സൗരവൈദ്യുതി ഉല്‍പ്പാദനത്തില്‍ ലോകത്ത് ഒന്നാമതെത്താന്‍ യുഎഇ
Sun, 08 Nov 2026
മലപ്പുറം: കേരളത്തിന്റെ വിദ്യാഭ്യാസസാമൂഹിക ചരിത്രത്തില്‍ ഒരിക്കലും മായാത്ത അധ്യായമാണ് 1980 ജൂലൈ 30ലെ ഭാഷാ സമരവും മലപ്പുറം വെടിവെപ്പും. അറബി, ഉര്‍ദു, സംസ്‌കൃതം തുടങ്ങിയ രണ്ടാം ഭാഷകളുടെ സംരക്ഷണത്തിനും ആയിരക്കണക്കിന് ഭാഷാ അധ്യാപകരുടെ തൊഴില്‍ സുരക്ഷയ്ക്കുമായി നടന്ന ഈ പ്രക്ഷോഭം മൂന്ന് യുവപ്രവര്‍ത്തകരുടെ ജീവത്യാഗത്തിന് സാക്ഷ്യം വഹിച്ചു. തുടര്‍ന്ന് ഉണ്ടായ ശക്തമായ ജനകീയ പ്രതിഷേധം സര്‍ക്കാരിനെ വിവാദ ഉത്തരവുകള്‍ പിന്‍വലിക്കാന്‍ നിര്‍ബന്ധിതമാക്കിയതോടെ ഭാഷാ സമരം കേരളത്തിന്റെ ചരിത്രത്തിലെ ഏറ്റവും പ്രധാനപ്പെട്ട ഭാഷാ അവകാശ പ്രസ്ഥാനങ്ങളിലൊന്നായി മാറി. വിദ്യാഭ്യാസ നയത്തില്‍ നിന്നുയര്‍ന്ന പ്രതിഷേധം 1980 ജനുവരി 25ന് ഇ.കെ. നായനാര്‍ മന്ത്രിസഭ അധികാരത്തിലെത്തിയതിന് പിന്നാലെ വിദ്യാഭ്യാസ മന്ത്രി ബേബി ജോണ്‍ നടപ്പാക്കാന്‍ ശ്രമിച്ച പുതിയ വിദ്യാഭ്യാസ നയങ്ങളാണ് പ്രതിഷേധത്തിന് വഴിവെച്ചത്. അറബി, ഉര്‍ദു, സംസ്‌കൃതം തുടങ്ങിയ രണ്ടാം ഭാഷകളുടെ പഠനത്തിനായി മൂന്ന് പ്രധാന നിബന്ധനകള്‍ സര്‍ക്കാര്‍ മുന്നോട്ടുവച്ചു. ആദ്യത്തേത് അക്കമഡേഷന്‍ എന്ന പേരില്‍, നിശ്ചിത അളവിലുള്ള ക്ലാസ് മുറി സൗകര്യമുള്ള വിദ്യാലയങ്ങളില്‍ മാത്രം ഈ ഭാഷകള്‍ പഠിപ്പിക്കാമെന്ന വ്യവസ്ഥയായിരുന്നു. രണ്ടാമത്തേത് ഡിക്ലറേഷന്‍. വിദ്യാര്‍ത്ഥിയുടെ രക്ഷിതാവ് നേരിട്ട് സ്‌കൂളിലെത്തി പ്രത്യേക സത്യവാങ്മൂലം നല്‍കണമെന്ന വ്യവസ്ഥ. മൂന്നാമത്തേത് ക്വാളിഫിക്കേഷന്‍, നിലവിലുള്ള അധ്യാപകര്‍ക്ക് പുതിയ യോഗ്യതാ മാനദണ്ഡങ്ങള്‍ നിര്‍ബന്ധമാക്കുന്നതായിരുന്നു. ഈ വ്യവസ്ഥകള്‍ പ്രാബല്യത്തില്‍ വന്നാല്‍ ആയിരക്കണക്കിന് അറബി, ഉര്‍ദു അധ്യാപകര്‍ക്ക് ജോലി നഷ്ടപ്പെടുമെന്നും ന്യൂനപക്ഷ ഭാഷാ പഠനം ഗുരുതരമായി ബാധിക്കുമെന്നും അധ്യാപക സംഘടനകള്‍ ഉന്നയിച്ചു.
