സൗരവൈദ്യുതി ഉല്‍പ്പാദനത്തില്‍ ലോകത്ത് ഒന്നാമതെത്താന്‍ യുഎഇ
Sun, 08 Nov 2026
ദുബൈ: ഗള്‍ഫ് സന്ദര്‍ശനത്തിന്റെ ഭാഗമായി ദുബൈയിലെത്തുന്ന മുഖ്യമന്ത്രി പിണറായി വിജയന്‍ ഓര്‍മ സംഘടിപ്പിക്കുന്ന കേരളോത്സവം ഉദ്ഘാടനം ചെയ്യും. ഡിസംബര്‍ 1ന് തിങ്കളാഴ്ച വൈകുന്നേരം 6 മണിക്ക് ദുബൈ അമിറ്റി സ്‌കൂളിലാണ് കേരളോത്സവം അരങ്ങേറുന്നത്. ഇവിടെ വെച്ച് മുഖ്യമന്ത്രി മലയാളി സമൂഹത്തെ അഭിസംബോധന ചെയ്യുമെന്ന് സംഘാടകര്‍ അറിയിച്ചു. സാംസ്‌കാരിക മന്ത്രി സജി ചെറിയാന്‍, ഇന്ത്യന്‍ അംബാസഡര്‍, ദുബൈ കോണ്‍സുല്‍ ജനറല്‍, കേരള ചീഫ് സെക്രട്ടറി, ഡോ. എം എ യൂസഫലി, ഡോ. ആസാദ് മൂപ്പന്‍, ഡോ കെ.പി ഹുസൈന്‍, പ്രവാസി ക്ഷേമനിധി ബോര്‍ഡ് ഡയറക്ടര്‍ എന്‍.കെ കുഞ്ഞഹമ്മദ്, നോര്‍ക്ക ഡയറക്ടര്‍ ഓ.വി മുസ്തഫ എന്നിവരും പരിപാടിയില്‍ പങ്കെടുക്കും. ദുബൈക്കു പുറമേ, മറ്റു വടക്കന്‍ എമിറേറ്റുകളിലെയും പ്രധാനപ്പെട്ട വ്യവസായ പ്രമുഖരും മലയാളി സാമൂഹിക സാംസ്‌കാരിക സംഘടനകളുടെ ഭാരവാഹികളും പ്രതിനിധികളും ഈ പരിപാടിയില്‍ പങ്കെടുക്കുമെന്നും സംഘാടകര്‍ അറിയിച്ചു. മറ്റ് എമിറേറ്റുകളില്‍ നിന്ന് എത്തിച്ചേരാന്‍ ആഗ്രഹിക്കുന്നവര്‍ക്ക് ആവശ്യമായ യാത്ര സൗകര്യവും വിവിധ സംഘടനകള്‍ ഏര്‍പ്പെടുത്തിയിട്ടുണ്ട്. വിവിധ മേഖലകളില്‍ നിന്നുള്ള പ്രതിനിധികള്‍, വ്യവസായികള്‍ എന്നിവര്‍ക്ക് മുഖ്യമന്ത്രിയുമായി കൂടിക്കാഴ്ച നടത്താനുള്ള അവസരമൊരുക്കും. മുഖ്യമന്ത്രിയെ സ്വീകരിക്കാനായി യുഎഇയിലെ മലയാളി സാംസ്‌കാരികോത്സവമായ ഓര്‍മ കേരളോത്സവ വേദിയില്‍ നിരവധി കലാപരിപാടികളാണ് ഒരുങ്ങുന്നത്. മുഖ്യമന്ത്രിയുടെ പരിപാടികള്‍ വിശദീകരിക്കാന്‍ വിളിച്ചുചേര്‍ത്ത വാര്‍ത്താസമ്മേളനത്തില്‍ പ്രവാസി ക്ഷേമ ബോര്‍ഡ് ഡയറക്ടര്‍, ജനറല്‍ കണ്‍വീനര്‍ എന്‍ കെ കുഞ്ഞഹമ്മദ്, സ്വാഗത സംഘം ചെയര്‍മാന്‍ ഡോ: കെ.പി ഹുസൈന്‍, ഇന്ത്യന്‍ അസോസിയേഷന്‍ ജനറല്‍ സെക്രട്ടറി ശ്രീപ്രകാശ്, ലോകകേരള സഭ അംഗം ടി.കെ അബ്ദുല്‍ ഹമീദ്, മലയാളം മിഷന്‍ യുഎഇ കോര്‍ഡിനേറ്റര്‍ കെ.എല്‍ ഗോപി, ഓര്‍മ ജനറല്‍ സെക്രട്ടറി ഷിജു ബഷീര്‍, ഐഎംസിസി ഷാര്‍ജ പ്രസിഡന്റ് താഹിര്‍ അലി എന്നിവര്‍ പങ്കെടുത്തു.
