ഇറാന്‍ യുദ്ധം: വിലക്കയറ്റം നേരിടാനുള്ള രാജ്യങ്ങളുടെ സാമ്പത്തിക കരുതല്‍ശേഖരം കുറയുന്നു

വാഷിങ്ടണ്‍: ഇറാന്‍ യുദ്ധത്തിന്റെ സാമ്പത്തിക ആഘാതം പരിമിതപ്പെടുത്താന്‍ സഹായിച്ചിരുന്ന രാജ്യങ്ങളുടെ സാമ്പത്തിക കരുതല്‍ശേഖരം കുറഞ്ഞുവരുന്നതായി അന്താരാഷ്ട്ര നാണയനിധി (ഐഎംഎഫ്) മുന്നറിയിപ്പ് നല്‍കി. ഹോര്‍മുസ് കടലിടുക്കിലെ ഗതാഗത തടസ്സങ്ങള്‍ വീണ്ടും രൂക്ഷമായാല്‍ എണ്ണവിലയിലുണ്ടാകുന്ന വര്‍ധനയും വിലക്കയറ്റവും കൂടുതല്‍ ശക്തമാകാന്‍ സാധ്യതയുണ്ടെന്നും ഐഎംഎഫ് മിഡില്‍ ഈസ്റ്റ്, മധ്യേഷ്യ വിഭാഗം ഡയറക്ടര്‍ ജിഹാദ് അസൂര്‍ പറഞ്ഞു. തായ്‌ലന്‍ഡില്‍ നടക്കുന്ന ഐഎംഎഫ്-ലോകബാങ്ക് വാര്‍ഷിക യോഗത്തോടനുബന്ധിച്ച് മാധ്യമപ്രവര്‍ത്തകരോട് സംസാരിക്കുകയായിരുന്നു അദ്ദേഹം.

യുദ്ധത്തിന് മുമ്പ് രാജ്യങ്ങള്‍ കൈവശംവെച്ചിരുന്ന സാമ്പത്തിക കരുതലുകളും എണ്ണശേഖരവും ഉല്‍പ്പാദന ശേഷിയും പ്രതിസന്ധിയുടെ ആഘാതം കുറയ്ക്കാന്‍ സഹായിച്ചിട്ടുണ്ടെന്ന് അസൂര്‍ വ്യക്തമാക്കി. എന്നാല്‍ ഈ കരുതലുകള്‍ക്ക് പരിധിയുണ്ടെന്നും അവ കുറഞ്ഞുവരുകയാണെന്നും അദ്ദേഹം ചൂണ്ടിക്കാട്ടി. യുദ്ധത്തിന് മുമ്പ് ലോകത്തിലെ ഊര്‍ജവിതരണത്തിന്റെ അഞ്ചിലൊന്ന് കടന്നുപോയിരുന്ന ഹോര്‍മുസ് കടലിടുക്കിന്റെ ദീര്‍ഘകാല അടച്ചിടല്‍ ആഗോള വിപണികളെ ബാധിച്ചിട്ടുണ്ട്. കടലിടുക്കിലൂടെയുള്ള കപ്പല്‍ഗതാഗതത്തിനു നേരെയുള്ള ഇറാന്റെ ആക്രമണങ്ങളും അയല്‍രാജ്യങ്ങളിലെ പ്രധാന കേന്ദ്രങ്ങള്‍ക്കു നേരെയുള്ള ആക്രമണങ്ങളും ആശങ്ക വര്‍ധിപ്പിക്കുന്നു. ‘പ്രതീക്ഷിച്ചിരുന്നതിനെ അപേക്ഷിച്ച് സാമ്പത്തിക ആഘാതം ഇതുവരെ നിയന്ത്രിക്കാനായിട്ടുണ്ട്. എന്നാല്‍ ഈ ആശ്വാസം താല്‍ക്കാലികമാണ്. എണ്ണശേഖരം കുറഞ്ഞു, അധിക ഉല്‍പ്പാദനശേഷി ചുരുങ്ങി. വീണ്ടും തടസ്സങ്ങളുണ്ടായാല്‍ വിലയില്‍ വലിയ വര്‍ധനയുണ്ടാകാം,’ അസൂര്‍ മുന്നറിയിപ്പ് നല്‍കി.

