റിയാദ് വിമാനത്താവളത്തിന് നേരെ ആക്രമണം: പാകിസ്ഥാനി കൊല്ലപ്പെട്ടു, 11 പേര്‍ക്ക് പരിക്ക്; ദമാമിലും ആക്രമണം
Mon, 12 Oct 2026
വാഷിങ്ടണ്‍: ഇറാഖിലെ ISIS വിരുദ്ധ സൈനിക ദൗത്യം ഔദ്യോഗികമായി അവസാനിപ്പിച്ചതായി അമേരിക്ക പ്രഖ്യാപിച്ചു. 2014ല്‍ ആരംഭിച്ച Operation Inherent Resolve എന്ന ദൗത്യത്തിനാണ് 12 വര്‍ഷത്തിന് ശേഷം സമാപനമായത്. പെന്റഗണ്‍ ചീഫ് വക്താവ് സീന്‍ പാര്‍നെല്‍ ബുധനാഴ്ച പുറത്തിറക്കിയ പ്രസ്താവനയിലാണ് ഇക്കാര്യം അറിയിച്ചത്. എര്‍ബില്‍ എയര്‍ ബേസില്‍നിന്ന് സഖ്യസേനയുടെയും സൈനിക ഉപകരണങ്ങളുടെയും പിന്മാറ്റം ഇറാഖിലെ സൈനിക ദൗത്യത്തിന്റെ വിജയകരമായ സമാപനത്തെ അടയാളപ്പെടുത്തുന്നതാണെന്ന് അദ്ദേഹം പറഞ്ഞു. ഇതോടെ യുദ്ധകാല സഖ്യസേനാ ദൗത്യത്തില്‍ നിന്ന് ഇറാഖ് നേതൃത്വത്തിലുള്ള സുരക്ഷാ സംവിധാനത്തിലേക്കും സാധാരണ ഉഭയകക്ഷി സുരക്ഷാ ബന്ധത്തിലേക്കുമുള്ള മാറ്റമാണ് നടക്കുന്നതെന്നും പെന്റഗണ്‍ വ്യക്തമാക്കി.
2014ല്‍ ആരംഭിച്ച ദൗത്യം
2014 ഓഗസ്റ്റിലാണ് വടക്കന്‍ ഇറാഖിലും സിറിയയിലും ISIS ശക്തിപ്രാപിച്ചതിനെ തുടര്‍ന്ന് അമേരിക്ക വ്യോമാക്രമണങ്ങള്‍ ആരംഭിച്ചത്. നിരവധി രാജ്യങ്ങള്‍ പിന്നീട് സഖ്യത്തിന്റെ ഭാഗമായി. ഇറാഖി, കുര്‍ദിഷ് സേനകള്‍ക്ക് പരിശീലനം, വ്യോമപിന്തുണ, രഹസ്യാന്വേഷണ സഹായം തുടങ്ങിയവയും സഖ്യസേന നല്‍കി. പെന്റഗണ്‍ കണക്കുകള്‍ പ്രകാരം ദൗത്യത്തിനിടെ 123 അമേരിക്കന്‍ സൈനികര്‍ കൊല്ലപ്പെടുകയും 499 പേര്‍ക്ക് പരിക്കേല്‍ക്കുകയും ചെയ്തു. സഖ്യത്തിന്റെ കണക്കനുസരിച്ച് 80,000ലേറെ ISIS അംഗങ്ങള്‍ കൊല്ലപ്പെട്ടിട്ടുണ്ട്. ISIS-യുടെ സ്വയം പ്രഖ്യാപിത ഖിലാഫത്ത് ഇറാഖിലും സിറിയയിലും തകര്‍ന്നെങ്കിലും സംഘടന പൂര്‍ണമായും ഇല്ലാതായിട്ടില്ലെന്നാണ് വിലയിരുത്തല്‍.
ഇറാന്‍ സ്വാധീനം വര്‍ധിക്കാന്‍ സാധ്യത
അമേരിക്കന്‍ സേനയുടെ പിന്മാറ്റം ഇറാഖിലെ സുരക്ഷാ സാഹചര്യത്തില്‍ പുതിയ വെല്ലുവിളികള്‍ ഉയര്‍ത്തിയേക്കാമെന്നാണ് വിദഗ്ധരുടെ വിലയിരുത്തല്‍. പ്രത്യേകിച്ച് ഇറാന്റെ പിന്തുണയുള്ള ഇറാഖി സായുധസംഘങ്ങളുടെ സ്വാധീനം സംബന്ധിച്ചാണ് ആശങ്ക. അമേരിക്കന്‍ സേന പിന്മാറുന്നതോടെ യുഎസ് സൈനിക കേന്ദ്രങ്ങള്‍ ഇറാന്‍ അനുകൂല സംഘങ്ങളുടെ പ്രധാന ലക്ഷ്യങ്ങളിലൊന്നല്ലാതാകാന്‍ സാധ്യതയുണ്ട്. അതേസമയം, ഇറാന്റെ സ്വാധീനത്തെ നിയന്ത്രിച്ചിരുന്ന അമേരിക്കന്‍ സാന്നിധ്യവും ഇതോടെ കുറയും. ഇറാന്‍ അനുകൂല സായുധസംഘങ്ങളെ നിരായുധരാക്കാനുള്ള ഇറാഖിന്റെ സമയപരിധിയും നീട്ടിയിട്ടുണ്ട്. പ്രധാനമന്ത്രി അലി അല്‍ സൈദി നേരത്തെ സെപ്റ്റംബര്‍ 30ന് നിശ്ചയിച്ചിരുന്ന സമയപരിധി 2027 ജൂണ്‍ അവസാനം വരെ നീട്ടിയതായി റിപ്പോര്‍ട്ടില്‍ പറയുന്നു.
അമേരിക്കന്‍ രഹസ്യാന്വേഷണ, ലോജിസ്റ്റിക് സഹായവും ഡ്രോണ്‍ സംവിധാനങ്ങളും ഇല്ലാതാകുന്നത് ISISന് വീണ്ടും സംഘടിക്കാന്‍ അവസരം നല്‍കുമെന്ന് കുര്‍ദിഷ് കമാന്‍ഡര്‍ സിര്‍വാന്‍ ബര്‍സാനി മുന്നറിയിപ്പ് നല്‍കി. അന്താരാഷ്ട്ര സഖ്യത്തിന്റെ പിന്മാറ്റം പ്രഖ്യാപിച്ചതിന് പിന്നാലെ ISISയുടെ ‘സ്ലീപ്പര്‍ സെല്ലുകളുടെ’ ചലനം വര്‍ധിച്ചതായി ശ്രദ്ധയില്‍പ്പെട്ടിട്ടുണ്ടെന്നും ഇത് സംഘടനയുടെ പ്രവര്‍ത്തകരുടെ ആത്മവിശ്വാസം വര്‍ധിപ്പിച്ചിട്ടുണ്ടെന്നും അദ്ദേഹം പറഞ്ഞു. 12 വര്‍ഷത്തെ ISIS വിരുദ്ധ സൈനിക ദൗത്യം അവസാനിച്ചെങ്കിലും, ഇറാഖിന്റെ സുരക്ഷാ ഭാവിയില്‍ ISIS, ഇറാന്‍ അനുകൂല സായുധസംഘങ്ങള്‍, അമേരിക്ക-ഇറാന്‍ ബന്ധം എന്നിവ നിര്‍ണായക ഘടകങ്ങളായി തുടരും.
