രാഹുല് ഗാന്ധിയുടെ മിന്നല് സമരം വിജയിച്ചു; പെല്ലറ്റ് ഗണ് കേസില് എഫ്ഐആര്
Fri, 21 Aug 2026
ദുബൈ: എല്നിനോ പ്രതിഭാസം ഭയാനകമായ രീതിയിലുള്ള കാലാവസ്ഥാ മാറ്റമുണ്ടാക്കുമെന്ന് റിപ്പോര്ട്ട്. 2027 ഏറ്റവും ചൂടേറിയ വര്ഷമാകുമെന്ന് യുകെ കാലാവസ്ഥാ ഓഫീസ് മുന്നറിയിപ്പ് നല്കി. ശക്തമായ എല് നിനോ ആഗോള താപനില ഉയര്ത്തുകയും അസാധാരണമായ കാലാവസ്ഥാ സംഭവങ്ങളുടെ സാധ്യത വര്ധിപ്പിക്കുകയും ചെയ്യും. മനുഷ്യനിര്മിത കാലാവസ്ഥാ വ്യതിയാനത്തിന്റെ പ്രത്യാഘാതങ്ങള്ക്കൊപ്പം ഇത് ചേരുന്നതിനാല് 2027 ആഗോളതലത്തില് രേഖപ്പെടുത്തിയതില് ഏറ്റവും ചൂടേറിയ വര്ഷമാകാന് സാധ്യതയുണ്ടെന്നും യുകെ മെറ്റ് ഓഫീസ് പറയുന്നു. ഇന്ത്യയിലും കാലാവസ്ഥാ മാറ്റത്തിന്റെ വ്യക്തമായ സൂചനയുണ്ടാവും. ലോകത്തിന്റെ വിവിധ ഭാഗങ്ങളില് കാലാവസ്ഥാ രീതികളില് ഇതിനകം തന്നെ മാറ്റങ്ങള് പ്രകടമാകുന്നതായാണ് റിപ്പോര്ട്ട്. ഇന്ത്യയില് ശരാശരിയേക്കാള് കുറഞ്ഞ മണ്സൂണ് മഴ, അറ്റ്ലാന്റിക് മേഖലയില് ചുഴലിക്കാറ്റ് പ്രവര്ത്തനം കുറഞ്ഞത്, യുകെയില് കൂടുതല് മഴയും ശക്തമായ കൊടുങ്കാറ്റുകളും ഉണ്ടാകാന് സാധ്യത ഇതൊക്കെയാണ് പ്രധാന സൂചനകള്. യുകെ മെറ്റ് ഓഫീസ് ദീര്ഘകാല പ്രവചന വിഭാഗം മേധാവി പ്രൊഫ. ആദം സ്കൈഫ് ഈ എല് നിനോ സംഭവത്തെ ‘മുന്കാലങ്ങളില് കണ്ടിട്ടില്ലാത്ത തരത്തിലുള്ളത്’ എന്നാണ് വിശേഷിപ്പിച്ചത്. തങ്ങളുടെ പ്രവചനങ്ങളില് ഇത്രയും ശക്തമായ എല് നിനോ സൂചന താന് മുമ്പ് കണ്ടിട്ടില്ലെന്നും അദ്ദേഹം പറഞ്ഞു.
എന്താണ് എല് നിനോ?
പസഫിക് സമുദ്രത്തിന്റെ മധ്യകിഴക്കന് ഭാഗത്തെ സമുദ്രജലത്തിന്റെ താപനില അസാധാരണമായി ഉയരുന്ന സ്വാഭാവിക കാലാവസ്ഥാ പ്രതിഭാസമാണ് എല് നിനോ. ഇത് ലോകത്തിന്റെ വിവിധ ഭാഗങ്ങളില് മഴ, വരള്ച്ച, ചൂട്, കൊടുങ്കാറ്റ് തുടങ്ങിയ കാലാവസ്ഥാ രീതികളെ സ്വാധീനിക്കും. കാലാവസ്ഥാ വ്യതിയാനം എല് നിനോ സംഭവങ്ങള് കൂടുതല് പതിവാക്കുന്നുവെന്നതിന് വ്യക്തമായ തെളിവില്ലെങ്കിലും, ചൂട് കൂടിയ ലോകത്ത് എല് നിനോയുടെ കാലാവസ്ഥാ പ്രത്യാഘാതങ്ങള് കൂടുതല് തീവ്രമാകാന് സാധ്യതയുണ്ടെന്ന് മെറ്റ് ഓഫീസ് മുന്നറിയിപ്പ് നല്കി. ശക്തമായ പ്രകൃതിദത്ത കാലാവസ്ഥാ പ്രതിഭാസം ആഗോള താപനില വര്ദ്ധിപ്പിക്കുകയും തീവ്ര കാലാവസ്ഥയുടെ അപകടസാധ്യതകള് വര്ദ്ധിപ്പിക്കുകയും ചെയ്യും.
