സൈബര് സെക്യൂരിറ്റി പരീക്ഷയില് മികച്ച വിജയം നേടി നൗഫിയ നൗഷാദ്
Thu, 02 Jul 2026
ന്യൂഡല്ഹി: വാട്ട്സ്ആപ്പില് സുരക്ഷാ സംവിധാങ്ങള് അവതരിപ്പിച്ച് മെറ്റ. ഉപയോക്താക്കള് യൂസര്നെയിം നിര്ബന്ധമായും ഉണ്ടാക്കേണ്ടതില്ലെന്നും, നിലവിലുള്ള ഫോണ് നമ്പര് അടിസ്ഥാനമാക്കിയുള്ള അക്കൗണ്ടുകള് ഉപയോഗിച്ച് പ്ലാറ്റ്ഫോമില് തുടരാനാകുമെന്നും വാട്ട്സ്ആപ്പ് അറിയിച്ചു.
മെറ്റായുടെ ഉടമസ്ഥതയിലുള്ള വാട്ട്സ്ആപ്പ്, വരാനിരിക്കുന്ന യൂസര്നെയിം ഫീച്ചര് എങ്ങനെ പ്രവര്ത്തിക്കുമെന്ന് വിശദീകരിക്കുന്ന ചോദ്യോത്തരങ്ങള് പുറത്തിറക്കി. ആള്മാറാട്ടം, ഫിഷിംഗ്, ഓണ്ലൈന് തട്ടിപ്പ്, ‘ഡിജിറ്റല് അറസ്റ്റ്’ തുടങ്ങിയ തട്ടിപ്പുകള്ക്ക് ഈ ഫീച്ചര് കാരണമാകുമെന്ന ആശങ്കയെത്തുടര്ന്ന് ഇന്ത്യന് സര്ക്കാര് വിശദീകരണം തേടിയ പശ്ചാത്തലത്തിലാണിത്. യൂസര്നെയിമുകള് തികച്ചും ഐച്ഛികമായിരിക്കുമെന്നും, ദുരുപയോഗം തടയുന്നതിനായി പൊതുപ്രവര്ത്തകര്, സര്ക്കാര് സ്ഥാപനങ്ങള്, മെറ്റാ വെരിഫൈഡ് അക്കൗണ്ടുകള് എന്നിവയ്ക്ക് സംരക്ഷണം നല്കുന്ന നിരവധി സുരക്ഷാ സംവിധാനങ്ങള് ഉള്പ്പെടുത്തിയിട്ടുണ്ടെന്നും മെസേജിംഗ് പ്ലാറ്റ്ഫോം വ്യക്തമാക്കി. ഇന്ഫര്മേഷന് ടെക്നോളജി ആക്റ്റും അനുബന്ധ ചട്ടങ്ങളും അനുസരിച്ച് നടപടിയെടുക്കാതിരിക്കാന് കാരണമുണ്ടെങ്കില് ബോധിപ്പിക്കണമെന്നാവശ്യപ്പെട്ട് കേന്ദ്രസര്ക്കാര് മെറ്റായ്ക്ക് നോട്ടീസ് നല്കി ഒരു ദിവസത്തിന് ശേഷമാണ് ഈ വിശദീകരണം വരുന്നത്. സര്ക്കാരുമായുള്ള കൂടിയാലോചനകള് തൃപ്തികരമായി പൂര്ത്തിയാകുന്നതുവരെ ഈ ഫീച്ചര് ഇന്ത്യയില് അവതരിപ്പിക്കരുതെന്നും മൂന്ന് ദിവസത്തിനകം വിശദമായ മറുപടി നല്കണമെന്നും സര്ക്കാര് നിര്ദ്ദേശിച്ചിട്ടുണ്ട്.
ഇന്സ്റ്റാഗ്രാം അല്ലെങ്കില് ടെലിഗ്രാം പോലുള്ള മറ്റ് പ്ലാറ്റ്ഫോമുകളില് നിന്ന് വ്യത്യസ്തമായി, വാട്ട്സ്ആപ്പിലെ യൂസര്നെയിമുകള് എല്ലാവര്ക്കും തിരയാന് സാധിക്കില്ല. ഇത് അപരിചിതരില് നിന്നുള്ള ശല്യം ഒഴിവാക്കാന് സഹായിക്കും. ‘വാട്ട്സ്ആപ്പില് നിങ്ങള്ക്ക് ഒരു ഫോണ് നമ്പര് തിരയാന് കഴിയാത്തതുപോലെ, ഒരു യൂസര്നെയിമും തിരയാന് കഴിയില്ല.
