ഇത്തിഹാദ് റെയില്‍: കൂടുതല്‍ സ്‌റ്റേഷനുകള്‍ ഉടന്‍; സേവനങ്ങളും വിവരങ്ങളും ഇങ്ങനെ

ദുബൈ: യുഎഇയില്‍ പൊതുഗതാഗത രംഗത്ത് വിപ്ലവം സൃഷ്ടിച്ച് മരുദേശത്തെ ആദ്യത്തെ പാസഞ്ചര്‍ ട്രെയിന്‍ വിജയക്കുതിപ്പിലേക്ക്. എമിറേറ്റുകളെ മികച്ച രീതിയില്‍ ബന്ധിപ്പിക്കാനും സാമ്പത്തിക വളര്‍ച്ച വര്‍ദ്ധിപ്പിക്കാനും നിക്ഷേപം ആകര്‍ഷിക്കാനും വിനോദസഞ്ചാരം പ്രോത്സാഹിപ്പിക്കാനുമുള്ള വേറിട്ട പദ്ധതിയായി മാറുകയാണ്. ചൊവ്വാഴ്ച ഇത്തിഹാദ് റെയിലിന്റെ പാസഞ്ചര്‍ ട്രെയിന്‍ സര്‍വീസ് ആരംഭിച്ചതോടെ ഗതാഗത രംഗത്ത് യുഎഇയില്‍ വലിയ മാറ്റങ്ങള്‍ സംഭവിക്കുകയാണ്. ഫുജൈറയില്‍ നിന്ന് അബുദാബിയിലേക്കുള്ള ദൈനംദിന സര്‍വീസുകളുടെ തുടക്കം വലിയ ആവേശത്തോടെയാണ് ജനങ്ങള്‍ സ്വീകരിച്ചത്. കഴിഞ്ഞ ആഴ്ച ബുക്കിംഗ് ആരംഭിച്ചതിന് ശേഷം പതിനായിരത്തിലധികം ടിക്കറ്റുകളാണ് വിറ്റുപോയത്. റെയില്‍ നെറ്റ്വര്‍ക്കിലെ മറ്റ് സ്റ്റേഷനുകള്‍ ഈ വര്‍ഷം സെപ്റ്റംബര്‍ 30-നും 2027 മാര്‍ച്ച് 30-നും ഇടയില്‍ പ്രവര്‍ത്തനക്ഷമമാകുമെന്നാണ് പ്രതീക്ഷിക്കുന്നത്. അബുദാബിയിലെ മുഹമ്മദ് ബിന്‍ സായിദ് സിറ്റി സ്റ്റേഷനും ഫുജൈറയിലെ അല്‍ ഹിലാല്‍ സിറ്റി സ്റ്റേഷനുമിടയില്‍ രാവിലെയും ഉച്ചയ്ക്കും വൈകുന്നേരവും ഉള്‍പ്പെടുന്ന പ്രതിദിന സമയവിവരപ്പട്ടികയില്‍ ആറോളം ട്രെയിന്‍ സര്‍വീസുകള്‍ ഉണ്ടാകും. അബുദാബി സ്റ്റേഷനില്‍ നിന്നുള്ള ഫുജൈറയിലേക്കുള്ള ട്രെയിനുകള്‍ രാവിലെ 8.19, ഉച്ചയ്ക്ക് 1.53, വൈകുന്നേരം 6.39 എന്നീ സമയങ്ങളില്‍ പുറപ്പെടും. യാത്രാ സമയം ഏകദേശം ഒരു മണിക്കൂറും 45 മിനിറ്റുമാണ്. ഫുജൈറയില്‍ നിന്ന് രാവിലെ 5.34, രാവിലെ 10.59, വൈകുന്നേരം 5.28 എന്നീ സമയങ്ങളില്‍ ട്രെയിനുകള്‍ പുറപ്പെടും.

