സൗരവൈദ്യുതി ഉല്‍പ്പാദനത്തില്‍ ലോകത്ത് ഒന്നാമതെത്താന്‍ യുഎഇ
Sat, 07 Nov 2026
കൊച്ചി: മാതാപിതാക്കളുടെ മോശം സിബില്‍ സ്‌കോര്‍ (വായ്പ തിരിച്ചടവ് ചരിത്രം) മക്കളുടെ വിദ്യാഭ്യാസ വായ്പ അനുവദിക്കുമ്പോള്‍ ബാങ്കുകള്‍ക്ക് പരിഗണിക്കാമെന്ന് കേരള ഹൈക്കോടതി വിധിച്ചു. മാതാപിതാക്കളുടെ ക്രെഡിറ്റ് സ്‌കോര്‍ മോശമാണെന്ന കാരണത്താല്‍ വിദ്യാഭ്യാസ വായ്പ നിഷേധിച്ചതിനെ ചോദ്യം ചെയ്ത് വിദ്യാര്‍ഥികള്‍ സമര്‍പ്പിച്ച ഹര്‍ജികള്‍ കോടതി തള്ളി. ജസ്റ്റിസ് എം.എ. അബ്ദുല്‍ ഹഖീം അധ്യക്ഷനായ ബെഞ്ചാണ് വിധി പ്രസ്താവിച്ചത്. സ്റ്റേറ്റ് ബാങ്ക് ഓഫ് ഇന്ത്യ, ഇന്ത്യന്‍ ബാങ്ക് ഉള്‍പ്പെടെയുള്ള ബാങ്കുകള്‍ക്കെതിരെയാണ് വിവിധ വിദ്യാര്‍ഥികള്‍ ഹര്‍ജികള്‍ നല്‍കിയത്.
ഉന്നത വിദ്യാഭ്യാസത്തിനായി അപേക്ഷിച്ച വിദ്യാര്‍ഥികള്‍, പഠനം പൂര്‍ത്തിയാക്കി ജോലി ലഭിച്ച ശേഷം വായ്പ തിരിച്ചടക്കുന്നത് തങ്ങളായിരിക്കുമെന്നും, അതിനാല്‍ മാതാപിതാക്കളുടെ മോശം ക്രെഡിറ്റ് ചരിത്രം മാത്രം ചൂണ്ടിക്കാട്ടി വായ്പ നിഷേധിക്കുന്നത് വിദ്യാഭ്യാസ വായ്പാ പദ്ധതിയുടെ ലക്ഷ്യത്തെ തകര്‍ക്കുന്നതാണെന്നും വാദിച്ചു. കൂടാതെ, സര്‍ക്കാര്‍ ബാങ്കുകള്‍ക്ക് ഗ്യാരന്റി നല്‍കുന്നതിനാല്‍ സഹവായ്പക്കാരായ മാതാപിതാക്കളുടെ സിബില്‍ സ്‌കോര്‍ നിര്‍ണായകമാക്കരുതെന്നും അവര്‍ ആവശ്യപ്പെട്ടു. എന്നാല്‍ നിലവിലെ ഐബിഎ മോഡല്‍ വിദ്യാഭ്യാസ വായ്പാ പദ്ധതി പ്രകാരം ബാങ്കുകള്‍ക്ക് അപേക്ഷകരുടെയും സഹവായ്പക്കാരുടെയും സിബില്‍ റിപ്പോര്‍ട്ടും ക്രെഡിറ്റ് ചരിത്രവും വിലയിരുത്താന്‍ നിയമപരമായ അധികാരമുണ്ടെന്ന് കോടതി പറഞ്ഞു. ഈ വിധിയോടെ, വിദ്യാഭ്യാസ വായ്പ അനുവദിക്കുമ്പോള്‍ മാതാപിതാക്കളുടെ (സഹവായ്പക്കാരുടെ) സിബില്‍ സ്‌കോറും വായ്പ തിരിച്ചടവ് ചരിത്രവും ബാങ്കുകള്‍ക്ക് നിയമപരമായി പരിഗണിക്കാമെന്ന് കേരള ഹൈക്കോടതി വീണ്ടും വ്യക്തമാക്കിയിരിക്കുകയാണ്. അതിനാല്‍, മാതാപിതാക്കളുടെ മോശം ക്രെഡിറ്റ് റെക്കോര്‍ഡ് വിദ്യാഭ്യാസ വായ്പ ലഭിക്കുന്നതിന് തടസ്സമാകാന്‍ സാധ്യതയുണ്ടെന്ന് കോടതി വ്യക്തമാക്കിയിരിക്കുന്നു.
