടുത്തുന്നതിനല്ല. കേസിന്റെ അന്വേഷണത്തിന്റെ ഭാഗമായി തെളിവുകള് ശേഖരിക്കുന്നതിനാണ് പരിശോധന നടത്തിയത്. ചാനലിന്റെ സംപ്രേഷണം തടസ്സപ്പെടുത്തിയിട്ടില്ലെന്ന് പൊലീസ് വ്യക്തമാക്കിയിട്ടുണ്ടെന്നും മന്ത്രി രമേശ് ചെന്നിത്തല വ്യക്തമാക്കി.