യാത്രക്കാര്‍ക്ക് ഇത്തിഹാദ് റെയിലിന്റെ വെബ്‌സൈറ്റിലൂടെയും ആപ്പിലൂടെയും ടിക്കറ്റുകള്‍ വാങ്ങാം. ഉപഭോക്താക്കള്‍ അവരുടെ പുറപ്പെടുന്ന സ്റ്റേഷനും യാത്രാ തീയതിയും തെരഞ്ഞെടുക്കണം. അതിനുശേഷം ലഭ്യമായ യാത്രാ സമയവും കംഫര്‍ട്ട് (Comfort) അല്ലെങ്കില്‍ പ്രീമിയം (Premium) ക്ലാസ് ടിക്കറ്റുകളും തെരഞ്ഞെടുക്കാം. ലോഞ്ചിംഗ് കാലയളവില്‍ മുതിര്‍ന്നവര്‍ക്കുള്ള കംഫര്‍ട്ട് ടിക്കറ്റ് 55 ദിര്‍ഹത്തില്‍ ആരംഭിക്കുന്നു. ഇത് സാധാരണ നിരക്കായ 109 ദിര്‍ഹത്തിന്റെ പകുതിയാണ്. ഈ കിഴിവ് എത്രനാള്‍ നീണ്ടുനില്‍ക്കുമെന്ന് ഇത്തിഹാദ് റെയില്‍ വ്യക്തമാക്കിയിട്ടുണ്ട്. ഒരു കംഫര്‍ട്ട് ടിക്കറ്റ് തെരഞ്ഞെടുത്തുകഴിഞ്ഞാല്‍, സ്റ്റാന്‍ഡേര്‍ഡ് (Standard), വാല്യൂ (Value), ഫ്‌ലെക്‌സ് (Flex) എന്നീ മൂന്ന് ടിക്കറ്റ് ഓപ്ഷനുകളില്‍ ഒന്ന് തെരഞ്ഞെടുക്കാം.
സ്റ്റാന്‍ഡേര്‍ഡ് ടിക്കറ്റുകള്‍ക്ക് 55 ദിര്‍ഹമാണ്, ഇതില്‍ സീറ്റുകള്‍ തെരഞ്ഞെടുക്കാന്‍ കഴിയില്ല. മാറ്റങ്ങള്‍ അനുവദനീയമല്ല, റീഫണ്ടും ലഭ്യമല്ല.
വാല്യൂ: വാല്യൂ ടിക്കറ്റുകള്‍ക്കായി ഉപഭോക്താക്കള്‍ക്ക് 10 ദിര്‍ഹം കൂടി നല്‍കണം (ആകെ 65 ദിര്‍ഹം), ഇത് സീറ്റ് തെരഞ്ഞെടുക്കാനും ടിക്കറ്റ് ഓര്‍ഡറില്‍ മാറ്റങ്ങള്‍ വരുത്താനും അനുവദിക്കുന്നു. ഇവയും നോണ്‍-റീഫണ്ടബിള്‍ ആണ്.
ഫ്‌ലെക്‌സ്: ഫ്‌ലെക്‌സ് ടിക്കറ്റിന് 20 ദിര്‍ഹം അധിക നിരക്ക് ഈടാക്കും (ആകെ 75 ദിര്‍ഹം), ഈ ക്ലാസില്‍ സീറ്റ് തെരഞ്ഞെടുക്കാന്‍ സംവിധാനമുണ്ട്. ബുക്കിംഗില്‍ മാറ്റങ്ങള്‍ വരുത്താനും അനുവദിക്കും, കൂടാതെ റീഫണ്ട് ലഭിക്കുന്നതുമാണ്.
പ്രീമിയം അഡല്‍റ്റ് ടിക്കറ്റുകള്‍ക്ക് നിലവിലെ കിഴിവോടെ 120 ദിര്‍ഹമാണ് നിരക്ക് (സാധാരണ നിരക്ക് 239 ദിര്‍ഹം). പ്രീമിയം വിഭാഗത്തിലെ സ്റ്റാന്‍ഡേര്‍ഡ് ടിക്കറ്റിന് അധിക നിരക്കുകളില്ല. ട്രെയിന്‍ യാത്രക്കാര്‍ക്ക് വാല്യൂ ടിക്കറ്റിന് 10 ദിര്‍ഹവും ഫ്‌ലെക്‌സ് ടിക്കറ്റിന് 30 ദിര്‍ഹവും അധികമായി നല്‍കാം.