ഗള്‍ഫ് എണ്ണവിതരണത്തിന് ഭീഷണി

സൗദി അറേബ്യ ഉള്‍പ്പെടെയുള്ള ഗള്‍ഫ് രാജ്യങ്ങള്‍ എണ്ണ കയറ്റുമതിക്ക് ബദല്‍ മാര്‍ഗങ്ങള്‍ തേടിവരികയാണ്. ഊര്‍ജവിതരണത്തിലെ തടസ്സങ്ങള്‍ നേരിടാന്‍ അന്താരാഷ്ട്ര ഊര്‍ജ ഏജന്‍സിയിലെ അംഗരാജ്യങ്ങള്‍ മാര്‍ച്ചില്‍ കരുതല്‍ എണ്ണശേഖരത്തില്‍നിന്ന് 42.5 കോടി ബാരല്‍ വരെ വിപണിയിലെത്തിക്കാനും തീരുമാനിച്ചിരുന്നു. ഗള്‍ഫ് മേഖലയ്ക്ക് പുറത്തുള്ള രാജ്യങ്ങളിലെ ഉല്‍പ്പാദനവും ഊര്‍ജാവശ്യകതയിലെ മാറ്റങ്ങളും പ്രതിസന്ധിയുടെ ആഘാതം കുറയ്ക്കാന്‍ സഹായിച്ചതായി അസൂര്‍ പറഞ്ഞു. സെപ്റ്റംബറില്‍ സൗദി അറേബ്യയുടെ നേതൃത്വത്തിലുള്ള ഗള്‍ഫ് രാജ്യങ്ങളില്‍നിന്നുള്ള ക്രൂഡ് ഓയില്‍ കയറ്റുമതി പ്രതിദിനം 44 ലക്ഷം ബാരല്‍ വര്‍ധിച്ചതായി അന്താരാഷ്ട്ര ഊര്‍ജ ഏജന്‍സി അറിയിച്ചു. ഇതോടെ കയറ്റുമതി യുദ്ധത്തിന് മുമ്പുള്ള നിലവാരത്തിന്റെ 75 ശതമാനത്തിലധികമായി. എന്നാല്‍ സൗദി അറേബ്യയ്ക്കും എണ്ണക്കപ്പല്‍ ഗതാഗതത്തിനും നേരെയുള്ള ആക്രമണങ്ങള്‍ ഈ നേട്ടങ്ങളെ അപകടത്തിലാക്കുന്നുവെന്നാണ് ഏജന്‍സിയുടെ വിലയിരുത്തല്‍. കഴിഞ്ഞ ഒരാഴ്ചയ്ക്കിടെ ഹോര്‍മുസ് കടലിടുക്കിലും പരിസരത്തുമായി കുറഞ്ഞത് 12 എണ്ണക്കപ്പലുകള്‍ ആക്രമിക്കപ്പെട്ടതായി ബ്രിട്ടീഷ് മാരിടൈം ട്രേഡ് ഓപ്പറേഷന്‍സ് ഏജന്‍സി അറിയിച്ചു. ബുധനാഴ്ച ഇറാന്‍ പിന്തുണയ്ക്കുന്ന ഹൂതി വിമതര്‍ സൗദി അരാംകോയുടെ ആസ്ഥാനത്തും ആക്രമണം നടത്തി. ആളപായമൊന്നും റിപ്പോര്‍ട്ട് ചെയ്തിട്ടില്ല. ഹോര്‍മുസ് കടലിടുക്കില്‍ നാവിക മൈനില്‍ തട്ടിയ ചരക്കുകപ്പല്‍ മുങ്ങിയതായും റിപ്പോര്‍ട്ടുണ്ട്.

2027-ല്‍ ഗള്‍ഫ് സാമ്പത്തിക വളര്‍ച്ച കൂടും

യുദ്ധത്തിന്റെ ആഘാതം ഗള്‍ഫ് രാജ്യങ്ങളെ ഒരേ രീതിയിലല്ല ബാധിക്കുന്നതെന്ന് ഐഎംഎഫ് വിലയിരുത്തുന്നു. എണ്ണ കയറ്റുമതി രാജ്യങ്ങളും എണ്ണ ഇറക്കുമതി രാജ്യങ്ങളും തമ്മില്‍ സാമ്പത്തിക വളര്‍ച്ചയില്‍ വലിയ വ്യത്യാസമുണ്ടാകുമെന്നാണ് പ്രവചനം. പ്രവാസിപ്പണമൊഴുക്ക്, വിനോദസഞ്ചാരം, സര്‍ക്കാര്‍ സഹായം എന്നിവ ചില രാജ്യങ്ങള്‍ക്ക് ആശ്വാസമാകുന്നുണ്ട്. ഐഎംഎഫിന്റെ 2026ലെ പ്രവചനമനുസരിച്ച് ബഹ്‌റൈനില്‍ 11.3 ശതമാനവും ഇറാഖില്‍ 16 ശതമാനവും കുവൈത്തില്‍ 16.7 ശതമാനവും ഖത്തറില്‍ 15.6 ശതമാനവും സൗദി അറേബ്യയില്‍ 3.3 ശതമാനവും യുഎഇയില്‍ 3.9 ശതമാനവും സാമ്പത്തിക സങ്കോചമുണ്ടാകാം. എന്നാല്‍ 2027ല്‍ സാമ്പത്തിക വളര്‍ച്ച തിരിച്ചുവരുമെന്നാണ് പ്രതീക്ഷ. എന്നാല്‍ സംഘര്‍ഷത്തിന് മുമ്പ് പ്രതീക്ഷിച്ചിരുന്ന ഇടക്കാല വളര്‍ച്ചാനിലവാരത്തേക്കാള്‍ താഴെയായിരിക്കും ഉല്‍പ്പാദനമെന്ന് അസൂര്‍ പറഞ്ഞു.