കേരള അറബിക് മുന്‍ഷീസ് അസോസിയേഷന്‍ (KAMA), കേരള അറബിക് ടീച്ചേഴ്‌സ് ഫെഡറേഷന്‍ (KATF) എന്നിവയുടെ നേതൃത്വത്തില്‍ പ്രതിഷേധം ആരംഭിച്ചു. 1980 ജൂലൈ 4ന് സെക്രട്ടേറിയറ്റിന് മുന്നില്‍ അധ്യാപകര്‍ ധര്‍ണ നടത്തി. പ്രതിപക്ഷ നേതാവായിരുന്ന സി.എച്ച്. മുഹമ്മദ് കോയ സമരം ഉദ്ഘാടനം ചെയ്ത് വിഷയത്തെ ജനകീയ പ്രക്ഷോഭമാക്കി മാറ്റണമെന്ന് ആഹ്വാനം ചെയ്തു. തുടര്‍ന്ന് മുസ്‌ലിം യൂത്ത് ലീഗ് സമരത്തിന്റെ നേതൃത്വം ഏറ്റെടുത്തു. ഭാഷാ അവകാശ സംരക്ഷണത്തിനായി സംസ്ഥാനവ്യാപക പ്രക്ഷോഭങ്ങള്‍ സംഘടിപ്പിക്കുകയും വിവിധ ജില്ലകളില്‍ പ്രതിഷേധ പരിപാടികള്‍ നടത്തുകയും ചെയ്തു.
മലപ്പുറത്ത് ചോരവീണ ജൂലൈ 30
റമദാനിലെ പതിനേഴാം ദിനമായ 1980 ജൂലൈ 30ന് സംസ്ഥാനത്തെ എല്ലാ ജില്ലാ കളക്ടറേറ്റുകളും പിക്കറ്റ് ചെയ്യാന്‍ മുസ്‌ലിം യൂത്ത് ലീഗ് തീരുമാനിച്ചു. മലപ്പുറത്ത് രാവിലെ കോട്ടപ്പടി മൈതാനിയില്‍ നിന്ന് ആയിരക്കണക്കിന് പ്രവര്‍ത്തകര്‍ മുണ്ടുപറമ്പിലെ കളക്ടറേറ്റിലേക്ക് സമാധാനപരമായി മാര്‍ച്ച് നടത്തി.
പ്രതിഷേധത്തിനിടെ സംഘര്‍ഷമുണ്ടായതിനെ തുടര്‍ന്ന് പൊലീസ് ആദ്യം ലാത്തിച്ചാര്‍ജും പിന്നീട് ടിയര്‍ ഗ്യാസും പ്രയോഗിച്ചു. തുടര്‍ന്ന് പൊലീസ് നടത്തിയ വെടിവെപ്പില്‍ മൂന്ന് യുവപ്രവര്‍ത്തകര്‍ കൊല്ലപ്പെടുകയും നിരവധി പേര്‍ക്ക് പരിക്കേല്‍ക്കുകയും ചെയ്തു. ഔദ്യോഗിക കണക്കുകള്‍ പ്രകാരം ഒരു പൊലീസുകാരനും കൊല്ലപ്പെട്ടു. പിന്നീട് പ്രദേശത്ത് വ്യാപക സംഘര്‍ഷവും നാശനഷ്ടങ്ങളും റിപ്പോര്‍ട്ട് ചെയ്യപ്പെട്ടു. കല്ലിടുമ്പില്‍ ചിറക്കല്‍ അബ്ദുറഹ്മാന്‍ (22) ദേവതിയാല്‍, പുത്തൂര്‍ പള്ളിക്കല്‍, കോതേങ്ങല്‍ അബ്ദുല്‍ മജീദ് (24) – മൈലപ്പുറം, ചേറുംകുളങ്ങര അബ്ദുല്ല (കുഞ്ഞിപ്പ) (24) കാളികാവ് പോലീസ് വെടിവെപ്പില്‍ കൊല്ലപ്പെട്ടു. ഈ മൂന്ന് യുവാക്കളും ഭാഷാ സമര രക്തസാക്ഷികളായി കേരളത്തിന്റെ ചരിത്രത്തില്‍ ഇടം നേടി.
നിയമസഭയില്‍ ചര്‍ച്ച
മലപ്പുറം വെടിവെപ്പിനെ തുടര്‍ന്ന് സംഭവം നിയമസഭയിലും ശക്തമായി ചര്‍ച്ചയായി. പ്രതിപക്ഷ നേതാവ് സി.എച്ച്. മുഹമ്മദ് കോയ നടത്തിയ പ്രസംഗം ഏറെ ശ്രദ്ധിക്കപ്പെട്ടു. മലപ്പുറത്ത് നടന്ന വെടിവെപ്പിനെ ശക്തമായി വിമര്‍ശിച്ച അദ്ദേഹം, ‘മലപ്പുറത്തു നിന്നു വരുന്ന കാറ്റിന് വെടിമരുന്നിന്റെയും പച്ചമാംസത്തിന്റെയും ഗന്ധമാണ്’ എന്ന് പ്രസംഗിച്ചു. സഭ താല്‍ക്കാലികമായി നിര്‍ത്തിവെച്ചു. അവിടുത്തെ സാഹചര്യം അതീവ ദുഃഖകരമാണെന്ന് സഭയില്‍ ചൂണ്ടിക്കാട്ടി. വിഷയത്തിന്റെ ഗൗരവം കണക്കിലെടുത്ത് നിയമസഭാ നടപടികള്‍ താല്‍ക്കാലികമായി നിര്‍ത്തിവെക്കുകയും ചെയ്തു.