കുട്ടികള്‍ക്കും മുതിര്‍ന്ന പൗരന്മാര്‍ക്കും ഉള്ള നിരക്കുകള്‍
കംഫര്‍ട്ട് ക്ലാസ്: 17 വയസ്സുവരെയുള്ള കുട്ടികള്‍ക്കുള്ള ടിക്കറ്റിന് 28 ദിര്‍ഹമാണ് (കിഴിവ് നിരക്കില്‍), പ്രീമിയം വിഭാഗത്തില്‍ ഇത് 60 ദിര്‍ഹമായി ഉയരുന്നു. ഇവര്‍ക്കൊപ്പം ടിക്കറ്റുള്ള ഒരു മുതിര്‍ന്ന വ്യക്തി നിര്‍ബന്ധമായും ഉണ്ടായിരിക്കണം.
മുതിര്‍ന്ന പൗരന്മാര്‍ (60 വയസ്സും അതിനുമുകളിലും): ഇവര്‍ക്കുള്ള ടിക്കറ്റുകള്‍ക്ക് കംഫര്‍ട്ട് ക്ലാസില്‍ 44 ദിര്‍ഹവും പ്രീമിയം ക്ലാസില്‍ 96 ദിര്‍ഹവുമാണ്.
കുഞ്ഞുങ്ങള്‍: രണ്ട് വയസ്സിന് താഴെയുള്ള കുഞ്ഞുങ്ങള്‍ക്ക് മുതിര്‍ന്ന ഒരാളുടെ മടിയിലിരുന്ന് സൗജന്യമായി യാത്ര ചെയ്യാം.
വീല്‍ചെയര്‍ ഉപയോക്താക്കള്‍: ഇവര്‍ക്കുള്ള നിരക്കുകള്‍ മുതിര്‍ന്നവരുടെയും കുട്ടികളുടെയും ടിക്കറ്റ് നിരക്കുകള്‍ക്ക് സമാനമാണ്, ലഭ്യതയ്ക്ക് വിധേയമായി അവര്‍ക്കായി പ്രത്യേകം വീല്‍ചെയര്‍ സ്ഥലങ്ങളും മുന്‍ഗണനാ സീറ്റിംഗും ഉണ്ട്.

കംഫര്‍ട്ട്, പ്രീമിയം ക്ലാസുകളില്‍ എന്തൊക്കെ സംവിധാനം

കംഫര്‍ട്ട് ക്ലാസ്: ട്രെയിനിന്റെ വിഭാഗത്തില്‍ യൂണിവേഴ്‌സല്‍ സോക്കറ്റും യുഎസ്ബി ചാര്‍ജിംഗ് പോയിന്റും ലഭ്യമാണ്. വൈ-ഫൈ സൗജന്യമാണ്. യാത്രയ്ക്കിടെ ഭക്ഷണവും പാനീയങ്ങളും വില്‍ക്കുന്ന ഒരു ട്രോളി സര്‍വീസും ഉണ്ട്.
പ്രീമിയം ക്ലാസ്: യാത്രക്കാര്‍ക്ക് കൂടുതല്‍ ലെഗ്റൂമും പാഡഡ് ഹെഡ്റെസ്റ്റുകളും ഉള്ള വിശാലമായ, റീക്ലൈനിംഗ് സീറ്റുകളുണ്ട്. സൗജന്യ പാനീയങ്ങളും ലഘുഭക്ഷണങ്ങളും കൂടാതെ വാങ്ങാന്‍ വിശാലമായ സെലക്ഷനും ലഭ്യമാണ്. വൈ-ഫൈ സൗജന്യമാണ്.

അടുത്ത ഘട്ടത്തില്‍ കൂടുതല്‍ സ്‌റ്റേഷനുകള്‍

ഇത്തിഹാദ് റെയില്‍ നെറ്റ്വര്‍ക്ക് മാപ്പില്‍ പത്ത് സ്റ്റേഷനുകള്‍ പട്ടികപ്പെടുത്തിയിട്ടുണ്ട്. ഈ സമയവിവരപ്പട്ടിക പ്രകാരം അവയെല്ലാം മാര്‍ച്ച് 30-നകം പ്രവര്‍ത്തിക്കും. ഫുജൈറ: അല്‍ ഹിലാല്‍ സിറ്റി സ്റ്റേഷന്‍-പ്രവര്‍ത്തനക്ഷമം, അബുദാബി: മുഹമ്മദ് ബിന്‍ സായിദ് സിറ്റി സ്റ്റേഷന്‍-പ്രവര്‍ത്തനക്ഷമം, ദുബൈ: ദുബൈയിലെ ജുമൈറ ഗോള്‍ഫ് എസ്റ്റേറ്റ്‌സ്-സെപ്റ്റംബര്‍ 30, ഷാര്‍ജ: അല്‍ ദൈദ് സ്റ്റേഷന്‍-സെപ്റ്റംബര്‍ 30, അബുദാബി: അല്‍ ദഫ്ര ട്രെയിന്‍ സ്റ്റേഷനുകള്‍ (അല്‍ സില, അല്‍ ദന്ന, മിര്‍ഫ, മദീനത്ത് സായിദ്, ലിവ)-ഡിസംബര്‍ 30, ഷാര്‍ജ: യൂണിവേഴ്‌സിറ്റി സിറ്റി സ്റ്റേഷന്‍-മാര്‍ച്ച് 30, 2027