ലുലു ഗ്രൂപ്പ് ലോജിസ്റ്റിക്സ് മാനേജര് ദുബൈയില് നിര്യാതനായി
Thu, 05 Feb 2026
ദുബൈ: യുഎഇയുടെ അന്പത്തിനാലാം ദേശീയ ദിനത്തിന്റെ ഭാഗമായി ദുബൈ കെഎംസിസി കാസറഗോഡ് ജില്ലാ കമ്മിറ്റി നവംബര് 30, ഞായറാഴ്ച മാര്ട്ടിയേഴ്സ് ഡേ ദിനത്തില് രാവിലെ 8 മണി മുതല് ഉച്ചയ്ക്ക് 2 മണിവരെ മെഗാ ബ്ലഡ് ഡൊണേഷന് ഡ്രൈവ് സംഘടിപ്പിക്കുന്നു. ജദ്ദാഫിലുള്ള ദുബൈ ബ്ലഡ് ഡൊണേഷന് സെന്ററില് വച്ചാണ് ഇത്തവണയും മെഗാ ബ്ലഡ് ഡൊണേഷന് ഡ്രൈവ് നടക്കുക. ദേശീയ ദിനാഘോഷങ്ങളുടെ ഭാഗമായി എല്ലാ വര്ഷവും വിപുലമായ രീതിയിലാണ് രക്തദാന പരിപാടി സംഘടിപ്പിക്കുക. കൈന്ഡ്നെസ്സ് ബ്ലഡ് ഡൊണേഷന് ടീമുമായി സഹകരിച്ചാണ് മെഗാ ബ്ലഡ് ഡൊണേഷന് ഡ്രൈവ് ഒരുക്കുന്നത്. ദുബൈ കെഎംസിസി ഉപദേശക സമിതി ചെയര്മാന് ഷംസുദ്ദീന് ബിന് മുഹ്യദ്ദീന്, പെയ്സ് ഗ്രൂപ്പ് മാനേജിങ് ഡയറക്ടര് പി.എ സല്മാന് ഇബ്രാഹിം തുടങ്ങിയവര് അതിഥികളായി പങ്കെടുക്കും. ജില്ലാ കെഎംസിസിയുടെ പ്രവര്ത്തകരില് പലരും മൂന്ന് മാസത്തിലൊരിക്കല് ബ്ലഡ് ഡൊണേഷന് നടത്തുന്ന റെഗുലര് ഡൊണേഴ്സാണ്. രക്തദാനം ചെയ്യുന്നവര്ക്കായി അബൂഹൈലില് നിന്ന്
നൈഫ്, ബര്ദുബൈ, കറാമ വഴി സൗജന്യ ബസ് സര്വീസും ഒരുക്കിയിട്ടുണ്ട്. ജദ്ദാഫ് മെട്രോ സ്റ്റേഷനില് നിന്ന് അരമണിക്കൂര് ഇടവിട്ടു ഷട്ടര് ബസ്സും ഏര്പ്പാടാക്കിയിട്ടുണ്ട്. സ്ത്രീകള്ക് രക്തദാനം ചെയ്യാന് പ്രത്യേകം സൗകര്യവും ഒരുക്കിയിട്ടുണ്ട്. മെഗാ ബ്ലഡ് ഡൊണേഷന് ഡ്രൈവ് വിജയിപ്പിക്കണമെന്ന് ദുബൈ കെഎംസിസി കാസറഗോഡ് ജില്ലാ കമ്മിറ്റി പ്രസിഡന്റ് സലാം കന്യപ്പാടി, ജനറല് സെക്രട്ടറി ഹനീഫ് ടി ആര്, ട്രഷറര് ഡോ. ഇസ്മായില് എന്നിവര് അഭ്യര്ത്ഥിച്ചു. കഴിഞ്ഞ പത്തു വര്ഷമായി ദുബൈ ഹെല്ത്തുമായി സഹകരിച്ച് നടത്തുന്ന ബ്ലഡ് ഡൊണേഷന് ക്യാമ്പിന് നിരവധി തവണ ദുബൈ ഗവണ്മന്റിന്റെ പ്രത്യക പ്രശംസ പത്രം ലഭിച്ചിട്ടുണ്ട്. ഏറ്റവും കൂടുതല് ഡോണേഴ്സിനെ പങ്കെടുപ്പിക്കുന്ന മണ്ഡലം മുനിസിപ്പല് പഞ്ചായത്ത് കമ്മിറ്റികള്ക്ക് ജില്ലാ കമ്മിറ്റിയുടെ സ്നേഹോപഹാരവും സമര്പ്പിക്കുന്നുണ്ട്. കഴിഞ്ഞ ഒരു മാസമായി രക്തദാന ക്യാമ്പ് വിജയിപ്പിക്കാന് ശക്തമായ സോഷ്യല് മീഡിയ ക്യാമ്പയിന് നടന്ന് വരുന്നുണ്ട്. കെഎംസിസിയുടെ വിവിധ കമ്മിറ്റികള് കൂടാതെ വെല്ഫിറ്റ് ഇന്റര്നാഷ്ണല്, പെയ്സ് ഗ്രൂപ്പ്, സേഫ് ലൈന്, സ്കൈ ഗ്രൂപ്പ്, ബെസ്റ്റ് ഗോള്ഡ്, സഫ ഗ്രൂപ്പ് തുടങ്ങിയ കമ്പനികളുടെ സ്റ്റാഫും രക്തദാനത്തില് കൈകോര്ക്കുന്നുണ്ട്. രക്തദാനം ചെയ്യാന് എത്തുന്നവര്ക്ക് യുഎഇയുടെ ദേശീയ ദിന ഗിഫ്റ്റും ഭക്ഷണവും ജില്ലാ കമ്മിറ്റി ഒരുക്കിയിട്ടുണ്ട്.
