റിയാദ് വിമാനത്താവളത്തിന് നേരെ ആക്രമണം: പാകിസ്ഥാനി കൊല്ലപ്പെട്ടു, 11 പേര്‍ക്ക് പരിക്ക്; ദമാമിലും ആക്രമണം
Mon, 12 Oct 2026
നഗോയ: ക്രിക്കറ്റ് ആരാധകരെ ആവേശത്തിലാക്കി വീണ്ടുമൊരു ഇന്ത്യ-പാകിസ്ഥാന്‍ ഫൈനല്‍ മത്സരത്തിന് കളമൊരുങ്ങി. ഏഷ്യന്‍ ഗെയിംസ് പുരുഷ ക്രിക്കറ്റ് സെമി ഫൈനലില്‍ ശ്രീലങ്കയെ തോല്‍പ്പിച്ച് ഇന്ത്യ ഫൈനല്‍ ഉറപ്പിച്ചു. കൊറോഗി സ്‌പോര്‍ട്‌സ് പാര്‍ക്കില്‍ നടന്ന രണ്ടാം സെമിയില്‍ 124 റണ്‍സിന്റെ കൂറ്റന്‍ വിജയമാണ് ഇന്ത്യ നേടിയത്. ഇന്ത്യയുടെ 170 വിജയലക്ഷ്യം പിന്തുടര്‍ന്ന ശ്രീലങ്ക 49 റണ്‍സിന് പുറത്താവുകയായിരുന്നു. ഇഷാന്‍ കിഷന്റെ അര്‍ധ സെഞ്ച്വറിയില്‍ മികച്ച സ്‌കോറുയര്‍ത്തിയ ഇന്ത്യ പിന്നീട് ബൗളിങ്ങിലും അസാമാന്യ പ്രകടനം കാഴ്ചവെച്ചു.
ഒക്ടോബര്‍ മൂന്നിന് കൊറോഗി സ്‌പോര്‍ട്‌സ് പാര്‍ക്കില്‍ സ്റ്റേഡിയത്തില്‍ തന്നെയാണ് ഇന്ത്യ ബദ്ധവൈരികളായ പാക്കിസ്ഥാനെ നേരിടുക. നിലവിലെ ചാമ്പ്യന്മാരായ ഇന്ത്യ ഏഷ്യന്‍ ഗെയിംസ് സ്വര്‍ണം നിലനിര്‍ത്തുക എന്ന ലക്ഷ്യത്തോടെയാണ് മത്സരത്തിന് ഇറങ്ങുക. രണ്ടാം സെമിയില്‍ ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യയ്ക്ക് മൂന്ന് ഓവറില്‍ തന്നെ ഓപ്പണര്‍ അഭിഷേക് ശര്‍മയെയും (മൂന്ന് പന്തില്‍ ഏഴ്) വണ്‍ ഡൗണായി ഇറങ്ങിയ സഞ്ജു സാംസണിനെയും (ഒമ്പത് പന്തില്‍ ഏഴ് റണ്‍സ്) നഷ്ടമായി. പിന്നാലെ 21 പന്തില്‍ 38 റണ്‍സെടുത്ത് ഓപ്പണറായി ഇറങ്ങിയ വൈഭവ് സൂര്യവംശിയും പുറത്തായി.
അഞ്ചാമനായി ഇറങ്ങിയ ഇഷാന്‍ കിഷന്‍ അര്‍ധ സെഞ്ച്വറി നേടി ഇന്ത്യയ്ക്ക് മികച്ച സ്‌കോര്‍ സമ്മാനിച്ചു. താരം 46 പന്തില്‍ അഞ്ച് സിക്‌സറുകളും നാല് ഫോറുകളും അടക്കം 80 റണ്‍സെടുത്ത് പുറത്താകാതെ നിന്നു. ക്യാപ്റ്റന്‍ ശ്രേയസ് അയ്യര്‍ (13 പന്തില്‍ 13), അക്സര്‍ പട്ടേല്‍ (13 പന്തില്‍ എട്ട്), തിലക് വര്‍മ്മ (നാല് പന്തില്‍ രണ്ട്), ശിവം ദുബെ (ഒമ്പത് പന്തില്‍ മൂന്ന്) എന്നിങ്ങനെയാണ് റണ്‍ നേട്ടം. ഇതോടെ ഇന്ത്യ നിശ്ചിത ഓവറില്‍ ഏഴ് വിക്കറ്റിന് 169 റണ്‍സിലെത്തി.
മറുപടി ബാറ്റിങ്ങിനിറങ്ങിയ ലങ്കയെ ആദ്യ ഓവറില്‍ തന്നെ രണ്ട് വിക്കറ്റ് വീഴ്ത്തി ജസ്പ്രീത് ബുംറ ഞെട്ടിച്ചു. അടുത്ത ഓവറിലുകളിലും ഇന്ത്യ വിക്കറ്റ് വിക്കറ്റ് നേട്ടം ആവര്‍ത്തിച്ചതോടെ നാല് ഓവറുകള്‍ അവസാനിക്കുമ്പോള്‍ അഞ്ച് വിക്കറ്റിന് 18 എന്ന നിലയിലേക്ക് ശ്രീലങ്ക കൂപ്പുകുത്തി. ശ്രീലങ്കന്‍ നിരയില്‍ 11 പന്തില്‍ 15 റണ്‍സെടുത്ത നുവാനിഡു ഫെര്‍ണാണ്ടോ മാത്രമാണ് രണ്ടക്കം കടന്നത്. പത്താം ഓവറില്‍ തുടര്‍ച്ചയായി രണ്ട് വിക്കറ്റുകള്‍ വീഴ്ത്തി അഭിഷേക് ഇന്ത്യയെ വിജയത്തിലേക്ക് നയിച്ചു.