സംഭവം ദേശീയ മാധ്യമങ്ങളും രാഷ്ട്രീയ നിരീക്ഷകരും ശ്രദ്ധാപൂര്‍വം വിലയിരുത്തി. പൊലീസ് അമിത ബലപ്രയോഗം നടത്തിയെന്ന ആരോപണവും സര്‍ക്കാര്‍ നിയമവും ക്രമവും പാലിക്കാനാണ് നടപടി സ്വീകരിച്ചതെന്ന വിശദീകരണവും അന്നത്തെ ചര്‍ച്ചകളില്‍ ഇടം നേടി.
സമരവിജയവും സര്‍ക്കാര്‍ തീരുമാനം
സംസ്ഥാനവ്യാപക പ്രതിഷേധം ശക്തമായതോടെ സര്‍ക്കാര്‍ വിവാദമായ അക്കമഡേഷന്‍, ഡിക്ലറേഷന്‍ വ്യവസ്ഥകള്‍ പിന്‍വലിച്ചു. നിലവിലുള്ള ഭാഷാ അധ്യാപകരുടെ സേവനവും സംരക്ഷിക്കപ്പെട്ടു. ഇതോടെ സമരത്തിന് നേതൃത്വം നല്‍കിയ സംഘടനകള്‍ ഇതിനെ ഭാഷാ അവകാശ പോരാട്ടത്തിന്റെ ചരിത്രവിജയമായി വിശേഷിപ്പിച്ചു. ഈ സമരത്തിന് ശേഷം മലബാര്‍ മേഖലയിലെ അറബി, ഉര്‍ദു പഠനത്തിന് കൂടുതല്‍ പ്രോത്സാഹനം ലഭിച്ചുവെന്നും ന്യൂനപക്ഷ ഭാഷാ വിദ്യാഭ്യാസ സംരക്ഷണത്തിന് ഇത് നിര്‍ണായക വഴിത്തിരിവായെന്നും വിദ്യാഭ്യാസ രംഗത്തെ നിരീക്ഷകര്‍ വിലയിരുത്തുന്നു.
1980 ജൂലൈ 30ലെ ഭാഷാ സമരത്തിന്റെ ഓര്‍മ്മ പുതുക്കി മുസ്‌ലിം യൂത്ത് ലീഗ് എല്ലാ വര്‍ഷവും ഭാഷാ ദിനം ആചരിക്കുന്നു. മലപ്പുറം ഉള്‍പ്പെടെ വിവിധ ജില്ലകളില്‍ രക്തസാക്ഷി മണ്ഡപങ്ങളില്‍ പുഷ്പാര്‍ച്ചന, അനുസ്മരണ സമ്മേളനങ്ങള്‍, സെമിനാറുകള്‍, വിദ്യാര്‍ത്ഥി സംഗമങ്ങള്‍ എന്നിവ സംഘടിപ്പിക്കാറുണ്ട്. സമരത്തെ അനുസ്മരിക്കുന്നവര്‍ ഇത് ഭാഷാ അവകാശത്തിനും സാംസ്‌കാരിക വൈവിധ്യത്തിനും വേണ്ടിയുള്ള ചരിത്രപരമായ പോരാട്ടമായി വിശേഷിപ്പിക്കുമ്പോള്‍, ചില രാഷ്ട്രീയ നിരീക്ഷകര്‍ അന്നത്തെ സംഭവവികാസങ്ങളെ വ്യത്യസ്ത രാഷ്ട്രീയ കാഴ്ചപ്പാടുകളിലൂടെയും വിലയിരുത്തുന്നു. എന്നിരുന്നാലും, 1980ലെ ഭാഷാ സമരം കേരളത്തിന്റെ സാമൂഹികവിദ്യാഭ്യാസ ചരിത്രത്തിലെ നിര്‍ണായക സംഭവങ്ങളിലൊന്നായി ഇന്നും ഓര്‍മ്മിക്കപ്പെടുന്നു.
