സൗരവൈദ്യുതി ഉല്‍പ്പാദനത്തില്‍ ലോകത്ത് ഒന്നാമതെത്താന്‍ യുഎഇ
Sat, 07 Nov 2026
ഗാസ: ഹമാസ് ഭരണസമിതി പിരിച്ചുവിട്ടു. 2007ല്‍ ഫലസ്തീന്‍ പ്രസ്ഥാനമായ ഫതഹില്‍ നിന്ന് നിയന്ത്രണം പിടിച്ചെടുത്തതിന് ശേഷം ഗാസ ഭരിക്കുന്ന ഹമാസിന്റെ ഈ നീക്കം വലിയൊരു രാഷ്ട്രീയ മാറ്റത്തെയാണ് സൂചിപ്പിക്കുന്നത്. സിവിലിയന്‍ ഭരണം നടപ്പിലാക്കുന്നതിനായി ഒരു ടെക്‌നോക്രാറ്റിക് കമ്മിറ്റിക്ക് വഴിയൊരുക്കിക്കൊണ്ട്, രണ്ട് പതിറ്റാണ്ടോളമായി ഗാസ സ്ട്രിപ്പ് ഭരിക്കുന്ന സമിതിയെ പിരിച്ചുവിടുന്നതായി ഫലസ്തീന്‍ പ്രസ്ഥാനമായ ഹമാസ് തിങ്കളാഴ്ച പ്രഖ്യാപിച്ചു. മുന്‍ വര്‍ഷം നടന്ന നിയമസഭാ തിരഞ്ഞെടുപ്പില്‍ വിജയിച്ചതിന് ശേഷം, 2007ല്‍ ഫലസ്തീന്‍ പ്രസ്ഥാനമായ ഫതഹില്‍ നിന്ന് ഹമാസ് പോരാളികള്‍ ഗാസയുടെ നിയന്ത്രണം പിടിച്ചെടുത്തതുമുതല്‍ ഗാസ ഭരിക്കുന്ന ഹമാസിന്റെ ഈ നീക്കം വലിയൊരു രാഷ്ട്രീയ മാറ്റത്തെയാണ് സൂചിപ്പിക്കുന്നത്. കഴിഞ്ഞ ഒക്ടോബറില്‍ ഹമാസും ഇസ്രായേലും തമ്മില്‍ ഗാസയില്‍ വെടിനിര്‍ത്തല്‍ പ്രാബല്യത്തില്‍ വന്നതിനുശേഷം, ദൈനംദിന ഭരണത്തില്‍ നിന്ന് മാറിനില്‍ക്കാന്‍ തങ്ങള്‍ തയ്യാറാണെന്ന് ഗ്രൂപ്പ് ആവര്‍ത്തിച്ച് പറഞ്ഞിട്ടുണ്ടെങ്കിലും, ആയുധം വെച്ചു കീഴടങ്ങുക എന്ന സങ്കീര്‍ണ്ണമായ വിഷയം ഇപ്പോഴും പരിഹരിക്കപ്പെട്ടിട്ടില്ല.
‘ഗവണ്‍മെന്റിന്റെ എമര്‍ജന്‍സി കമ്മിറ്റി മേധാവി മുഹമ്മദ് അല്‍ ഫറ ഔദ്യോഗികമായി രാജി സമര്‍പ്പിച്ചു,’ എന്ന് ഹമാസിന്റെ ഗവണ്‍മെന്റ് മീഡിയ ഓഫീസിന്റെ മേധാവി ഇസ്മായില്‍ അല്‍തവാബ്ത എഎഫ്പിയോട് പറഞ്ഞു. നാഷണല്‍ കമ്മിറ്റി ഫോര്‍ ദി അഡ്മിനിസ്‌ട്രേഷന്‍ ഓഫ് ഗാസയിലേക്കുള്ള (NCAG) ഭരണപരവും ഗവണ്‍മെന്റ് തലത്തിലുള്ളതുമായ മാറ്റം സുഗമമാക്കുന്നതിന് വേണ്ടി സമിതി പിരിച്ചുവിടാനും അദ്ദേഹം തീരുമാനിച്ചിട്ടുണ്ടെന്നും അല്‍തവാബ്ത കൂട്ടിച്ചേര്‍ത്തു. നിലവില്‍ കെയ്‌റോ ആസ്ഥാനമായി പ്രവര്‍ത്തിക്കുന്ന എന്‍സിഎജി (NCAG), 2025 ഒക്ടോബറില്‍ വെടിനിര്‍ത്തലിന് മധ്യസ്ഥത വഹിച്ചപ്പോള്‍ യുഎസ് പ്രസിഡന്റ് ഡൊണാള്‍ഡ് ട്രംപ് സ്ഥാപിച്ച ബോര്‍ഡ് ഓഫ് പീസ് ആണ് രൂപീകരിച്ചത്.
‘ആക്രമണവും ഉന്മൂലന യുദ്ധവും തുടരുന്ന അധിനിവേശത്തിന് ന്യായീകരണങ്ങള്‍ ഇല്ലാതാക്കുന്നതിനായി, ഗാസ സ്ട്രിപ്പിന്റെ ചുമതല ഇനി വഹിക്കില്ലെന്ന പുതിയ തീരുമാനമാണ് ഹമാസ് സ്വീകരിച്ചിരിക്കുന്നത്,’ ഹമാസ് വക്താവ് ഹാസെം കാസെം എഎഫ്പിയോട് പറഞ്ഞു. ‘നാഷണല്‍ കമ്മിറ്റി ഫോര്‍ ദി അഡ്മിനിസ്‌ട്രേഷന്‍ ഓഫ് ഗാസ അതിവേഗം കടന്നുവരുമെന്ന് ഞങ്ങള്‍ പ്രതീക്ഷിക്കുന്നു, കൂടാതെ കമ്മിറ്റിയുടെ വിജയം ഉറപ്പാക്കുന്നതിനായി ഭരണപരമായ ഉത്തരവാദിത്തങ്ങള്‍ അവര്‍ക്ക് കൈമാറാനുള്ള സന്നദ്ധത ഹമാസ് ഉറപ്പുനല്‍കുന്നു’.
