തുടര്‍ച്ചയായി വാഹനമോടിക്കാന്‍ 9 മണിക്കൂര്‍ സമയപരിധി നിശ്ചയിച്ച് യുഎഇ
Wed, 04 Nov 2026
തെല്‍ അവീവ്: ഇസ്രായേലില്‍ കഴിഞ്ഞയാഴ്ച നടന്ന പാര്‍ലമെന്റ് തിരഞ്ഞെടുപ്പില്‍ ആര്‍ക്കും വ്യക്തമായ ഭൂരിപക്ഷം ലഭിക്കാത്തതോടെ പുതിയ സര്‍ക്കാര്‍ രൂപീകരണം അനിശ്ചിതത്വത്തില്‍. പ്രധാനമന്ത്രി ബെഞ്ചമിന്‍ നെതന്യാഹുവിന്റെ സഖ്യത്തിന് പാര്‍ലമെന്റിലെ ഭൂരിപക്ഷം നഷ്ടമായപ്പോള്‍, അദ്ദേഹത്തെ അധികാരത്തില്‍നിന്ന് പുറത്താക്കാന്‍ ലക്ഷ്യമിട്ട പ്രതിപക്ഷ സഖ്യത്തിനും കേവല ഭൂരിപക്ഷം നേടാനായില്ല. 120 അംഗങ്ങളുള്ള ഇസ്രായേല്‍ പാര്‍ലമെന്റായ നെസറ്റില്‍ സര്‍ക്കാര്‍ രൂപീകരിക്കാന്‍ കുറഞ്ഞത് 61 അംഗങ്ങളുടെ പിന്തുണ ആവശ്യമാണ്. എന്നാല്‍ തിരഞ്ഞെടുപ്പില്‍ മൂന്ന് വിഭാഗങ്ങളായി ജനവിധി വിഭജിക്കപ്പെട്ടതോടെ ആര്‍ക്കും ഒറ്റയ്ക്ക് സര്‍ക്കാര്‍ രൂപീകരിക്കാനുള്ള അംഗബലമില്ല. താല്‍ക്കാലിക പ്രധാനമന്ത്രിയായി നെതന്യാഹു തുടരുന്നുണ്ടെങ്കിലും പാര്‍ലമെന്റില്‍ പ്രതിപക്ഷത്തിനാണ് കൂടുതല്‍ അംഗങ്ങളുള്ളത്. പുതിയ സര്‍ക്കാര്‍ രൂപീകരിക്കാനുള്ള ചര്‍ച്ചകള്‍ക്ക് ആഴ്ചകള്‍ വേണ്ടിവന്നേക്കും. ചര്‍ച്ചകള്‍ പരാജയപ്പെട്ടാല്‍ വീണ്ടും തിരഞ്ഞെടുപ്പ് നടത്തേണ്ടിവരാനും സാധ്യതയുണ്ട്.
തിരഞ്ഞെടുപ്പ് ഫലം ഇങ്ങനെ
2026 ഒക്ടോബര്‍ 27നായിരുന്നു തിരഞ്ഞെടുപ്പ്. ഇതില്‍ നെതന്യാഹുവിന്റെ വലതുപക്ഷ, തീവ്ര വലതുപക്ഷ പാര്‍ട്ടികളുടെ സഖ്യത്തിന് 53 സീറ്റുകള്‍ ലഭിച്ചു. നെതന്യാഹുവിന്റെ ലിക്കുഡ് പാര്‍ട്ടി 27 സീറ്റുകളോടെ ഏറ്റവും വലിയ ഒറ്റക്കക്ഷിയായി. മധ്യപക്ഷ നേതാവ് ഗാദി ഐസന്‍കോട്ടിന്റെ നേതൃത്വത്തിലുള്ള പ്രതിപക്ഷ സഖ്യത്തിന് 48 സീറ്റുകളാണ് ലഭിച്ചത്. നെതന്യാഹുവിനെതിരായ നിലപാടുമായി വന്‍തോതില്‍ വോട്ട് രേഖപ്പെടുത്തിയ അറബ് വംശജരായ ഇസ്രായേലികളുടെ പിന്തുണയില്‍ അറബ് പാര്‍ട്ടികള്‍ വലിയ മുന്നേറ്റം നടത്തി. റാം പാര്‍ട്ടിയും ജോയിന്റ് ലിസ്റ്റും ചേര്‍ന്ന് 19 സീറ്റുകള്‍ നേടി.
