അല്‍ ഐന്‍ അന്താരാഷ്ട്ര വിമാനത്താവളം ഇനി തഹ്നൂന്‍ ഇന്റര്‍നാഷണല്‍ എയര്‍പോര്‍ട്ട്
Mon, 12 Oct 2026
ദുബൈ: എല്ലാ പ്രവാസികളെയും സമ്പന്നരായി വിലയിരുത്തുന്നത് തിരുത്തണമെന്നും ബഹുഭൂരിപക്ഷം വരുന്ന അടിസ്ഥാന വിഭാഗത്തെയാണ് ചേര്‍ത്ത് പിടിക്കേണ്ടതെന്നും നാദാപുരം എംഎല്‍എ കെ.എം അഭിജിത് അഭിപ്രായപ്പെട്ടു. കുടുംബ പ്രാരാബ്ധങ്ങള്‍ തീരാതെ അറുപത് കഴിഞ്ഞും വീണ്ടും ഗള്‍ഫ് നാടുകളിലേക്കെത്തുന്ന നിരവധി പ്രവാസികള്‍ നമുക്ക് ചുറ്റുമുണ്ട്. പത്ത് ശതമാനം മാത്രം വരുന്ന ബിസിനസുകാരെ മാത്രം വിലയിരുത്തി പ്രവാസത്തിന്റെ പ്രശ്‌നങ്ങള്‍ നോക്കിക്കാണരുത്. പ്രവാസികളുടെ പ്രശ്‌നങ്ങള്‍ക്ക് പരിഹരിക്കുന്നതിനും ക്ഷേമപദ്ധതികള്‍ നടപ്പിലാക്കുന്നതിനും കാലോചിതമായ നിയമനിര്‍മ്മാണം അനിവാര്യമാണ്. പ്രവാസികള്‍ തിങ്ങിപാര്‍ക്കുന്ന നാദാപുരം പോലുള്ള മേഖലകളില്‍ പ്രവാസി പങ്കാളിത്തത്തോടെ സമഗ്രവികസന പദ്ധതികളും വേണം. സമൂലമായ ഒരു നിയമനിര്‍മ്മാണത്തിനുള്ള എല്ലാ മാര്‍ഗങ്ങളും തേടുമെന്നും പ്രവാസി പങ്കാളിത്തത്തോടെ ജനക്ഷേമപരമായ പദ്ധതികള്‍ക്ക് നേതൃത്വം നല്‍കുമെന്നും അഭിജിത് പറഞ്ഞു. യുഎഇ യുഡിഎഫ് കോര്‍ഡിനേഷന്‍ കമ്മിറ്റി ദുബൈയില്‍ സംഘടിപ്പിച്ച ഹൃദയാദരം സ്വീകരണ പരിപാടിയില്‍ സംസാരിക്കുകയായിരുന്നു എംഎല്‍എ. യുഎഇയില്‍ മൂന്ന് ദിവസം പര്യടനം നടത്തിയ വിവിധ മേഖലകളിലെ പ്രവാസി തൊഴിലാളികളുടെയും സംരംഭകരുടെയും പ്രശ്‌നങ്ങളും വിഷയങ്ങളും പഠിച്ച ശേഷമാണ് എംഎല്‍എ നാട്ടിലേക്ക് മടങ്ങിയത്.
ദുബൈയില്‍ അക്ഷരാര്‍ത്ഥത്തില്‍ രാജകീയ സ്വീകരണമാണ് കെഎംസിസിയുടെയും ഇന്‍കാസിന്റെയും നേതൃത്വത്തില്‍ നല്‍കിയത്. വികസന മുരടിപ്പും കക്ഷിരാഷ്ട്രീയത്തിന്റെ അതിപ്രസരവും വരട്ടുവാദ സിദ്ധാന്തങ്ങളും മാത്രം അനുഭവിച്ചിരുന്ന നാദാപുരത്തിന്റെ മാനവിക മണ്ണില്‍ ആറ് പതിറ്റാണ്ടുകള്‍ക്ക് ശേഷം ജനാധിപത്യ മനസ്സുള്ള ഒരു ജനപ്രതിനിധി എത്തിയ സന്തോഷത്തിലായിരുന്നു പ്രവാസി സമൂഹം. യുഎഇയുടെ വിവിധ എമിറേറ്റുകളില്‍ നിന്നുള്ള നാദാപുരം നിവാസികള്‍ കുടുംബസമേതം കൂട്ടത്തോടെയാണ് എംഎല്‍എക്ക് സ്വീകരണമൊരുക്കാന്‍ എത്തിയത്. നാദാപുരത്തിന്റെ തനിമയുള്ള കലാപരിപാടികളും അരങ്ങേറി. സ്വീകരണ പരിപാടിയില്‍ സ്വാഗതസംഘം കമ്മിറ്റി ചെയര്‍മാനും ദുബൈ കെഎംസിസി കോഴിക്കോട് ജില്ലാ കമ്മിറ്റി പ്രസിഡന്റുമായ കെ.പി മുഹമ്മദ് അധ്യക്ഷത വഹിച്ചു. ദുബൈ കെഎംസിസി പ്രസിഡന്റ് ഡോ.അന്‍വര്‍ അമീന്‍ ഉദ്ഘാടനം ചെയ്തു. വൈസ് പ്രസിഡന്റ് ഇസ്മായില്‍ ഏറാമല, ദുബൈ ഇന്‍കാസ് പ്രസിഡന്റ് റഫീഖ് മട്ടന്നൂര്‍, നാദാപുരം യുഎഇ കമ്മിറ്റി ജനറല്‍ സെക്രട്ടറി സ്വാലിഹ് പുതുശ്ശേരി, സ്വാഗതസംഘം രക്ഷാധികാരി ഹസ്സന്‍ ചാലില്‍, ദുബൈ ഇന്‍കാസ് കോഴിക്കോട് ജില്ലാ പ്രസിഡന്റ് വിജയ് തോട്ടത്തില്‍, സ്വാഗതസംഘം കോഡിനേറ്റര്‍ യു.കെ റാഷിദ്, ഷാര്‍ജ കെഎംസിസി സെക്രട്ടറി നസീര്‍ കുനിയില്‍, ദുബൈ കെഎംസിസി നാദാപുരം മണ്ഡലം പ്രസിഡന്റ് വി.വി സൈനുദ്ദീന്‍, കര്‍ഷക കോണ്‍ഗ്രസ് സംസ്ഥാന ജനറല്‍ സെക്രട്ടറി രവീഷ് വളയം പ്രസംഗിച്ചു. സ്വാഗതസംഘം ജനറല്‍ കണ്‍വീനര്‍ ഇക്ബാല്‍ ചെക്യാട് സ്വാഗതവും ട്രഷറര്‍ ഷംസീര്‍ നാദാപുരം നന്ദിയും പറഞ്ഞു.