യുദ്ധം ദീര്‍ഘകാലം തുടരുന്നതാണ് മേഖലയ്ക്ക് മുന്നിലുള്ള ഏറ്റവും വലിയ അപകടം. കൂടുതല്‍ വിതരണ തടസ്സങ്ങള്‍ സാമ്പത്തിക പ്രവര്‍ത്തനങ്ങളെ ദുര്‍ബലപ്പെടുത്തുകയും പണപ്പെരുപ്പ സമ്മര്‍ദം വര്‍ധിപ്പിക്കുകയും സര്‍ക്കാരുകളുടെ ധനകാര്യസ്ഥിതിക്ക് കൂടുതല്‍ വെല്ലുവിളിയാകുകയും ചെയ്യും. വലിയ തോതില്‍ വായ്പയും ധനസമാഹരണവും ആവശ്യമായ രാജ്യങ്ങളില്‍ സാമ്പത്തിക സാഹചര്യങ്ങള്‍ കൂടുതല്‍ കടുപ്പിക്കുന്നത് അപകടസാധ്യത വര്‍ധിപ്പിക്കുമെന്നും അദ്ദേഹം മുന്നറിയിപ്പ് നല്‍കി.

യുഎഇയുടെ ശക്തമായ സാമ്പത്തിക കരുത്ത്

യുഎഇ സെന്‍ട്രല്‍ ബാങ്ക് ഗവര്‍ണര്‍ ഖാലിദ് ബാലാമയുടെ അഭിപ്രായത്തില്‍, മാറുന്ന സാഹചര്യങ്ങളോട് വേഗത്തില്‍ പൊരുത്തപ്പെടാനുള്ള ശേഷിയും സാമ്പത്തിക കരുതല്‍ശേഖരവുമാണ് രാജ്യങ്ങളുടെ പ്രതിരോധശേഷി നിര്‍ണയിക്കുന്നത്. ബാങ്കോക്കില്‍ ഐഎംഎഫ്-ലോകബാങ്ക് യോഗത്തോടനുബന്ധിച്ച് നടന്ന പ്രാദേശിക സെന്‍ട്രല്‍ ബാങ്ക് ഗവര്‍ണര്‍മാരുടെയും ധനമന്ത്രിമാരുടെയും യോഗത്തില്‍ സംസാരിക്കുകയായിരുന്നു അദ്ദേഹം. ശക്തമായ സാമ്പത്തിക കരുതല്‍ശേഖരം, കുറഞ്ഞ പൊതുകടം, വലിയ പരമാധികാര ആസ്തികള്‍ എന്നിവ യുഎഇ സമ്പദ്‌വ്യവസ്ഥയുടെ കരുത്ത് വര്‍ധിപ്പിക്കുന്നതായും ഇത് നിക്ഷേപകരുടെയും വിപണിയുടെയും വിശ്വാസം ഉറപ്പാക്കുന്നതായും ബാലാമ പറഞ്ഞു. ഭൗമരാഷ്ട്രീയ സംഘര്‍ഷങ്ങള്‍ നിലനില്‍ക്കുന്ന സാഹചര്യത്തില്‍ അന്താരാഷ്ട്ര സഹകരണം ശക്തിപ്പെടുത്തേണ്ടതിന്റെ ആവശ്യകതയും അദ്ദേഹം ചൂണ്ടിക്കാട്ടി. മിഡില്‍ ഈസ്റ്റിനെക്കുറിച്ചുള്ള ഐഎംഎഫിന്റെ വിശദമായ സാമ്പത്തിക അവലോകനം അടുത്തയാഴ്ച ദുബൈയില്‍ പ്രസിദ്ധീകരിക്കും.