ഉപയോക്താക്കളുടെ സ്വകാര്യത വര്ദ്ധിപ്പിക്കുന്നതിനായി വാട്ട്സ്ആപ്പ് ഒരു ഓപ്ഷണല് ‘യൂസര്നെയിം കീ അവതരിപ്പിക്കും. ഈ ഫീച്ചര് ഓണാക്കുന്ന ഉപയോക്താക്കളെ ബന്ധപ്പെടണമെങ്കില് അവരുടെ യൂസര്നെയിമും അതോടൊപ്പം ഈ പ്രത്യേക സുരക്ഷാ കീയും അറിഞ്ഞിരിക്കണം. യൂസര്നെയിം കീ എപ്പോള് വേണമെങ്കിലും മാറ്റാനും സാധിക്കും. മുമ്പ് ആശയവിനിമയം നടത്തിയിട്ടില്ലാത്ത ഒരാളില് നിന്ന് സന്ദേശം ലഭിക്കുമ്പോള്, വാട്ട്സ്ആപ്പ് താഴെ പറയുന്നവ ഉള്പ്പെടെയുള്ള കൂടുതല് സുരക്ഷാ വിവരങ്ങള് കാണിക്കും. സന്ദേശം അയക്കുന്ന ആളുടെ രാജ്യം. അക്കൗണ്ട് പുതിയതായി ഉണ്ടാക്കിയതാണോ എന്നത്. സന്ദേശം അയക്കുന്ന ആളും ലഭിക്കുന്ന ആളും തമ്മില് പൊതുവായ ഗ്രൂപ്പുകള് ഉണ്ടോ എന്നത്. അപരിചിതരായ ഉപയോക്താക്കളെ ബ്ലോക്ക് ചെയ്യാനും റിപ്പോര്ട്ട് ചെയ്യാനുമുള്ള നിലവിലുള്ള സുരക്ഷാ ഫീച്ചറുകളും ലഭ്യമായിരിക്കും. ആള്മാറാട്ടത്തെക്കുറിച്ചുള്ള ആശങ്കകള് പരിഹരിക്കുന്നതിനായി, പ്രശസ്തരായ വ്യക്തികള്, സര്ക്കാര് സ്ഥാപനങ്ങള്, മെറ്റാ വെരിഫൈഡ് അക്കൗണ്ടുകള് എന്നിവര്ക്കായി അവരുടെ പേരുകളുള്ള യൂസര്നെയിമുകള് റിസര്വ് ചെയ്ത് സംരക്ഷിക്കുമെന്ന് വാട്ട്സ്ആപ്പ് അറിയിച്ചു. ആര്ക്കുവേണമെങ്കിലും പ്രശസ്തമായ യൂസര്നെയിമുകള് സ്വന്തമാക്കാം എന്ന റിപ്പോര്ട്ടുകള് കമ്പനി തള്ളിക്കളഞ്ഞു. യഥാര്ത്ഥ അക്കൗണ്ട് ഉടമകള്ക്ക് മാത്രമേ ഇത്തരം സംരക്ഷിത പേരുകള് സ്വന്തമാക്കാന് കഴിയൂ. യഥാര്ത്ഥ അക്കൗണ്ട് ഉടമകള്ക്ക് മാത്രമേ പ്രശസ്തരായ പൊതുവ്യക്തികളുടെ പേരുകള് റിസര്വ് ചെയ്യാന് കഴിയൂ ന്നെും വാട്ട്സ്ആപ്പ് വ്യക്തമാക്കി. ഈ വര്ഷം അവസാനത്തോടെ ആഗോളതലത്തില് ഈ ഫീച്ചര് അവതരിപ്പിക്കുന്നതിന് മുന്പ് പൊതുജനങ്ങളുടെ അഭിപ്രായം അറിയാനും കമ്പനി ലക്ഷ്യമിടുന്നു. യൂസര്നെയിം അടിസ്ഥാനമാക്കിയുള്ള മെസേജിംഗ് അവതരിപ്പിക്കുമ്പോള് തന്നെ, തട്ടിപ്പുകാരെ കണ്ടെത്താനും ഉചിതമായ നടപടിയെടുക്കാനും ഉപയോക്താക്കളുടെ റിപ്പോര്ട്ടുകളും അക്കൗണ്ട് ബ്ലോക്കുകളും നിരീക്ഷിക്കുന്നത് തുടരുമെന്നും കമ്പനി കൂട്ടിച്ചേര്ത്തു.