നേടിയ സീറ്റുകള്‍ ഇങ്ങനെ: നെതന്യാഹുവിന്റെ ഭരണസഖ്യം-53, ഗാദി ഐസന്‍കോട്ടിന്റെ പ്രതിപക്ഷ സഖ്യം-48, അറബ് പാര്‍ട്ടികള്‍ (റാം, ജോയിന്റ് ലിസ്റ്റ്)-19. ആകെ-120.
തിരഞ്ഞെടുപ്പിന്റെ ഔദ്യോഗിക ഫലങ്ങള്‍ നവംബര്‍ 4നകം സാക്ഷ്യപ്പെടുത്തി പ്രസിഡന്റ് ഐസക് ഹെര്‍സോഗിന് സമര്‍പ്പിക്കണം. പുതിയ പാര്‍ലമെന്റ് നവംബര്‍ 10ന് സത്യപ്രതിജ്ഞ ചെയ്ത് അധികാരമേല്‍ക്കും. നെതന്യാഹുവിനെയോ മുന്‍ സൈനിക മേധാവിയും പ്രതിപക്ഷ നേതാവുമായ ഗാദി ഐസന്‍കോട്ടിനെയോ പ്രസിഡന്റ് സര്‍ക്കാര്‍ രൂപീകരിക്കാന്‍ ക്ഷണിച്ചേക്കുമെന്നാണ് റിപ്പോര്‍ട്ട്. തിരഞ്ഞെടുപ്പില്‍ ഭൂരിപക്ഷം നേടാനായില്ലെങ്കിലും ഇരുവരും സര്‍ക്കാര്‍ രൂപീകരിക്കുമെന്ന് പ്രഖ്യാപിച്ചിട്ടുണ്ട്. അധികാരം നിലനിര്‍ത്താന്‍ നെതന്യാഹു കഠിനമായി ശ്രമിക്കുന്നുണ്ട്. ഇതനായി തിരഞ്ഞെടുപ്പില്‍ അറബ് പാര്‍ട്ടികള്‍ വിദേശത്തുനിന്ന് സാമ്പത്തിക സഹായം സ്വീകരിച്ച് വോട്ടര്‍മാരെ സ്വാധീനിച്ചെന്ന ആരോപണവുമായി നെതന്യാഹുവിന്റെ അനുയായികള്‍ രംഗത്തെത്തി. അതേസമയം വ്യാപകമായ ക്രമക്കേടുകള്‍ നടന്നെന്ന ആരോപണങ്ങള്‍ അടിസ്ഥാനരഹിതമാണെന്ന് തിരഞ്ഞെടുപ്പ് കമ്മീഷന്‍ ആക്ടിങ് ഡയറക്ടര്‍ ജനറല്‍ ഡീന്‍ ലിവ്‌നെയും പ്രതികരിച്ചു. റാം പാര്‍ട്ടി നേതാവ് മന്‍സൂര്‍ അബ്ബാസ് ആരോപണങ്ങള്‍ നിഷേധിക്കുകയും അന്വേഷണം സ്വാഗതം ചെയ്യുകയും ചെയ്തു. അറബ് വോട്ടര്‍മാരുടെ വര്‍ധിച്ചുവരുന്ന രാഷ്ട്രീയ സ്വാധീനത്തില്‍ ആശങ്കപ്പെട്ടാണ് നെതന്യാഹുവും അനുയായികളും പ്രചാരണം നടത്തുന്നതെന്ന് ജോയിന്റ് ലിസ്റ്റും ആരോപിച്ചു. അറബ് പാര്‍ട്ടികളുടെ പിന്തുണയോടെ ഐസന്‍കോട്ടിന് 67 അംഗങ്ങളുടെ പിന്തുണ ഉറപ്പാക്കാന്‍ കഴിയും. ഇത് സര്‍ക്കാര്‍ രൂപീകരണത്തിന് ആവശ്യമായ 61 സീറ്റുകളേക്കാള്‍ കൂടുതലാണ്. എന്നാല്‍ അറബ് പാര്‍ട്ടികളുമായി ചേര്‍ന്ന് സര്‍ക്കാര്‍ രൂപീകരിക്കുകയെന്ന ആശയം ഇസ്രായേലിലെ പല രാഷ്ട്രീയ വിഭാഗങ്ങള്‍ക്കും സ്വീകാര്യമല്ലാത്ത സാഹചര്യമാണ് നിലനില്‍ക്കുന്നത്.
